Skip to content
BibleKenya

Alkitab Bahasa Ansus

Markusi 15

Yesusi doa na kubernur Pilatusi renapa

(Mat. 27:1-2,11-26; Luk. 23:1-5,13-25; Yoh. 18:28-40, 19:1-16)

Ayari pa kikeu, we embedung we imami paya, mananu Yaudi paya kong kuru akama Yaudi paya kong Majelisi Akama ea wau ya, empandura. Ya engkawio kuira parari Yesusi. Interi ya etawi warangpa mae engkoria etoni wu kubernur Pilatusi. Impaina Pilatusi dutani doyo, “Au mamo nyontarai Yaudi ene Mananu pi di Au e?” Yesusi rioa wei doyo, “Au meari kowiora pa.” Interi we embedung we imami paya entopang pitau we etimburi na pa. Pilatusi dutana wuria doyo, “Au wo kowio pianea wae? Remua pitaubai engkawiora we etimbu Au pa!” Mana Yesusi kewio katea wa, donane Pilatusi arokutuya kia.

Na a Paska pai mamo, Pilatusi ne anang we pika nyontarai we wangka riuti pei we nyontarai empau paya, parari ya etewara pa. Mae na a yani nyontarai pei anompei Barabasi wangka riuti tutu pera nyontarai paya we etoamuna we parenta Roma pai. Kong ya emungbemuna na awe etong amuna pa. Interi nyontarai we empau paya endama etewara imbaro Pilatusi pika nyontarai we wangka riuya paya ei, parari ne anang we nyari pa na anani baba pai pa. Pilatusi rioa weya doyo, “Metaumia we imbaro empika Mananu Nyontarai Yaudi neie?” Pilatusi rearona we we embedung we imami paya esaneung Yesusi wa, impaina engkori wurima nina pa. Mana imami we embedung paya engkawioaya nyontarai empau paya we etewara imbaro Pilatusi pika Barabasi weya. Interi Pilatusi kewio weya ea doyo, “Toyana mamo pitoai yona we nyontarai mesawi we Mananu Nyontarai Yaudi nei pae?” Impaina ya etanana kangkuna etoyo, “Yeroi na aitaba pai!” Interi Pilatusi kewio weya naria doyo, “Mana pimamuna pitoai nyari pae?” Mana ya etanana kangkuna ea etoyo, “Yeroi na aitaba pai!”

Pilatusi anewe dong nyontarai madu paya esanerarong pai merarising paina, i pika Barabasi weya. Mana i demi nyontarai endaruba Yesusi interi doni weya we etoni yeroi na aitaba pai.

Nyontarai paya engkangkani Yesusi

(Mat. 27:27-31; Yoh. 19:2-3)

Interi apaimamuna paya engko Yesusi to manu baba engkutu kawio na pa, na raora we Kubernuri meoi na paia, mae esau apaimamuna ei paya ma empandura. Na yana etong asung pampang we makae pai we I, ya etanung ai arawang we aisasinai pa we sapewa mae esayai na dungkami pai. Interi ya esomi na embeangkakari wei etoyo, “Tabea, we Mananu Nyontarai Yaudi ne Au!” Ya endaruba dukamipai na aisoi, mae engkanyu I, emayoi esaebu kong esomi wei. Ya engkangkani toyana ra kaipa empika ne asung pampang pai warui mae etong mantauni asungpa ea yesuna.

Yesusi yeroi na aitabapai

(Mat. 27:32-44; Luk. 23:26,33-43; Yoh. 19:17-24)

Interi ya engkori tori we etoni yeroi na aitabapai. Na rang rabuang pa etadu nyontarai pei we riana bendari ri wane ma, mae endorai we yedo Yesusi ne aitabapai. I anompei Simoni, nyontarai Kirene dina, Aleksanderi kong Rufusi une yai dina.1

Ya engko Yesusi to nu we anompei Golgota, ne artipei Wi Wekadadung Neina. Ya etong angguri we empaua na muri2 pea we dunung, mana meidai we dunung. Interi empakui yeroi na aitaba pai, mae ya embiwo ne asungpa weya na empiwa we matei deduta pa.3

Empaku Yesusi na aitabapai yanapa mamo saraka pe inyatang pina. Kong pitoai dona mamo etoni yeroi na aitabapai pa, ya entoi na aitaba dung pai riotu toninane: “Mananu Nyontarai Yaudi Dinini pai.”

Ya endara Yesusi kong nyontarai kodu we umamuna, asaru ei yeroi na waradowatang, ei yeroi na waradowiri pai. [Impaina tawa parari rirang na Weraung Memarang we riotu tonina: “I ingkai nyontarai esawi konta we nyontarai dong amuna.”]

Nyontarai we enda na yana paya entatipa Yesusi mae engkuei endukamipa etoyo, “Eh nyontarai boyo ingkai tota Allai ne Manu Mamarang nei mae bauni na ape botoru ea,4 wia warui aitabapai mae poriri Nemutaraipai!” Toyana tato we imami embedung paya engkong kuru akama Yaudi paya engkawio waweria weya mae engkangkani I mae engkawio etoyo, “Nyontarai ei paya I periri ya, mana Mantauni netarai nempai periri wa! Topino I mamo Mananu Mampariri, mananu Israeli dina mamo, wia warui aitabapai imbaro tandeoa kong tandoaoa.” Kong nyontarai kodu we empaku asaru konti pa asaru untatipa I konta.

Parari Yesusi keda pa

(Mat. 27:45-56; Luk. 23:44-49; Yoh. 19:28-30)

Na awe saraka riora ura eya kodu pa, berorang pa tewung raora yani tentenang ra sisu rawandeng, saraka riora botoru. Mae na saraka riora botoru pa Yesusi denana na rawapui piaya doyo, “Eloi, Eloi, lama sabakhtani?” Yanama doyo, “Allai Neu pai, Allai Neu pai, pitoi pika Yau pa?”5 Nyontarai embe totoi we etoa nayana pa entarao kewio pa impaina etoyo, “Mentara, I yau Eliai.” Nyontarai pei riama kio papando pea, yoani na angguri weyaa pa mae diani na aikena pei mae dona wu Yesusi woreng pa aei kong kewio doyo, “Tatamang we Eliai riama we piri toung ete wereria e?”6 Interi Yesusi denana na rawapui baba mae ne asengpa takutu na peinato. Na a yanito irei baba we yeroi widora na Allai ne Manu Mamarang rarong wadi, teabu we kodu na yeipa ra sisu ungpa.7 Awe perwira doana yana arota Yesusi pa, reoawe topitotoi Yesusi ne aseng takutu pa, kewio doyo, “Tarai, nyontarai nini mamo Allai Antung dina!”

Nayana tato nyontarai wawing pe embetotoi etoa na woroi mae endeoa parari piyana pa, ya mamo Maria Magdalenai, Yakobusi maiyea pai kong Yosesi usinyami Mariai, kong Salomei. Ya kuira wo piana etua Yesusi kong empatari na awe nyaina Galilea pa. Mae nayanapa wawing ei paya empau empanduya na yana. Wawing nina ya wo enda etua Yesusi eampa ma enai na bendari Yerusalemi to.8

Etaisata Yesusi

(Mat. 27:57-61; Luk. 23:50-56; Yoh. 19:38-42)

Na yana piana wo pai ria do sawa kong a we nyontarai etamamang we a Sabati Yaudi pai. Tutu yana pai Yusupi, nyontarai Arimatea pai, I kio netaraipai dutang Pilatusi mae dewara we Yesusi netarai kakopa pai. Yusupi nini wo ei na Majelisi Akama Yaudi pai kong nyontarai paya entuang wei. I tato demamang we Allai Ne Riu we Mananupa. Pilatusi aneaerai kia na awe taraoa we Yesusi piana keda eampa. Impaina yau perwira pai ma dutani doyo, taraie Yesusi piana keda eampae? Piana tarao perwira pai kewiora wei parari topitotoi Yesusi keda pa, rioa we dong Yesusi netarai kakopa pai we Yusupia. Interi Yusupi dewayang irei lenani (ne arga tedai) peia, interi i piri Yesusi netarai kakopa pai toung warui aitabapai mae yesani na irei lenani pai. Interi kioria doni wiata na aisata we piana esiraia manyenato na wi wekami pai. Interi i keidui kamipei tewung aisata ne aturareipai. Maria Magdalenai kong Mariao Yosesi nyani undeo nu we Yesusi etaisatainai pa.

Source notes (8)
  1. Cross-reference Rm. 16:13
  2. Footnote Muri mamo anong we pei dina. Muri nini pai enariwe maning we airowu, we etoni we ubah we enari nyontarai nyui mamo doni netarai nyui wa
  3. Cross-reference Mzm. 22:19
  4. Cross-reference Mzm. 22:8, 109:25; Mrk. 14:58; Yoh. 2:19
  5. Cross-reference Mzm. 22:2
  6. Cross-reference Mzm. 69:22
  7. Cross-reference Kel. 26:31-33
  8. Cross-reference Luk. 8:2-3

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.