Skip to content
BibleKenya

Alkitab Bahasa Ansus

Markusi 16

Yesusi tewa warui kaida pa

(Mat. 28:1-10; Luk. 24:1-12; Yoh. 20:1-10)

Na awe a Sabati Yaudi pai piana teweri eampa, Maria Magdalenai mae Mariaio Yakobusi nyani pai kong Salomei, itombori piairowu pea we itonda to aisata pai we itosepu maningso Yesusi netarai kakopa pai. Mae ayarima na a retenang na arimingku yani, na yana wopai tepira to, wawing pa itoru itonda to aisata pa. Na rang rabuangpa itongkawio waweriao itoru itoroyo, “Matei di ingkai keidui kami pai warui aiturarei kambireipai we antoru pae?” Mana na awe itondara kikeu aisata pai, itondeoa we kami pai piana keidui warui kambirei pai ne aturarei pai eampa. Interi itosua to kambireipai apui mae itondeo nyontarai aimiomang pei yesung asung we byua meoi na do watang. Itontantuma kia, mana nyontarai aimiomang wadi kewio we itoru doyo, “Mitondeo mitomatai pe! Mitoru mitoserai Yesusi nyontarai Nasareti we yeroi na aitaba pai. I piana tewa to. I nyaina nina wa. Mitondema! Nu we etoni wiata nai pina. Mana ninane mitondara mitontopana we ne nyontarai etuari paya kong we Petrusi tato: We I piana pempong mia to raora Galilea; nawana ingkai mendeo I, parari we piana sopana we mia eampa.”1 Interi itoru itomati itombawu warui aisata wadi, wo na tantuma kong matai wadi yumao itoru paina. Itoru itontopang pianea wa we nyontarai pei wa, wo itomatai paina.

[Wawing paya na mararu itorapaia itontopana we Petrusi mae ne maniwowi paya. Na tanang ya entopang parari arera we aimiomang pai kewiora pa. Piana Yesusi mantauni ne manarua paya wiuwua na wopemurang paia sisu wope wanangba wanei, arera mamarang kong wemunamunai wa pa parari wiengki woroi-woroi pa.]

Yesusi denyauwi netarai pai we bototoi kong demi ne weetuari paya Yesusi wieita to rora-marising

Na Awe piana Yesusi tewa warui kaida pa na a retenang ari Mingku ayarima kakepang pai, I retenang denyawi Netarai we Maria Magdalenai. Mariai nini di rawandeng pe Yesusi dedawa semi-semi pe embe itu warui pa. Interi wawing pai ria sopana we Yesusi ne nyontarai etuari paya, we a yani pai esanerarong tekakutu kong esaia etaidu we Yesusi kedapa. Mana na awe entarao kawio wawing pai sopana we Yesusi tewa mae i piana reoi pa, ya endoaoa wa. Interi Yesusi denyawi netarai pai na wieiya warui na pampong denyawi pa. We nyontarai kodu na we etuari paya, na awe unda tori warui bendaripai pa. Interi asaru untaweri ea, untopana we weempau paya parari pi uraduta pa, mana ya endoao asaru wa.

Impaina Yesusi denyawi netarai pai we ne manarua uraya koiri paya na awe emayoi etampi pa. Mae yua ya tutu ene endoaoa meitui wa pa kong endukami meitui pa tutu ya endoao wa pi we nyontarai pa endeoa na endekamipa memeari we Yesusi piana tewa pa. Interi Yesusi kewio weya doyo, “Mendato nunei tentenang mae membuwu Allai Ne Arera Weweng pa we nyontarai ne ya kuira.2 Matei di rioaoa kong webebaptisi mamo ingkai dedu pariri pa, mana matei di rioaoa wami ingkai dedu mambabati pa. Kamang ninane ingkai derua nyontarai we endoaoa paya: Ya ingkai etadawa semi-semi na Anoune, ya ingkai engkawio na nyontarai eaya ene kawio pa weya na kawio enduinaria na ea wami, topino ya endu piara emamuna paya kong etunung piwe entatu pa ki, mana ya etadu pianea wa. Ya ingkai embarawawu nyontarai we yui pei mamo, nyontarai yani ingkai penaang.”

Yesus weita to Rora-marising

(Luk. 24:50-53; Kis. 1:9-11)

Piana Yesusi kewio toyana ra kai weya pa, I wieita to rora-marising, interi meyoi na Allai dowatang pai.3 Ne nyontarai etuari paya enda ra embuwu Allai Ne Arera Weweng pa na nunei tentenang, mae Seni derua ya mae meriwa kong ya. Piyana pa denyawa na pitantuma pitau we nyari na yapa.

Source notes (3)
  1. Cross-reference Mat. 26:32; Mrk. 14:28
  2. Cross-reference Kis. 1:8
  3. Cross-reference Kis. 1:9-11

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.