Alkitab Bahasa Ansus
2 Timotiusi 4
Kristusi Yesusi ingkai ria to nunei eama we riu we Mananu kong kiutu kawio parari nyontarai we embeng neya kuira kong we engkada paya kuira. Impaina yerekamana na kangkuna we au na Allai renapa kong Kristusi Yesusi renapa we: Wuwu Allai ne Arera pa, manyena na a we maipa ete na a we maiwa pae, nyontaraipei nyari sarara pea mamo bonyawa ne sarara pa, wua ya kong bonyau ya na anemuaiwara kong na anyau wetarai pa. Wo a pei ingkai riama ki, nyontarai pea emaidai etadu anyau we maipa, mana ya ingkai empandu kuru paya parari esanetatuapa we etanyau pi entaraoa mamo weuna na entarakambireipa. Ya ingkai empoweri entarakambireipa warui kawio we tarai pa kong esepara we araripa. Toyana ki mana remukakepang nemutaraipai na wemai na pipatotoi ea. Anemuaiwara na didiwapa, nuari mariwa Seni dona we au we wuwu Arera Mamarang pai mae bongparari pitoai nuari we wewomingpa na wemai. Parari yau mamo, neu rianei piana yararuwi we pikika we Seni kong neu kaida ne piana kikeu to. Yau piana ekong wawoa na wemai to mae yepaia piana epapa na nu we engkamangnapa to kong yau piana yerara neu eroaoa we Kristusi pa na wemai. Ninane wiwai tutu embeng na pitarai pa piana manyena demang yau to. Wiwai yana Seni we kiutu kawio na wemai pai dona we yau na awe nunei ria menaing na wane. Wiwai yana pa we yau meari wa mana we nyontarai pitau we etamamang pampang parari awe Seni riama wane.
Arera we ra kaipa
Bosaera imbaromi rua muraru wu yau ma. Tutu Demasi aneo nunei impaina ria warui yau to. I piana depai to Tesalonika. Krekesi piana depai to Garatia mae Titusi depai to Darmatia.1 Rukasi memeari di nyai kong yaune. Bonta ma mamo, bontara bodu Markusi we musa tonina ma, tutu i mei we riupata yau na mariwa we erune paina.2 Tikikusi wo piana yemi donta to Epesusi eampa.3 Bo bopai ma mamo ko neu asung pampang pai we wiata na Karpusi ne manupai na bendari Troasi kong neu buku pa retenang peino weraung enari na domba rerawa pai.
Aleksanderi wekamasan tembaga pai dong mamuna pa madupei we yau. Seni ingkai dona taweri wei parari we dona we yaupa.4 Topianapa autato piaiwara wei, tutu i kewio kangkuna we biateta tane anyaunei pa.
Na awe ebawe yau retenang pa nyontarai pei piata yau wa, ya enda warui yau. Wento Allai dupirandeni ya. Mana Seni derua yau kong dong paya we yau, imbaromi yau epaya we ewuwu Arera we Weng nei tantenang kong kawasa Yaudi wa paya entaraoa. Kong etapira warui singa woreng pai. Kong Seni ingkai pika yau warui we moyawa pa. I ingkai periri yau, imbaromi eyua to Ne we riu we Mananu pa na rora-marising. Andi tataparandini ki woroi-woroi. Tarai.
Tabea
Yong tabea we Priskai kong Akwilai kong we Onesiporusi kong ne mandarong pai.5 Erastusi nyaina Korintusi kong Tropimusi tato yui paina yoni nyaina Miletusi.6 Bosaera we ruama warui awe Wanang ne aidu wia era pa wia wa. Tabea we rana Ebulusi kong Pudesi kong Linusi kong Klaudiai kong na neta nea kuira. Wento Seni derua dumuainunungpai. Kong dong Ne weweng dona pinoma pa we mia.
Source notes (6)
- Cross-reference 2Kor. 8:23; Gal. 2:3; Kol. 4:14; Tit. 1:4; Flm. 24
- Cross-reference Kis. 12:12,25, 13:13, 15:37-39; Kol. 4:10,14; Flm. 24
- Cross-reference Kis. 20:4; Ef. 6:21-22; Kol. 4:7-8
- Cross-reference Mzm. 62:13; Rm. 2:6; 1Tim. 1:20
- Cross-reference Kis. 18:2; 2Tim. 1:16-17
- Cross-reference Kis. 19:22, 20:4, 21:29; Rm. 16:23
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.