2 Timotiusi 3

Nyontarai ne na Awe nu riaki menai nina enari wemoya wa kia

1Mesaneaoa we na awe nunei ria ki do menaing ne ingkai nyontarai ne tatadu aseung pau ki. 2Nyontarai neya ingkai esaneo mantau ya kong embe woming we pe pa. Ya ingkai esombuari kong etaparanding ya, embe mantatipari, kong etoamuna we ene yai kong nyani ya, kong emaidai esomi we Allai. 3Esanewiwu nyontarai eaya wa, emaidai emadori kong nyontarai ea wauya, emararising we engkawio kawio wemoya wa parari nyontarai, empaya wa we entampi we unawa pa, emamuna, emaidai enari pi maipa, 4ya embo nyontarai, esanetatuata woroi wa, esore baba ki, emararising we etong parari pi nunei warui etong parari Allai ne awia pa. 5Ya wo enari pararia we ya wo nyontarai esomi we Allai diya, mana na embengpa ya emaidai esomi we Allai. Topira warui nyontarai toyana paya.

6Wo na ya, eaya enda na anyuing to nyontarai ene manupa we engkawioaya wawing we endoaoapa piraiwoi paya esanerarongpa. Wawing yasa wo enari sasari pitau, kong esanekangkona pitau wemoyawa pa dauya. 7Wawing paya emararising we etadu anyaupa pampang, mana endearoana wami pitarai na Allai pa. 8Ya embateta wetarai pa parari Yanesi kong Yambresi asaru na pampompa umbateta Musai pa. Esanetatuatapa manaing kong endoaopa piraiwoi.1 9Mana etongsaera totoi kia ya endura ayawa, tutu parari pitoai Yanesi kong Yambresi asaru uraduta na pampongpa, ya tato ene tata pa piana denyawa we nyontarai paya kuira.

Paulusi denyau Timotius we dongparari pitoai nyaripa

10Mana Timotiusi au, au piana bong parari neu anyau pa mae pitoai enari ne, pitoai aneuweapa, endoaopa, munuarapa, aneuwiwupa kong neu nukepanapa. 11Au tato piana remo yau we engkangkani yau pa kong didiwa we yeduta na bendari Antiokia, Ikoniumi kong na Listra pa. Didiwa pitau yani pai yeduta mae Seni pika yau warui pitau yani pai.2 12Tarai, we matei di yomi we Allai mae wieng kong Kristus Yesusi mamo ingkai dedu didiwa pa tutu nyontarai etong kangkani, 13mana nyontarai weetong amuna kong embeangkakari paya ingkai etamamunai era ea. Ya embeangkari nyontarai peaya mana ya tato nyontarai embeangkari ya. 14Mana Timotiusi au, au mamo rukepang anyau wetarai we piana boduta kong roaoa pa, na remuao nyontarai mateai etanyauwa we aupa. 15Au andi anemukakepana tato we na awe moia pa au piana remuaroang weraung Mamarang pai to. Kawio we dong anekurayang pa we au mae dinti au to pariri we boduta na roao Kristus Yesusi pa. 16Allai ne Weraung Mamarang pitau we nyontarai entoi ne, I ne mambiri pa yumao ya we entoi. Pitau yana pa weuna we denyau tata, we denyawa tane sarara pa, we yua tata kong riwang tane we tatona pa, kong denyau tata we tanari wetarai pa. 17Na toyana pa, Allai menyenang ne nyontarai ne koiri-koiri we enari mariwa weweng pa.