2 Timotiusi 2

Nyontarai we riupi we Yesusi mamo, i perari rai memuna riupi na wemai

1Impaina Timotiusi, neu kumai pa au, yewara au we bongsaera pampang we paya na Allai ne weweng dona pinoma we tata pa, tutu tambekoiri kong Kristus Yesusi paina. 2Pitoai taramoa na yau pa na kawasa endena pa, roaoa we nyontarai wewe emanuanung we etanyau nyontarai eaya pa. 3Au we nyontarai we bua Kristusi Yesusi mamo porari pimamuna we rupi na wemai impaina au andi nukepana na uira we boduta pa. 4Nyontarai pimamuna we nina demuna pai mamo, yemupa we pi nempa wa, imbaro na toyana pa ne komadangpai aneoi. 5Nyontarai we yenyui bari pa we dedu piwe anong pa, mamo yenyui na wemai parari anang we engkutua we esanyui pa. 6Nyontarai we dong romipai, we meriwa na paya andi ingkai retenang kiutu ne pitatanang we sanang pa. 7Anemukakepana aiwara we pitoai etopana toyanapa, tutu Seni ingkai dona we au anemuatora we pitaupa kia.

8Anemu kakepang nina: Yesus Kristusi, we suwi na nyontarai engkada paya, iwo riana mandarong Dauti, ai wuwua kamana na Arera Weweng nei nini. 9Tutu Arera Weweng we ewuwui nini aidona ma yedu uirapa, kong etawi waraupa na wai besi parari nyontarai memuna pai, mana Allai Ne Kawiopa ne paya pea we etawiti wa. 10Tutu yanapai, yau emunuara na yeduta piyana pa kuira we nyontarai Allai piana diri ya pa, imbaro ya tato etadu pariri na Yesus Kristusi kong etadu ne wedea we woroi-woroi pa. 11Anyau we yo ekawiora ea nina tarai:

“Tatoyo tangkada konti,

mamo tata tato ingkai tambeng konti.

12Topino tanukepana mamo, tata tato tatairora konti;

mae topino tambeangkari I mamo, I tato ingkai weangkari tata.1

13Topino tanukepana wa, I nukepana pampang,

tutu I wo deduta wa we weangkari Netaraipai.”

Anyau we arota mantanyau emai wa pa.

14Anemukamana mae topang kamana na kangkuna madui yana we nyontarai paya na Allai renapa, imbaro remo endeo etamindui ya we kawio sosiau pa pe. Wo pitau yana ne una pea wa mana kio munamunai we nyontarai we entaraoa paya. 15Anemukangkuna waro Allai reo au we moi na renapa we nyontarai moriwa na momaya wa. Au bonyau na wemai anyau wetarai pa. 16Mana pika au warui kawio we unawa pa kong wemamarang wa pa. Wo kawio yana pa dong nyontarai pa ya emamuna raweina ea. 17Kawio etopana pa tatera parari ui kangkeri. Na yapa mamo Himeniusi kong Filetusi asaru tato. 18Asaru piana untori warui anyau we wetaraipa na uranyau uroyo a nini Allai piana dong nyontarai ne tata tasuwi warui kaidapa to. Na anyau yana pa donane nyontarai pea endoao Yesusi wa. 19Toyana ki, mana Allai nyari riri amang we meitui we piang na pikodu nina pa aino: “Allai rearong ne nyontarai paya,” kong “matei yau Allai anompa mamo andi waraka pitau weuna wa pa.” 20Na manu baba pei mamo dedu piawawa na emasi kong peraki pa memeari wa, mana piawawa we enari na kakopa pa tato. Piawawa weretenang pa na emasi kong peraki pa enari we piwe tadai pa, kong ne we puipa enari we piwe maiyea pa. 21Topino matei rioipi ne taraipai warui pitau we mamuna pa mamo, i ingkai we piawawa na manupai we piwe weweng pa, i memarang, kong Allai reoi we mei we mariwa weng pa. 22Impaina pika nemutaraipai warui maniniawari, we aimomang paya esanerarong mararising we enaripa. Kong bongsaera we bongparari Allai ne awiapa, roao ne kawiopa, anemuwiwu nyontarai, we wieng na madori kong nyontarai we esau Seni paya na anemurarong mamarang. 23Pika nemutaraipai warui nyontarai entata we eserai kawio pa ya, tutu ya wo enduinari pianeawa kong emarising we embawari parari anyau we moyawa pa. Anemuaoa we pitau yanapa kio amuna meari ki. 24Seni ne Woming we riupi wei pai mamo, dong amuna wa, anerarong weng we nyontarai neya kuira. I andi anemanuanung we denyau nyontarai na wemai kong aneaiwara ete keou pampinoma wa, 25ne kawio pa manaang na etinti nyontarai we embateta ya pa, imbaro Seni dong apea weya we esanetaweri warui ene sasaripa kong endearoang anyau we tarai na Allai pa. 26Na toyanapa ya endearoang ene sasaripa kong entaweri we Allai tutu ya empikara warui Nyombatang warampa we riu ya we etong parari ne awiapa yana.