2 Timotiusi 1

1-2We Timotiusi neu kumai aneuwiwu aupa.

Kawio ne na yau Paulusi, Kristus Yesusi ne rasuri ne yau. Ewe rasuri ne mamo tutu Yai Allai ne awia pa, imbaro etopana we kawasa paya parari Yai Allai ne arera we na pampompa derekamana we ingkai tatadu tambengpa na Kristus Yesusi pa.

Sen Allai kong Yesus Kristusi tane Seni, urong une weweng urona pinoma pa so au, usanewiwu au, kong urong au bodu une wemadori piboki pa.1

Paulusi deparanding Allai tutu Timotiusi kong denyauwi we rioaoa na we maitui.

3Etopang piboki we Allai, we eyomi wei pai na aneurarong memarang, parari neu apusi woriai pa esomi wei na pampompa. Kong yau eparandeni au wa, mana diru raida etandau pampang we Allai we au. 4Aneoa parari rengkarupa na awe etapira warui aupa, impaina aneurarongnei dawia we tupandu taru ea imbaro tarai emararising naria ea. 5Aneo nemu roao Kristus Yesusi na pitarai pa, parari tapumu Loisi kong nyamu Eunikei. Mae yau eroaoa we au tato roaoa toyana.2 6Impaina yerekamana we au we bosaera na mambiri Allai ne dona pinoma we aupa we wuwua ea, na awe eruwa waraune so aupa. 7Wo Duainunung Mamarang we Allai doni we tata nei, we dong tata tamatai wa mana we dong tata tampaya, kong tasanewiwu tata kong tasanerarong meitui we tantampi piwe unawa pa.

8Impaina remu momaya we topang parari tane Seni, mae momaya tutu yau we ewata na wangka pe nina tutu ewuwu Yesusi ne pe. Mana na mambiri Allai dona we aupa, bodu uira pea tutu topang parari Arera Weweng pa mamo paya na uira yani. 9Allai piana periri tata warui tane sasari ne kong yau tata imbaro tambengpa tambe nyontarai mamarang. Nyari toyana pa dintatuata na weweng tanarine wa, mana parari pitoai anetatuatapa kong parari ne weweng dona pinoma we tata pa. Ne weng yana dona we tata na Kristus Yesusi, na awe nyari nuneipa wa. 10Mae na nina ne, Allai denyawa ne anewiwu tata pa na Kristus Yesusi tane Mampariri ria we tata ma nei. Yesusi piokai kaidapai ne mambiripa kong denyawa topitotoi tambeng ki woroi-woroi pa na ne Arera Weweng pa. 11We etopang parari Arera Weweng nina pa dona, Allai riuwa yau ewuwu kawio pa kong ewe rasuri kong ewe mantanyau pa.3 12Aidona mamo yedu uirapa kuira nina, mana emamaya wa tutu yau ereuaroana we matei di eroaoi pa. Yau aneusara we pitoai rioaoa we yau we ewuwuapa I wemambiri we dewuta ra sisu awe nunei ria Menaing na pa. 13Anyau wetarai we piana yenyauwa we aupa, rua maitui. Nuari piyana pa na roao Kristus Yesusi na maitui kong anemuwiwu nyontarai. 14Na paya Duainunung Mamarang we nyaina tatapai, au bowawu piwe wewengpa we Allai rioaoa we aupa na pitarai.

15Au remuaroana we nyontarai endoaoa paya kuira na raora Asia pai piana empika yau eampa. Pigeriusi kong Hermogenesi asaru konta umpika yau.

16Mana Onesiporusi kong ne mandarongpai, aino etong aneurarongnei merarising pampang pa. Wo awe enai na wangka rarong pa ki, mana emamayawa we endama endewawa yau pa. 17Yana mameariwa, mana na awe donta ma dedu bendari Roma nei pa mamo, i dosaera we yerai yau ki dedu yau. 18Kong remuaroana we na Epesusi i piata yau kia. Wento Seni denyawa ne anewiwupa wei na a baba Seni diri nunei we kiutu kawio parari nyontarai ne tata pai.