1 TIMOTIUSI 6

Anyau parari woming paya kong ene tuang paya

1Nyontarai Keristeni we embe woming paya kuira, andi entuang we ene tuang paya, imbaromi nyontarai pa entatipa Allai anongpa pe ete tane anyaune pe. 2Woming we ene tuang wauya embe Keristeng pa mamo esanepapi ya pe. Mana andi embesarawiri ene tuang wauya na wemai kia, tutu tuang we embesarawiri yapa nyontarai endoaoa kong we esanewiwu ya.

Paulusi kewio parari nyontarai we etanyau pi maipa wa kong parari esanewe pe pa.

Pininapa kuira andi kowiora kong bonyauwa. 3Nyontarai pa matei denyau anyau pei ea raweing warui anyau yana pa kong rioao wa we anyau wemai we rana tane Sen Yesus Kristusi ma pa, kong dong parari anyau na agama tanenei wa, 4nyontarai toyana pai kewio barui, mana riunari pianea wa. Anetatuatapa piana maiwa, yerai we biateta nyontarai kong dong amuna parari kawio sosiau we donama nyontarai esanerarong keraria we nyontarai ea ya, embe marowa, entatipa nyontarai kong entubakepang nyontarai, 5nyontarai pa embemarowa waweria kio manaing na ea wa. Ya esaneaoa wa we etiri totoai we tarai pa kong totoai we sarara pa, yana pa parari nyontarai pei dewa ne wetaraipa warui ya. Ya etorato topino etanyau parari Allai pa mamo ingkai etadu pi barui pa kong kio piea we ya. 6Tarai we tasyomi we Allai memeari pa mae tasanetatuata we piyana maia to mamo tatadu wemai pa kia. 7Wo na awe tasua to nunei ma pa tangko pikatuyanei wa, toyana tato tangko pikatuyanea wa na awe tamati tori warui nuneipa! 8Impaina tatadu roweang pea kong asung pea mamo mawayana to. 9Mana nyontarai esane we ene pe pa barui pa mamo, mawa kia we ya entawa to pi sou ya pai ne paya pa kong pimamunapa santeta ya imbaro etong pimamunapa pitau ea kong piwe mai parari esanetatuatapa wa piyana pa dauya paina etadu we moyawa kong emanaing. 10Tutu nyontarai we anerarong pa dawia kia we dedu pe pa mamo ingkai nyari wemoya wa pa kia. Wo nyontarai pe embetotoi yati anemai mamo esamupa we pe impaina emunua anyau keresteni pai ea wa, interi ya etadu didiwa tau we dona esanerarongpa manaing.

Arera kuwuna

11Mana au wo Allai ne nyontarai di au, impaina andi au topira tori warui pitau yana. Bodawa kangkungna we moi na Allai renapa, we munuara we Allai, roao Kristusi, anemuwiwu nyontarai, anemuaiwarao uira we bodutapa, kong ponang we nyontarai. 12Werai kangkuna we bongparari Kristusi ne anyaupa na pitarai imbaro bowa wueng ki woroi-woroi wane. Wo yanapai Allai yau au weapa kong au roa na nyontarai we empau pa endena wau we roao Kristusi pa. 13Kong na Allai we dong asengpa we pitau nei renapa, kong Kristusi Yesusi renapa, we kewio na wetarai we Pontius Pilatusi pa, yeirorao pininane:1 14Bong parari airora yani na wetarai, na bong sarara wa, kio a we tane Sen Yesus Kristusi riataweri ma wane, 15aino awe Allai mantauni ingkai kiutupa. I memeari we mananu pa; Andi mei we tataparandini, tedai raweina kong we Mananu we mananu na nunei kong we Seni we seni na nunei kia. 16I meari ki we suang we kaida wadi wa, I nyaina wedea we ei kikeuwi wa. Nyontarai pei reoi na a pei wami kong tarai nyontarai ne endeoiwa. Kong I memeari andi tantuang wei pa kong we mananu ki woroi-woroi pa! Taraitoapeina.

17Buewara we nyontarai enepibarui na nunei nini, imbaro endeo emayasa pe kong endeo esanesara we pitau we wata woroi wa pa pe. Mana esanesara we Allai we dong pitau nei kiai weria we tamararisini. 18Topana weya imbaro etong wemaipa, esanerarongpai donung na pi mai pa, empata nyontarai pa matei tato kong embaramipa tapia pampinoma. 19Topiyana mamo ya endurikui ra weweng parari we aiwawera weya, na awe rama wane. Na toyanapa ya ingkai etadu embengki woroi-woroi pa. 20Hei Timotiuse, borara pitoai Allai rioaoa we au pa. Topiratori warui kawio we kakawiri pa kong mamarang wa kong warui marowa pa we rana nyontarai pa embetotoi entopana we “Pi tarai pina” mana piyana pa tarai wa, 21tutu nyontarai pe embetotoi ya etanyaua pa kong na toyana pa entapira warui Seni ne anyau we piana tandoaoa pa. Seni ne weweng dona pinoma pa derua mia!