1 TIMOTIUSI 5

Pitoai nyontarai tandoaoa ne tanari we tane neta paya.

1Nemeta we endoaoa paya, we embe paituang paya etosara piea mamo remo wua ya na raumpui erape mana wua ya na aiwara parari tamamui. Kong we aimiomang paya mamo wua ya parari nemeta mantaung, 2bongsaiwao wawing paituang paya we nyamui kong wawing waworu paya we nemeta maia, na anemurarong wemei.

Anyau parari kabong paya

3Mentuang we kabong we tarai embeng meari paya. 4Mana wawing kabong we ene kumai ete entapumi pa, mamo yatino retenang etanyau we embesarawiri mandarong mantau enempa wo, kong embai nyontarai paituang kong entapumi paya, tutu ai waua Allai anerarong pa. 5Topino wawing kabong we tarai meari pai, we piana ne mandarongpai empikari memeari, i anesara we Allai kong nukepana na tendau diru raida. 6Mana wawing kabong we anewe wieng na merarising pa, i wieng mana piana duainunungpai keda to. 7Borekamang pininane na jemaatinei tantenang, imbaro endeo etosara pianea pe. 8Mana nyontarai pa matei meidai dosaiwa neta aririra paya, kong mandarong mantau nembadi, i piana piora ne we rioaoapa kong i mioyawa raweing nyontarai we endoaoawa paya.

9Topino wawing kabong we etong parari anyau nini pai aino andi mentoikamang esanomipa we jemaati empata ya pa mamo, ya wo piana ene pudape piatoru, we endidau ene muang koiri. 10Kong nyontarai endearoang ya we anemai etong weweng, aino etongsaiwa ene kumai paya na wemai kio embaba, emarising empata nyontarai we endawu ene manupa ma pa, empata nyontarai we endoaoa paya, kong empata nyontarai we engkiari pi, kong emariwa kangkuna na mariwa we enari na wemai pa. 11Wawing kabong we embepaituang wa paya mendeo mentoi kamasa pe, tutu ya esanewe muang pa paya ea mamo empika Kristusi. 12Na toyana engko mambabati we enetaraipai tutu ya piana empora arera we etoni we Seni pai. 13Mae ya empika ene a pa na esua emati na nyontaraipa ene manupa, kong yanapa meariwa mana ya tato etanyau we engkangkani nyontarai esanomipa, kong esaro nyontarai ene kawio kong engkawio kawio wemai wa we andi engkawiora pa wa. 14Impaina, yau aneuwe wawing kabong embe paituang wa nea endidau ea, kong ene kumai mae endewari mandarong mantau enempa imbaro we embe marowa we tata paya etadu pianea we etona tasanomi moyawa pe. 15Wo wawing kabong peayati piana empikara warui Allai mae etua Nyombatangpai to. 16Impaina nyontarai wawing ete muang we rioaoa pei, na ne mandarongpai ei we wawing kabong mamo i andi piata ya, mendeo mempika jemaati wadi andi empata ya pe, imbaro jemaati paya empata kabong we embe rarowai paya.

Uara kong rang pe bototoiea

17We embedung na jemaati pa, we empata jemaati na wemai pa, mamo andi jemaati paya entuang weya kong etong wiwai weya. Retenang pa weengkawio kong etanyau paya. 18Wo, Weraung Mamarang kewio doyo, “Au remo bongwido sapi wedampi na awe etoni meriwa aepapa pasibupai warui rawongpai pe” kong “Nyontarai we meriwapai i dedu wiwai na piwe meriwa napa.”1 19Nyontarai pei subakepang we wedung na jemaati pei we dong sarara pi mamo, remo moraru roaoa pe, mana nyontarai pe umbe kodu ete itombetoru we itondekamana keto.2 20Nyontaraipei dong sasari mamo, andi wua nyontarai yani na jemaati paya endena wau, imbaro ea wauya ematai. 21Na Allai, Kristus Yesusi, kong mampang we diri yapa endenapa, yau yewara kangkuna imbaro au bongparari kamang we etopana we au waworu yana. Au andi bongparari kamang yana we nyontarai paya kuira kong boati rabuang. Mae na pitau bonapa remo anemo ei raweina warui ei pe. 22Remo wowoau we warangbawu nyontarai pei we wedung we jemaati pa pe. Wo topino nyontarai yani dong sasari pea mamo, ingkai au tato bodu ne sasari yani. Impaina bongsaiwa nentarai nemupai na wemai imbaro bong sasari pea wa.

23Mae remo bunung maria meari pe, mae bunung angguri katea tato imbaro piata anemu we yuipa we penang, wo we totoi ea mamo anemupai yui kong nemutaraipai wemambiri wa paina.

24Nyontarai pe embetotoi etong sasari pa na mararu tandeoa na wekakawiri, mana sasari na nyontarai pe embetotoi etanyuina kong tanduinariawa mana ingkai ra dea. Impaina ya menduwa ya wa we endu jemaatipai pe. 25Toyana tato piwe etona mai pa mararu we tandeoa, mana pi mai etonapa tato ya etanyuina wa.