1 TIMOTIUSI 4

Paulusi denyau Timotiusi we aneawario we etanyau we mai wapa

1Mana Duainunung Mamarang pai, sopang kamana kangkuna na awe rama wane, ingkai nyontarai peaya empora Kristusi interi etua duainunung weangkakari paya kong etongparari duainunung yani pai ne anyau pa. 2We etanyau anyau yani pai mamo nyontarai we embewasireri, ya etiri totoai we tarai pa kong we sarara pa wa. 3Ya esua nyontarai paya we endidau pe kong etang pampinong roweang we esauwa we embe tapua pa pe. Mana roweang pa Allai nyari we tatang na tatong piboki soa we Allai, na nyontarai we piana endoao Kristusi paya kong endearoang anyau wetarai na Allai pa. 4Tutu pitaubai we Allai nyaripa mai kong koiri tato wetapua wa, mamo aduta na topang piboki we Allai pa. 5Wo roweangpa kai mamo wetapua wa, tutu Allai ne Arera pa kong tandau tatoni pai dona mamarang to.

Mampata Kristus Yesusi we riupi na wemai

6Anyau we etopana yana pa bonyauwa pampang we wua nemeta endoaoa paya, na toyana pa au we mampata Kristus Yesusi we rupi na wemai di au. Kong piyanapa tato dong paya we au we roao Allai ne Kawio pa kong rukepana anyau we taraio we piana bongpararia eampa. 7Pika au warui arari piami we unawa pa kong piwe mai wa pa parari pitarai na Allai pa. Mae bonyau waweri au pampang we womi we Allai. 8Tatanyau tanetarai pai we piaya pa mamo weunapa maiyea, mana topino tatanyau tanetarai pai pampang we tatong parari Allai ne awiapa mamo weuna kia we pitaupa. Wo yanapa aino kio wemai pa we tata na a nini kong na awe rama wane. 9Kawio ninane tarai kong metaduta kai. 10Yanapa aidonane tasuira kong tasaneaera pampang we tasanesa Allai we wieng pai. Andi dong pariripa we kawasapai, retenang mamo we nyontarai endoaoa paya. 11Topana kong boirora taubai yana pa. 12Remo pika nyontarai pei yau au we moiape tutu au boba waworu paina. Mana anemuaerai we wepianyauwa we nyontarai we endoaoa paya, na kawio topana pa na piwe bonapa, na anemuwiwupa kong na nemu wemamarang pa. 13Ra sisu ingkai eramantupa au andi nukepana pitarai we boto Weraung mamarang pai we nyontarai paya, topana weya kong bonyau ya ki eramantu. 14Au remo porandeni bong parari paya Allai dona we aupa na awe penatua pa embarawawura au pa kong nabi paya piana entopang arera we rana Allai pararia we aupa pe. 15Bong parari piyana pa na pitarai imbaro nyontarai peaya endeo nemu roaoa pa we apai topong pa. 16Rentatua nemutarai pai meari kong rentatua nemu anyau pa. Anemukangkuna na taubai yana pa, tutu we bona yana pa ingkai poriri au kong nyontarai we entarao au paya.