1 TIMOTIUSI 3

Kamang we embedung we jemaati paya

1Kawio etopana nina tarai, aino matei doyo wewedung we jemaati paya mamo anewe piwe piboki pa kia. 2Impaina wewedung we jemaati pai mamo, topitotoi kia andi esanomi weng. I mamo wieng kong nukepana we ne wawin koiri ki, riukepang anerarong, anekurayang, meyoi na wemai, merarising demang nyontarai na ne manupai, kong anemanuainung we denyau nyontarai na wemai.1 3I wo nyontarai we reo deinunung barui wa, anewe doamuna wa mana menaang. I wo nyontarai kio madori, kong rewe pe wa. 4I riuwai ne mandarong we piau pai na wemai kong denyau ne kumai paya enukepana kong entuang esomi wei. 5Wo nyontarai pei riuwai mantauni ne mandarongpai wa, mamo topitotoikai riuwai Allai ne jemaati pai pae? 6Nyontarai we do wewedung we jemaati pai mamo piana rioao Yesusi pe manyonato imbaro reo deparandinipe, wo ingkai Allai dong mambabati wei parari pampong pa dong mambabati we Nyombatangpai pa. 7I tato andi anompa weng na jemaati na ri wanea, imbaro nyontarai pei reo dedu kawio pea we dona dintatipari we sawa to Nyombatangpai warararong pa pe.

Kamang we wepiata wewedung na jemaati

8Toyana tato we empata we embedung we jemaati wauya wo nyontarai we emai, impaina nyontarai entuang weya kong esanerarong mamarang; endewe pe wa kong esanewe etunung barui angguri wa. 9Ya wo endoao anyau Keresteng we piana Allai kemang kong endukepana pitarai na esanerarong we kakawiri. 10Impaina entou ya pampong wo, topino etadu ya etong sara pianea wa mamo, engkamang ya we empata na jemaatipai. 11Toyana tato we ene wawing paya, ya mamo andi nyontarai we emai impaina nyontarai esomi weya, engkangkani nyontarai wa. Ya andi endukepang esanerarong pai kong na pipatotoi ea nyontarai endoao ya. 12We piata we embedung we jemaati mamo andi wieng nukepana we ne wawini koiri ki. I andi riuwai kumai neng wauya kong ne mandarong wadi na wepiboki. 13Tutu nyontarai we empata na wemai na jemaati paya mamo, jemaat paya ingkai entuang weya kong na toyana pa empaya we entopang parari ene endoaoa we Yesus Kristusi pa na ematai wa.

Allai ne jemaati, wepiata anyau mamarang

14Aneusara we ingkai emararu we epaio au, toyana ki mana etoi arera ninipai tato we au. 15Impaina, parari yau emararu wa we eramantu wu au mamo, au piana remuaroana we topitotoi andi tambeng we mandarong Allai pa, aino Allai ne jemaati embeng di tata. Impaina tata wo tamparari riri we doa meitui tutu ne kawio pa. 16Seni piana yepa anyuing we aneaerai parari pitoai tandoaoa pa naina pei:

I denyawi netarai pai we nyontarai watang,

kong Duainunung Mamarangpai denyawia we I wetarai,

mae mampang paya endeoi.

Ne arerapa embuwua tatera na kawasa paya,

kong I endoaoi na nunei tantenang

kong Allai riuwai I wieita na ne deapai to rora-marising.