1 TIMOTIUSI 2

Parari tandau na jemaati

1Retenang peino yau yeirora au imbaro bonyau jemaati paya we etewara we Allai, entandau wei, entandau kangkuna we nyontarai eaya wei, entopang piboki we Allai we nyontarai paya kuira, 2entandau we mananu paya kong we nyontarai endu wang baba wetedai paya kuira, imbaro tambeng na wemai kong na wemadori kong imbaro tambe nadi we Allai parari pitoai anewea pa. 3Yanapa aino mai kong dong Allai tane Mampariripai anerarong merarising pa. 4I anewea imbaro nyontarai nea engkai etadu pariri kong endearoang we pitaraipa. 5Wo Allai pe koiri ki, kong we wemadu na Allai kong nyontarai ne tata pa koiri tato andino Kristusi Yesusi, 6we piana dong netaraipai we pika nyontarai nea engkai warui ene sasaripa: na toyanapa Allai denyawa we na awe ra mai na pa, I anewe nyontarai paya kuira etadu pariri pa. 7Kong yana aidonane Allai riuwa yau ewe rasuri we etopang Arera Weweng we nyontarai Yaudi wa paya, Arera wetarai parari Yesus Kristusi imbaro endoaoi. Pitoai etopana nina pa pitarai pina, eweangkari wa.1

Parari nyontarai muang kong wawing na jemaati entandau pa.

8Yau aneuwe imbaro naina totoi ea mamo muang wauya entandau na esanerarong we mamarang, engkayou wa ete embemarowa wa. 9Kong wawing paya esauma enetaraipa na kakaira kong esasung asung we una. Ya esu endukamipa na wemai kong emaranding endukamipa na pimaranding we mayea pa kong esasung asung we embowa na arga pa tadai pe.2 10Mana wawing paya andi emaranding ya na enari piwe maipa, parari wawing we yesuni na wemai doyo tendau we Allai pa. 11Na awe muang paya etoa etanyau na nadi rarong pa, wawing paya entuang weya kong engkawio wa mae entaraoa toyana. 12Yau eroa we wawing paya we etanyau wa ete etairora muang paya pe, mana ya aidisa ki. 13Tutu Allai samu Adami pampong, interi Hawai.3 14Kong Adami di Nyombatang weangkaripa wa mana Hawai, impaina sarobang Allai ne uara pa.4 15Mana wawing wadi ingkai dedu pariri tutu dawing kumai, aino anerarong weng kong rioaoapi Kristusi mae aneo nyontarai pea weiya kong embeng na wemamarang we Allai ki.