1 TIMOTIUSI 1

Tabea

1-2We Timotiusi, neu kumai mantau na Seni, wo roao Yesusi mai parari yau paina!

Arera nini pai napei yau Paulusi, rasuri we Kristus Yesusi. Ewe rasuri ne mamo tutu Allai tane Mampariri pai ne airora pa, kong Kristusi Yesusi tane Seni we tasanesari pai ne airorapa.

Yai Allai kong Kristus Yesusi tane Seni umuangso au, urong au bodu une weweng urona pinoma pa kong urong au bodu une madori pa.1

Anyau we mai wa

3Awe yo eratopong to raora Makedonia, yau yeirora au waro nuai na Epesusi kong wua nyontarai embetotoi na yana paya, imbaro endeo etanyau anyau wetarai wa pa eampe. 4Kong topana weya imbaro endeo esuwa endukami we arari mai wa kong parari ene mandarong wia na ene woriaipai we menaing wa pe. Taubai yana kio marowa, kong dongwido Allai ne awia we tandearoni tera na tandoao Yesusi Kristusi pa. 5Impaina anyau yoyo au topana toyanapa, imbaro jemaati paya esanewiwu oya na esanerarong we mai, na esanerarong we mamarang kong endoao Seni na wepitarai. 6Mana nyontarai peayati etua anyau wetarai pa wa kong engkonta engkawio kawio piwe unawa pa. 7Ya wo etoyo embe kuru akama Yaudi pa mana kawio etopana pa kong engkawio kangkuna we kawio pitarai pina pa, mantau ya esaneatori wa.

8Tatawo tasaneaoa we Kawio we Musai soi pa weng kia, imbaro tatong pararia na wetarai. 9Tata tato tasaneaoa we nyontarai endoaoa paya Allai dong mambapai wa, mana Allai dong mambapai we nyontarai entatipari kong we nyontarai embateta Allai paya. We nyontarai esomi we Allai wa paya kong nyontarai etong sasari pampang paya. We nyontarai etong amuna paya kong nyontarai entuang we Allai wa paya. We nyontarai emung entamami kong esinyami paya kong emung nyontarai eaya wauya pa, 10we nyontarai emaninyawari paya, we muang we emaninyawari waweriao yapa, we entapu nyontarai we embo ya, we embeangkakari, we empangpang kawio, kong nyontarai pa mateiea we etong piwe maiwa we soraweing anyau we tarai pa. 11Anyau nini napei Arera Weweng we ra na Allai we dea wieia kong nyontarai nea etaparandini pai. Anyau yani I rioaoi we yau we embuwua.

Paulusi sopang piboki tutu Allai ne weweng pa.

12Yau yewa piboki baba mantaung we Kristusi Yesusi tane Seni. Tutu I piana dong paya we yau ewemampata we I, kong diri yau kong I rearoang yau we emai eru mariwa nini pai, 13Awe rampa yau wo nyontarai we etatipa Kristusi kong yau tato nyontarai we engkangkani nyontarai we endoao Kristusi paya kong yau tato nyontarai yemamunai we nyontarai endoaoa paya. Mana Allai dong ne weweng baba raweina pa we yau, tutu na a yani eroaoi wami, impaina eruinari piwe yonapa wa.2 14Mana tane Seni denyawa pampang ne weweng dona pinoma we yau, donane eroaoi kong aneuwiwu we nyontarai ea na Kristusi Yesusi. 15Kawio we yo etopana nina tarai kong tasanekakepana aiwara: “Kristusi Yesusi riato nunei ma we periri nyontarai we etong sasari paya,” kong naina ya engkai mamo yau yong sasari raweina pa. 16Mana toyanapa yedu weweng babaraweina na Allai, imbaro na yau nyontarai we ewesasari raweina pai, Yesusi Kristusi denyawa aneaiwari pa. Kong yau ewekamang na nyontarai we ingkai endoaoi paya kong etadu embeng ki woroi-woroi pa. 17Impaina Allai we Mananu we pitawa pai, meari andi tantuang wei kong tataparandini pampang pa! I mamo Allai we wieng kio woroi-woroi, mae tandeoi wa kong I meari we Seni pa. Taraitoapeina.

Mariwa we Timotiusi

18Timotiusi neu kumai pa au, mariwa nina yona we aupa, parari pitoai nabi paya piana engkawio kakera parari aupa. Imbaro na kawio kakera yana pa, au bomuna era tutu amuna we weng pa na anemurarong we memarang kong na anemurarong we mai. 19Nyontarai pe embetotoi piana entampi esanerarong we mamarang pa impaina endoaoapa nai, 20na ya mamo Himeniusi kong Aleksanderi asaru tato. Nyontarai ni asaru piana yong mambabati we asaru na yong asaru wu nyombatangpai, imbaro uranyau we umanaing warui ungkangkani Allai pa.