Alkitab Bahasa Ansus
2 Tesalonika 3
Tandau kong mariwa
Interi manetapa mia mentandau we antoru, imbaro Seni ne Arera pa mararu topong kong nyontarai we entaraoa paya etaduta na wemai kong esomi wea, parari we piana tawa na mene madu kuira pa, mentandau tato imbaro Allai periri ama warui nyontarai etong amuna paya kong we etong wemoyawa paya. Wo nyontarai nea engkai wa we endoao Seni ne arera pai. Mana Seni wo nukepana. I ingkai dong mesanerarongpa paya kong dewu mia warui mamunapa. Kong antondoaoa na Seni, we pitoai antorekamana we mia pa, metong pararia kong ingkai metong pararia rai. Antorewara wengki Allai dinti mia pampang kio mesaneao topitotoi I anewiwu miapa, imbaro mesaneaiwara na uira we metadutapa, parari Kristusi we aneaiwara na uira we piana deduta pa yana. Mana antoru, antorarekepana we manetapa mia, na Sen Yesus Kristusi anongpa, imbaro mentapira warui meneta we emaidai enari ene mariwapa mae we empika anyau we piana metaduta na ama pa. Wo mantau mia mendearona, topitotoi andi metong parari antorongtoapa, tutu antomararua wa we antomariwa na mene madupa, kong antorang nyontarai ene roweang pa na antombaita pawa, mana diru raida antongkai awiang, imbaro antondeo antorong didiwa we nyontarai pei tato na mia pe. Antonari toyanapa mamo tutu antone haki pea wa we antorewa piea na mia toyana pa, wereria! mana pitoai antonari ne antosane we antosane anyawa we mia na pitoai antonaripa. Wo na awe antonai kong mia na mene madukuirapa tato, antorong uara nini pai we mia: nyontaraipa matei meidai meriwa mamo reo dampi pe. Antotopang ninane tutu antotaraoa we nyontarai peaya we embengpa embakakaiya kong emaidai emariwa, mana esamupa na piwe unawa. Nyontarai we entoyasa antosua ya kong antoranyau ya na Sen Yesus Kristusi, imbaro ya aidisa mae enari mariwa enempa kong na toyanapa etadu roweang we mantau ya etang. Mana mia mendeo mempowe metong wewengpa pe. Nyontarai pei meidai tarao pitoai antotopana na weraung nini paipa mamo, mengkamani kong mendeo mempandura kongti pe, imbaro i memaya, mana mendeo metoni parari mene marowa pe, mana mesuari parari meneta.
Tabea
I, Seni we madori piboki pa rana peima pai, topino dona we mia madori piboki pa pampang, na pipatotoi ea. Seni derua mia kuira. Tabea we rana yau, Paulusi. Tabea nini etoi na mantau waraune. Pi nina pai we kamang na weraung we etoipa kai.
Topino tane Sen Yesus Kristusi dong ne weweng dona pinoma pa we mia kuira.
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.