Titusi 1

Tabea

1Wu neu kumai Titusi au. Weraung nini na yau Paulusi, woming we Allai kong rasuri we Kristus Yesusi. Allai diri yau kong demi yau we epata nyontarai Allai diri ya eampa ya, imbaromi endoaoa pa maitui. Yau tato epata ya endearoang anyau wetarai pai imbaro esomi we Allai na wemai, 2mae esanesara we ingkai etadu wieng ki woroi-woroi pa. Wieng ki woroi yanipai Allai piana derekamana na awe nyari nunei wami, we ingkai nyontarai ne tataduta kong piyana pa Allai weangkari wa. 3Na awe Allai aneweapa, I piana denyawi na ne Arera pai na Arera Weweng pa wu tata ma. Arera Weweng yani pai Allai, tane Mampariripai rioaoa wu yau kong demi yau ewuwua.

4Tituse au, eyau au we neu kumai di au tutu roao Kristus Yesusi mai parari eroaoi pa. Yai Allai kong Yesus Kristusi, tane Mampariri pai urong une weweng urona pinoma pa wu au kong urong au bodu we madoripa kong untinti au.1

Paulusi denyau Titusi parari mariwa riu na nu Kreta pai.

5Yau yong au naina nutakutu Kreta pai imbaromi au nuari mariwa we unaria kaipa wa, we andi nuari pararia ra mai. Kong we imbaromi au ruwa nyontarai peaya we embedung we jemaati paya na bendaripa kai. Kong remuaroang pitoai yerera we aupa nina aino: 6We embedung we jemaati paya mamo enari pisarara pa wa, endidau mamo ene wawing koiri ki, ene kumai paya endoao Kristusi to, kong nyontarai peaya entubakepang ya tutu enari piwe maiwa pa, ete embengpa emaidai etong parari we piyana pa.2 7Wo we embedung we jemaati paya mamo, Allai rioao ya we eteung jemaati paya. Impaina enari pisarara pa wa, esanerarong tedai wa, engkayou pampinoma wa, etunung emaeru wa, emarowa wa kong endewe pe wa. 8Mana embarami pa tapia we empata nyontarai, emararising we enari pi wemai pa, esanekurayang, esanerarong wemai, esanerarong memarang, kong endearoang enetarai pai. 9Endu kawio wetarai pa na maitui, parariapi anyau we piana tatanyauwa weya pa, imbaromi ya empaya we etanyau nyontarai parari anyau yana kong empaya we engkawio kangkuna we nyontarai we entatipa ya pa. 10Tutu nyontarai pa empau entantipa wemai pa kong embuwu kawio wetarai pa wa, retenang pei na nyontarai we endu mamba parari sunati paya. Na kawio entopang pinomapa ya embeangkari nyontarai peaya. 11Nyontarai toyana paya andi mia mengkawung esorengpa, tutu ya etauamuna we mandarong pitau na anyau wemai wa. Enari toyana we etadu pi we kio mamaya pa. 12Nyontarai pei na ya, esawi we ene nabi dina, iwo na nu Kreta pai, na pampong sopang parari ya doyo, “Nyontarai Kreta paya mamo embeangkari barui, emparari piaung emamuna we etampi barui kong emaidai endupi.” 13Pitoai nabipai sopana pa tarai, impaina wua ya na kangkuna, imbaro ya endoao anyau wetaraipa na maitui 14kong endeo endu Yaudipa ene arari we maiwapa pe ete mambao nyontarai we embateta anyau we taraipa enaripa pe. 15Wo we nyontarai esanerarong pai mamarang paya pipatotoi kia enari pa mamarang. Mana we nyontarai engkararia paya kong endoaoa wa paya pipatotoi kia enaripa mamarang wa, tutu esanerarongpa kong esanetatuata pa kararia. 16Ya endeo endoao Allai mana na pi enari pa, denyawa we ya empampora I. Ya engkararia kong entuang we Allai wa kong empaya wa we enari pi we mai pa.