Titusi 2

Anyau we paituang paya, aimomang paya kong woming paya parari pitoai enari pa.

1Mana Titusi au mamo andi bonyau anyau wetarai pa. 2Bonyau muang we embe paituang paya, imbaro endeo etongpampinong ya pe, ya esanekurayang, embeng na wemai imbaro nyontarai esomi weya. Endoaoa na wetarai, na esanewiwu nyontarai kong esanerarongpa maitui na etadu didiwa pa. 3Toyana tato we wawing embe paituang paya, bonyau ya imbaro na embengpa esomi we Seni. Endeo engkangkani nyontarai pe, etunung barui angguri pe, mana ya andi emainuanung entanyau pi wemai pa 4kong na toyana pa, ya empaya we etanyau wawing emaiyea pa we esanewiwu ene muang paya kong ene kumai paya, 5esanekurayang kong embe mamarang, entongsaiwa ene mandarongpai na wemai, entuang we ene muang paya. Na toyana pa nyontarai peaya engkangkani Allai ne Arera pa wa.

6Toyana tato we aimiomang paya, bonyau ya imbaromi empaya we entampi wemoya wa pa. 7Kong au tato andi we pianyawa na wemai weya na pitoiai nuaripa. Bonyau mamo bonyau na pitarai kong na anemurarong wemai. 8Bonyau tera pi kawio wetarai pa imbaro nyontarai embemarowa we aupa paya emamaya tutu ya etadu pisarara pea we engkawio wemoyawa parari tata wa.

9Woming paya bonyau ya we andi esomi we ene tuang paya, kong etong ene tuang paya esanerarong pa merarising na pipatotoi, ya embateta ene tuang paya pe. 10Endeo emanana ene tuang pa pienempa pe, mana ya enukepana na wemai kong entuang we ene tuang paya. Imbaro na toyana pa nyontarai neya kuira entaparanding Allai, tane Mampariri pai ne anyau pa.

11Tutu Allai ne weweng dona pinoma we periri nyontarai neya kuira pa piana denyawa to. 12I denyau tata imbaro tampika weunawa pa kong pi nunei ne awiapa kong imbaro tambengne tasanekurayang, tasanerarong mei kong tasomi we Allai meari na nunei nina pa. 13Kong tasanesara na maitui tatamang we a Baba Memarang pai, awe tane Mampariri Yesus Kristusi, aino Allai we Beba raweina pai, teweri to nunei na ne dea wetedai rarong pa emapa. 14I andi dong netaraipai we tata we periri tata tangkai kuira warui tane sasari wemoyawa pai kong nyari tata tamamarang kong riuwa tata we ne kumai kong tantapira pitarai we tanari piwe maipa.1

15Topang piyanapa kai, bonyau kong wua nyontarai paya parari mambiri we boduta pa. Bong parari piyanapa na wemai imbaro remo nyontarai pei anepapi au pe.