Alkitab Bahasa Ansus
Titusi 3
Arera we wepuipa
Kowio kangkuna we jemaat paya imbaro ya entuang we weembedung na parenta pai kong we weendu anong mananu paya, entuang weya kong enari mariwa weweng pa. Engkangkani nyontarai pe, etong amuna pe, mana ya esanerarong weng we nyontarai paya kuira. Tutu pampompa tata tato tambeng na wetata pa, tantuang we Allai wa, tandoao pi wetarai pa wa, tamirising we tanari pi weunawa pa, tasanetatua pi wemoyawa pa, tantatipa nyontarai. Mana Allai, tane Mampariripai denyawa we tata anewiwu pa kong anerarong weng we nyontarai ne tata pa. I periri tata pa mamo tutu tatong wetaraipa wa, mana tutu mantauni ne anewiwu tata pa. I periri tata na Duainunung Mamarang pai ne mambiri pa, kong dupipi tata, dong tata tampika tane wemoyawa pa, kong tamparari kumai we etawing ya embaworu. Na pitoai Yesus Kristusi tane Mampariripai nyaripa donane Allai dong Duainunung Mamarang pai we tata, imbaro na Allai ne weweng dona pinoma we tata pa, tane haki we tatadu wieng ki woroi-woroi pa, parari we tasanesara pa. Kawio nina pa wetarai impaina yoyo kowio kangkuna, imbaro nyontarai we piana endoao Allai paya etongsaera kangkuna we enari mariwa weweng pa. Yanaino weng kong mai we nyontarai nea kuira pa. Mana pika nemutaraipai warui kawio we kio amuna we maiwa pa, kong warui arari parari ene mandarong pai riana mapa, warui marowa parari Kawio Musai soi pai, tutu piyana pa mai wa kong kio piwe mai pea wa. Nyontarai we dona mamo jemaati paya entatipa ya pa, andi bonyau nyontarai yani, we retenang, we kodu tarao au wa mamo pika nemutaraipai warui i. Remuaroana we nyontarai toyana pai tarai ria arara pa to mae na ne sasaripai kio mambabati pa we netaraipai.
Na awe yemi Artemasi ete Tikhikusi dontara dedu aupa mamo, bosaera we bonta we yau to bendari Nikopolisi ema, tutu ekutua we enai na nu yani pai na awe wanang wiaera ne aidu pai nini.1 Bosaera na kangkuna we puata Senasi, nyontarai anemanuainung na mambapai kong Apolosi asaru na awe uronta pa, imbaromi uradu aseung pea wa mana uronta na wemai.2 Kong bonyau tane nyontarai paya imbaro etosaera we enari mariwa we maipa we empata nyontarai eaya we ene pianeawa paya, imbaro remo ene embengpa weunawa pe.
Tabea
Neta we enai kuira kong yau na nina neya etong tabea we au kong topana we neta we tandoaoa kuira paya, we esanewiwu ama paya we amatong tabea weya tato.
Wento Seni dong ne weweng dona pinoma pa we mia.
Source notes (2)
- Cross-reference Kis. 20:4; Ef. 6:21-22; Kol. 4:7-8; 2Tim. 4:12
- Cross-reference Kis. 18:24; 1Kor. 16:12
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.