Carolok 22

1Yer bedo ki nying maber, pien en aye ber kato lonyo madwong, dok pwoc ma dano gipwoyi kwede ber loyo ryal nyo jabu.

2Pe tye apokapoka ikin lalonyo ki lacan, pien Rwot aye mucweyo gin aryonu ducu.

3Dano ma wiye tiyo ka oneno gin ma rac bino ikome, kane woko; ento lakwiya piny mede mere ameda, ci neno can ada.

4Mot ma dano limo pi bedo ki mwolo ki pi lworo Rwot, en aye lwak lonyo mapol, woro kacel ki kwo.

5Okutu ki owic tye i yo pa jo mungak: ento ngat ma gwoko kome pe biwok i yo meno.

6Pwony latin con ma nongo en pud tidi kit yo ma myero en obed kwede, ci ka en odongo pe biweko lubune.

7Ngat ma lacan bedo ite loc pa dano ma olony, ki ngat ma deno lim bedo opii pa won lim.

8Ngat ma timo tim bwami limo can keken, dok tim me gerogi bidoko gin ma konye peke.

9Ngat ma wange leng ikom dano bilimo gum ma a ki bot Rwot, pien en poko came mogo ki lucan.

10Ryem ngat ma lacac woko, ci lweny bene bibedo peke boti, dok daa kacel ki anywar bene bigik woko.

11Ngat ma bedo ki lengcwiny, ma loko lok maber me kica, bibedo larem rwot.

12Rwot gwoko jo ducu ma gitye ki lok me ngec maber, ento en bolo yub pa jo ma gungayo wange woko.

13Ngat ma lawackom bedo mere mot paco, en waco ni, “Labwor tye woko, ka akato miyo bineka woko iwanga yoo!”

14Lok pa dako ma lakwele obedo calo bur matut; ngat ma kiniga omako Rwot ikome bipoto woko i bur meno.

15Mingo aye gin matye i cwiny latin matidi, ento ka ipwonye ki odoo, ci mingo a woko ki bote.

16Ngat ma diyo lucan ni wek lonyone omede, nyo ma miyo jamine bot lulonyo keken, bidoko lacan.

Lok pyere adek me ryeko

17Cik iti iwiny lok ma luryeko guwaco, dok myero iket cwinyi ikom ngec ma apwonyi kwede. 18Ka igwoko lok magi i cwinyi, ci bedo ber matek; kace ibipo ikomgi ci ibibolo lok ikomgi ikare ma mite. 19Dong amito ni igen Rwot, en aye gin ma omiyo atito lok magi boti tinni. 20Atyeko coyo lok abola pyere adek kun amiyi tam ma beco kacel ki ngec ma oromo, 21pi nyutu boti gin ma atir dok ada, wek in bene idwok lok ada bot jo mucwali.

Lok mukwongo me ryeko

22Pe myero i yak jami pa lacan ni pien en lacan mamwa, nyo kadi me tic ki anywar ikom jo ma gitye ki can i kabedo me ngolo kop; 23pien Rwot bipido pirgi, bineko jo ma guyakogi woko.

Lok me aryo me ryeko

24Pe myero i mak larem ki dano ma kiniga mako oyotoyot; dok pe myero i wot kacel ki dano ma cwinye opong ki akemo tutwal, 25weko ibilubu kite ducu ci imoko i owic.

Lok me adek me ryeko

26Pe myero ibed ngat acel ikom jo ma gijengo jamigi, ma gicung pi jo ma lubanya. 27Kace pe itye ki gin mo ma myero icul kwede banya, ci kimayo kitandani ma ibutu iyeni woko.

Lok me angwen me ryeko

28Pe myero ikob got macon ma poko wang lobo mayam kwariwu dong gutyeko ketone.

Lok me abic me ryeko

29Itye kaneno dano makwiri i tice? En bibedo katic wa inyim luker; pe bitic inyim dano atagu.