Carolok 23

Lok me abicel me ryeko

1Ka ibedo kacam kacel ki rwot, myero iteme tutwal me keto woro ikome; 2kace ineno ni in lacam malac, ci omyero inen ni icamo kun iporo. 3Pe myero imwony laa pi came makur, mogo nongo tye katemo cwinyi.

Lok me abiro me ryeko

4Pe myero inek komi tutwal katiyo tic ma okato lacu ni wek inong lonyo; bed ki ryeko ma oromo weko itiyo kun iporo. 5Pien kare me rwenyo pa lonyo peke, ka iloke manok, ci inongo ni otyeko tuk orwenyo woko macalo ocur ma kemo polo.

Lok me aboro me ryeko

6Pe myero icam kwon pa dano ma ladur; pe i ket cwinyi ikom came makuri. 7En nongo tye kaparo pi wel came ki i cwinye.1 En waco ni, “Cam dok imat ba!” Kun nongo cwinye pe mito. 8Ka iniang tam me cwinye ci ibingoko kwon ma icamoni woko liweng, dok bibalo loki mamit ma i loko botegu ducu.

Lok me abongwen me ryeko

9Pe myero ilok lok me ryeko bot ngat ma laming, pien en pe twero niang ber pa lok ma iloko bote, cayo mere acaya keken.

Lok me apar me ryeko

10Pe ikob got macon ma poko wang lobo nyo kadi donyo i poti pa jo ma won gi peke; 11pien Rwot ma lacungudwargi tek; en bipido pirgi kwedi, ci miyo lok loyi.

Lok me apar wiye acel me ryeko

12Ket cwinyi me winyo pwony ma ki pwonyi kwede, cik, iti bene me winyo lok me ngec.

Lok me apar wiye aryo me ryeko

13Pe ikwer pwonyo latin wek obed ki kit maber; ka igoye ki odoo pi pwonye pe bimiyo en to. 14Kace ipwonye kun igoye ki odoo kitmeno, ci i bilaro kwone ki i to.

Lok me apar wiye adek me ryeko

15Latina, kace ibedo ki ryeko i cwinyi, ci an bene cwinya bibedo yom. 16Abibedo ki yomcwiny ki tipu koma ducu, ka onongo iloko gin ma atir.

Lok me apar wiye angwen me ryeko

17Pe myero ibed ki nyeko i cwinyi ikom lubalo, ento mede ki lworo Rwot nino ki nino. 18Adada kwoni matye anyim bibedo maber, dok geni bene pe kibibalo woko.

Lok me apar wiye abic me ryeko

19Latina winy loka, wek ibed ryek, dok iket tami pi lubu yo ma mite. 20Pe ibed ikin jo ma gin lumero ki kongo bwino, kadi bedo ikin jo ma luworo ma gin lucam ringo; 21pien lumero kacel ki luworo gibidoko lucan. Dok ka imaro cam ki nino keken ci ibiruku bongo ma oketoket.

Lok me apar wiye abicel me ryeko

22Winy lok pa woru ma onywali, dok pe myero i caa meni ka dong otii. 23Teme me bedo ki ada, ryeko, pwony, ki niang maber; ci inen ni pe ibologi woko. 24Latin ma kite atir miyo wone bedo ki yomcwiny madwong; ngat ma onywalo latin maryek bedo ki yomcwiny pire. 25Wek woru kacel ki meni gubed ma cwinygi yom, wek meni ma onywali obed ki yomcwiny.

Lok me apar wiye abiro me ryeko

26Latina, ket cwinyi ka mako lok ma awaci, dok inen kit kwona ducu wek obed lanyut ma biteli.

27Dako ma lakwele obedo bur matut; en tye wang it mading. 28Dakonu kane woko pi libo dano calo layak, dok en medo wel co ma gungayo wang Rwot doko dwong ikin dano.

Lok me apar wiye aboro me ryeko

29Abinyuti jo ma gitye ki can ki cwercwiny. Abinyuti jo gilaro lok ma gidaa matek. Abinyuti jo ma gilimo ret pi lweny ma wanggi ocek makwar. 30Meno aye jo ma girii kamato kongo bwino pi kare malac, ma gicito kamato kongo bwino ma kirubu makec. 31Pe imat kongo bwino ka dong odoko kwar, ma nongo tye karyeny aryenya i kikopo, dok donyo mapwot i i ngat matye kamatone. 32I agikine kayo i dano calo twol, kayo calo twol ororo matye ki kwir marac. 33Wangi bicako neno jami mapat mayam peya inenogi, dok pe ibitwero tamo kadi ki loko gin mo ma atir. 34Ibibedo calo ngat ma obutu piny idye nam, calo ngat ma oito malo iwi wir me mel. 35Ibiwaco ni, “Kigoya, ento pe alimo ret mo; kigoya, ento pe awinyo arem mo wa ki acel. Abico awene? Abicito kamato kongo bwino mukene dok aye.”