Carolok 24

Lok me apar wiye abongwen me ryeko

1Pe myero nyeko omaki ikom jo ma gin lutim maracu, dok pe imar ribe kwedgi; 2pien tamgi ducu opong ki lok me tim bwami, ma nongo giloko lok ma keto can keken ikom dano.

Lok me pyere aryo me ryeko

3Ot ki gero pi ryeko, dok pi niang matut miyo cung matek liking; 4pi ngec ma dano moni tye kwede miyo pongo ode ki kit jami mabeco me wel ki lwak jami ma yomo cwiny.

Lok me pyere aryo wiye acel me ryeko

5Bedo ki ryeko ber kato bedo ki tekkom, jo ma gitye ki ngec bene gitwero cobo tiyo jami madito makato jo ma gitye ki teko. 6Kace itye ki lumii tam ma luryeko ci miyo itwero lweny maber, dok winyo tam mabeco ma dano gimiyo boti miyo iloyo lweny.

Lok me pyere aryo wiye aryo me ryeko

7Jo ma gin luming pe gitwero niang lok me ryeko kadi ki acel, pien tye malo tutwal ki tung botgi; pe gitwero waco lok kadi ki acel ka kitye kalaro lok ma pire tek.

Lok me pyere aryo wiye adek me ryeko

8Ngat ma bedo ki tam me timo gin marac ki lwonge ni lakelayela. 9Tam ma laming tamo bedo bal keken, dano ducu gidag ngat ma langala.

Lok me pyere aryo wiye angwen me ryeko

10Kace cwinyi odoko nyap ikare ma ayelayela tye, ci tekoni nongo nok adada.

Lok me pyere aryo wiye abic me ryeko

11Omyero ilar kwo pa jo ma kingolo to iwigi labongo bal mo; lar kwogi ka kiywayogi me atera i kabedo me nek. 12Kace iwaco ni, “Nen, wan onongo pe wangeyo loke,” ento itamo ni Lubanga ma neno cwiny danoni pe biromo niang? Itamo ni en ngat ma neno kwowuni pe ngeyo? Itamo ni en pe biketo can ikom dano acel acel ma poro kit gin ma en otimo?

Lok me pyere aryo wiye abicel me ryeko

13Latina, cam moo kic, pien ber, dok moo kic ma cwer ki i pedakic lim matek ka ibilo. 14I yo acelu, ryeko bene tye kitmeno pi kwoni; kace inongo ryeko, ci ibedo ki gen ni kwoni me anyim bibedo maber, dok geni pe bigik.

Lok me pyere aryo wiye abiro me ryeko

15Pe ikane inget ot pa dano ma kite atir pi time rac; pe myero itim bwami ikom gange; 16pien dano ma kite atir kadi opot piny tyen abiro, dok pud twero a malo aye; ento ka can opoto ikom jo maracu ci tyekogi woko liweng.

Lok me pyere aryo wiye aboro me ryeko

17Pe ibed ki yomcwiny ka ineno lakwori opoto i can, dok cwinyi pe obed yom ka ineno en yoke atata; 18pien Rwot bineno gin ma itimo, ci pe biyomo cwinye, ci miyo kwanyo kinigane woko ki ikom danoni.

Lok me pyere aryo wiye abongwen me ryeko

19Pe myero cwinyi ocwer pi jo ma gin lutim maracu, dok pe ibed ki mone ikom jo maracu; 20pien dano ma latim marac pe tye ki gen pi kwone pi kare me anyim; bitum woko calo tol tara ma lyel tum woko.

Lok me pyere adek me ryeko

21Latina, lwor Lubanga dok ilwor rwot bene, pe myero ijem ikomgi. 22Ka ijemo ci gibiketo can ikomi oyotoyot; dok anga ma ngeyo kit can ma bia ki bot Lubanga nyo ki bot rwot?

Lok mukene me ryeko

23Magi bene obedo lok mukene ma luryeko guwaco:

Ngolo kop makun ilenge ikom ngat acel obedo gin marac. 24Ngat ma biwaco bot dano ma labal ni, “Pe itye ki bal mo kun bene gonye woko,” kibicene dok jo ducu bikwere woko. 25Ento lungolkop ma gimiyo pwod ikom lutim maracu gibibedo ki yomcwiny, dok gibilimo gum maber makato ducu.

26Ngat mamiyo lagam ma atir meno aye larem me ada.

27Mukwongo, kong ikwong tiyo tici matye woko, pur poto dok ipit iye ginapita ducu ma mite; ka lacen dong icak gero odi.

28Pe ibed caden ma lagoba ikom lawoti ma pe ki bal; pe myero ibwol dano ki lok gobagoba. 29Pe myero iwac ni, “Abitimo gin ma en otimo ikomani bene ikome; abiculu wang gin ma dano meno otimo.”

30Awoto akato ki inget poto pa dano ma lawackom, ki inget poto olok pa dano ma wiye oding; 31nen, potone ducu obake ki okutu keken; doo ayila oumu ngom woko, cele ma kigero ki got bene omuk orete woko piny. 32Ka aneno ci abedo ki tam matut pire; aneno dok omiya pwony madit. 331Ka ibutu inino manok, dok idolo cingi woko kayweyo, 34ci can bimaki macalo layak ma mako dano, ma oruke woko ki jami lwenye ducu.