Carolok 25

Carolok mogo ma Solomon oloko

1Lok magi aye carolok pa Solomon ma lucoc pa rwot Kejekia gucoyo i buk.

2Kimiyi deyo bot Lubanga pi jami ma en okano woko i mung ma pe nen, ento kimiyo deyo bot luker pi nyutu telok woko bot lwak kamaleng.

3Pe itwero ngeyo gin ma rwot tye katamone, pien tame bor calo polo, dok tut calo pete te lobo.

4Ka kiliyo ryal maber ce kikwanyo cete woko liweng, ci latet ryal twero yubu kwede gin mo ma munya maber. 5I yo acelu, ryem lumiitam maracu woko ki inyim rwot, pien bedo ki kit ma atir miyo komkere cung matek. 61

Pe ikete keni me bedo dano madit inyim laloc, dok pe myero ibed i kabedo pa jo madito. 7Pien bedo ber makato ka ki waci ni, “Bin malo kany i kabedo pa ludito,” ber kato ma ki dwoki i kabedo ma piny ma nongo kun itye inyim laloc.

8Pe myero ikel adot ikom gin ma ineno ki wangi oyotoyot inyim jo me otkot. Kace ngat mo mukene ma oneno gin acelu okelo lok ma pat ci ibitimo ango?

9Ka lok mo tye ikin in ki lawoti, myero wutyek loke ikin wun aryoni; wek munge pe otuc bot jo mukene. 10Wek pe omii lewic omaki, miyo nyingi bibale woko matwal. 11Lok ma kiloko kakare obedo calo jabu ma kimwono ikom ryal. 12Pwony ma laryeko juku ki dano ma winyo pwony ber makato gin mo me jabu ma kiyubu me deyo kom dano.

13Lakwena ma gene kweyo cwiny jo ma guore calo pii ma ngic ikare me kac; en kweyo cwiny ludito ma loye kumeno.

14Dano ma nyate ki mot ma en pe twero miyone obedo calo pol ki yamo ma bino labongo kot mo.

15Diyo cwiny ki loko lok mot ki mwolo twero loko tam pa laloc dok miyo iloyo lok mapol kadi ka tek calo ngo.

16Kace inongo moo kic, cam maromo ii keken, pien ka icamo ma okato kare miyo ingoko woko. 17Pe ibed kawot me limo lawoti i ode kare ki kare, miyo en biol woko kwedi ci cako kweri woko.

18Lacaden ma tito lok goba ikom lawote obedo macalo odoo me lweny, nyo pala lucwan, nyo atero mabit.

19Bedo ki gen ikom dano ma pe gene ikare me ayela obedo calo cam ki lak marem, onyo wot ki tyen ma ongol.

20Ngat ma wero wer bot dano matye ki kumu mapek i cwinye rom ki ngat ma okwanyo ginaruka woko ki ikome inino ma piny ngic, dok tye macalo kado ma kiketo iwang bur. 212

Ka kec neko lakwori, miye kwon ocam; dok ka orwo pii neke, miye pii omati. 22Ka itimo kumeno, ci ibicoko lewic ibako iwiye, Rwot bene biculi pire.

23Yamo ma kodo a ki tung kumalo kelo kot; lok me kwoto dano bene kelo kiniga.

24Bedo woko ite ot kakeni ber kato bedo i ot kacel ki dako ma lapyem.

25Lok maber me yomcwiny ma dano owinyo ma oa ki i lobo mabor, obedo calo pii ma ngic ma kweyo cwiny dano ma orwo oneko.

26Dano ma kite atir ma oye tam pa jo maracu, cal ki wang it ma piine opong coto, ki wang it ma obale woko.

27Pe bedo ber me camo moo kic madwong, dok bene bito dano ki lok mapol ni wek kipwoyi pe ber.

28Kace pe itwero loyo kinigani, ci irom ki taun ma peke ki cel.