Carolok 26

1Kit macalo pe opore pi pee me poto ikare me oro, onyo kot me cwer ikare me kac, kitmeno bene pe opore me woro dano ma laming.

2Lok ma kiceni kwede pe twero timo gin mo ikomi kace pe ibalo, bedo calo winyo lakalagwec ma tuk yenge atata, dok calo aliboro ma tuk tware cito woko.

3Kigoyo aguragura ki del, kitweyo dog kana ki ogwil, odoo aye kigoyo ki nge dano ma laming.

4Pe idok ipeny pa dano ma ming marom ki mingone, miyo in bene i loke idoko laming calo en.

5Tii ki dano ma ming marom ki mingone, wek pe otam pire kene ni eryek.

6Ngat ma oro laming me cwalo lok kamo meno rom ma onguno tyene kekene dok tye kayenyo ayela ni obin ikome.

7Carolok ma luming giloko, cal ki tyen dano ma langolo ma lyere alyera ma konye dong peke.

8Ngat ma woro laming rom ki dano ma otweyo gweng i latangdingo ma pe kitwero celo ki gin mo.

9Carolok ma luming giloko, rom ki okutu ma ocobo cing lamero.

10Won tic ma coyo laming nyo lamero me tic bote rom ki won atero ma bayo aterone akaka ikin dano mapol ata.

11Ngat ma laming ma nwoyo tim mingone rom ki gwok ma loke dok kanango ngoke kekene.

12Twero bedo yot me pwonyo ngat ma laming makato pwonyo ngat ma tamo ki icwinye kene ni eryek.

13Dano ma lawackom bedo mere mot i ode, en waco ni, “Labwor tye iwanga yoo!”

14Dano ma lawackom bedo kaloke aloka iwi kitandane, macalo kika ma wire ikom pete.

15Lawackom lutu cinge i atabo; ento kwanyo cinge me tero cam idoge loye woko.

16Dano ma lawackom nene kekene ni eryek ekato kadi wa jo abiro ma gitwero dok ipeny ki ryeko.

17Ngat ma donyo i lok daa ma pe okemo en rom ki ngat ma mako gwok matye kakato akata ki ite.

18-19Ngat ma bwolo lawote kun waco ni, “An atye kaloko lok oree keken,” rom ki lapoya ma cwinyo mac iwi ot, nyo ma bayo atero ci neko dano.

20Ka yen peke, miyo mac to woko; kama ngat ma maro kwoto dano pe iye, daa bene bedo peke.

21Macalo bilo kano lodi mac, yen bene miyo mac lyel, dano ma maro daa bene tye kitmeno, miyo daa mede ameda.

22Lok pa ngat ma lakwot dano mit calo cam ma kitedo makur atika, ma kimwonyo cito i ic kikome.

23Dano ma loko lok mamit ki doge ma kun nongo tye ki tam marac i cwinye rom ki atabo lobo ma kideyo ki libi maryeny aryenya.

24Ngat ma lakwori twero loko boti lok mamit ki doge nono kun nongo tye ki adagadaga i cwinye; 25kadi ka loko lok mamit ningo, pe iye loke, pien cwinye opong ki adagadaga keken. 26En twero umu adagadaga ma en tye kwede i cwinye ki bwola, ento lwak bineno gin marac ma en tiyo.

27Ngat ma kwinyo bur bipoto iye; ki ngat ma cako loro got, got bipoto ikome.

28Ngat ma loko lok goba bot lawote nongo dage, dok dano ma bwolo dano ki lok mamit kelo can keken.