Carolok 27

11

Pe myero inyate kekeni pi nino ma diki, pien pe ingeyo gin ma bitime ikin tin ki diki.

2Pe ipake keni ki lok ma i loko; wek ngat mukene aye opaki, kadi en larok.

3Got pek, kweyo bene pek, ento ayela ma laming kelo pek makato ducu.

4Akemo ger, dok kiniga nyayo nek; ento nyeko rac ma katogi ducu.

5Juku dano atyer kamaleng ber kato mar ma kikano woko.

6Kadi bed laremi ogoyi pud itwero geno en, ento ka lakwori obino me kwako kori, myero igwoke mada.

7Ngat ma oyeng kwero camo moo kic, ento ngat ma kec neko kadi gin makec nongo lim alima idoge.

8Dano ma weko gange a cito woko kamukene, rom ki winyo ma obwoto ode otuk ocito woko kamabor.

9Moo wir ki gin ma ngwece kur miyo dano bedo ma cwinye yom, ento ayela balo cwiny dano woko marac.

10Pe ibwot ngat ma laremi, nyo larem woru; dok ikare ma itye ki can pe myero icit i borpiny kayenyo kony bot wat. Lawoti matye cok twero konyi makato omeru matye kamabor.

11Latina, bed ryek, wek iyom cwinya, wek anong lagam ma myero adok iye i lok ki ngat ma caya.

12Dano ma wiye tiyo ka oneno gin marac bino ikome, ci kane woko; ento lakwiya piny mede mere ameda, ci neno can ada.

13Gam ginaruka pa dano ma jengo jamine pi banya pa dano mo ata, dok ber imak en kikome ka onongo ocibo jami mo pi jo ma gin lurok.

14Ngat ma a malo odiko con, ci cako lamo gum ikom lawote ki dwon malongo, kibiwaco ni en tye kaceno lawoteni acena.

15Dako ma lapyem ma nyayo ayela rom ki ngido kot ma pe cok ikare me cwir. 16Dakonu jukune tek macalo juku yamo, dok tek macalo mako moo pongcing.

17Nyonyo twero pako nyonyo lawote doko bit, kitmeno bene dano acel acel twero pwonyo lawote.

18Ngat ma pito yat oduru ka ogwoko maber bicamo nyige, ki ngat ma kuru piny kun gwoko ladite maber dano biwore.

19Kit macalo dano ka okulu wiye i pii neno kit ma etye kwede, cwiny dano bene nyutu kit ma kit dano meno tye kwede.

20Dano ma pe twero yeng ki gin ma iye mito, obedo calo lyel ma pe yeng ki jo ma oto.

21Ryal ki jabu kilenyo i ruk mac wek kinen ka leng, dong ber pa dano nen ikit ma jo mukene gipake kwede.

22Kadi bed igo laming ma kun iodo ki lalek i pany, ci pud mingo matye iwiyeni pe bia wa ki acel.

23Myero igwok romini dok ingegi maber, ket cwinyi bene kagwoko dyangini: 24pien lonyo pe bedo matwal, dok ker bene pe rii nakanaka pi yalwak ducu. 25Ka kinyaro lum pi pito lee, ci lum ma nyen dok cako lot, ka dok ki nyaro lum ma olot iwi godi ci kigwoko. 26Itwero yubu bongini nia ki ikom yer romini, dok itwero wilo ngom ki ciling ma inongo ki ikom dyegini. 27Ibinongo cak ma oromo ma a ki ikom dyegini, maromo pito jo ma i odi ducu, dok biromo gwoko anyira ma gin angecani ducu.