Carolok 28

Jo maracu ki jo ma kitgi atir

1Jo maracu giringo woko aringa kadi bed pe ngat mo tye ka ryemogi, ento dano ma kite atir cwinye tek calo cwiny labwor.

2Ka lobo obedo katimo bal ci luloce bedo mapol. Lobo twero cung matek dok bedo ki kuc ma rii nakanaka kace onongo tye ki luloc maryek ma giniang dok ma gitye ki ngec maber.

3Laloc ma unu lucan obedo calo kot ma cwer ki pee ci balo cam woko liweng.

4Jo ma gibwoto cik pa Lubanga gipako jo maracu, ento jo ma gigwoko cik pe gibedo ki cwak ikom jo maracu.

5Jo ma lutim gin marac pe giniang ilok me ngolo kop atir, ento jo ma giworo Rwot giniang iye ducu maber.

6Dano ma lacan ma loko lok ada dok lagen ber kato lalonyo ma kite pe atir.

7Latin ma gwoko cik nongo ngat maryek, ento latin ma mako larem ki dano ma konygi peke kelo lewic ikom wone.

8Ngat ma medo lonyone ki gamo magoba ki bot jo ma gitye ki peko nongo tye kacokone pi ngat ma lakica ma konyo lucan.

9Ngat ma pe tero ite kawinyo lok me cik ki lubune, Rwot bene bikwero winyo legane woko.

10Dano ma telo ngat ma cwinye atir me timo gin marac bipoto i bure kekene; ento ngat ma pe ki bal kibimiye lobo maber me bedo ginaleyane.

11Dano ma olony tamo ki icwinye ni en eryek, ento dano ma lacan matye ki niang matut neno kit ma en tye kwede.

12Ka jo ma kitgi atir aye gitye kaloc, ci dano gibedo ki deyo madit; ento ka jo maracu gitye kaloc, ci dano gikane woko akana.

13Ngat ma kano bale ma pe tucu, pe bimede ki bedo ki kwo maber; ento ngat ma tucu bale ka bwoto timogi matwal aye kica bimako Lubanga ikome.

14Dano ma lworo Rwot kare ducu tye ki gum; ento can bipoto ikom dano ma pe lubu cik pa Rwot.

15Laloc ma maloyo lwak jo ma lucan i yo marac obedo calo labwor ma kok nyo nguu matye kalibo lee.

16Laloc ma pe ki niang matut en ngat mager ma unu dano; ento ngat ma kwero lim ma kinongo i yo ma pe atir birii i lobo pi mwaka mapol.

17Dano ma oneko lawote, myero kinek woko bene; pe myero ngat mo okonye.

18Ngat ma loko lok ada dok lagen, Lubanga bilaro ki i gin marac ducu; ento ngat ma ngak woko ma pe lubu cik bipoto atura.

19Ngat ma lapur matek twero limo cam mabup, ento ngat ma balo karene itimo tim ma konye peke can bimako malit.

20Dano ma lagen bilimo gum madwong, ento ngat ma laro ni elony woko oyotoyot pe bibwot ki ipwod.

21Poko kin dano pe ber; ento jo mukene gitwero timo roc pi gamo latin lim mo me wil imung.

22Dano ma lagem laro ni en aye ebed ki lonyo, ma pe ngeyo ni can cok bimake.

23Ngat ma juku dano kibibedo kwede maber lacen, en loyo ngat ma pwoyo dano ki doge nono.

24Ngat ma yako jami pa wone nyo pa mine kun waco ni, “Gin ma atimoni pe bal” nongo obedo ngat ma layak.

25Dano ma laworo tugu mere daa ento ngat ma geno Rwot bilimo lonyo madwong.

26Ngat ma gene kene ki itame meno laming; ento ngat ma lubu lok pa jo ma ryek bilare.

27Ngat ma konyo lucan Rwot bimedo bote jami mapol, ento ngat ma kwero konyo lucan kibicene woko.

28Ka jo maracu gitye kaloc, dano gikane woko akana, ento ka dong guto woko, jo ma kitgi atir ginya gimede ameda.