Carolok 29

1Ngat ma ki pwonyo jwijwi, ce mede ki kwero winyo pwony, ceng mo bipoto i can ma pe dok bibwot matwal.

2Lwak gibedo ki yomcwiny, ka jo ma kitgi atir aye tye kaloc; ento ka jo maracu aye loyo lwak, ci lwak cur marac.

3Latin ma maro ryeko kweyo cwiny wone, ento latin ma mako larem ki dako ma lakwele balo lime ducu itim me carocaro.

4Laloc ma ngolo kop kakare miyo kuc bedo tye i lobo, ento ngat ma gamo lim ma dano gimiye i mung balo lobo abala.

5Ngat ma bwolo lawote ki lok doge meno nongo tye kaciko obwo ma bimako en kekene.

6Dano ma latim marac gire moko i owic me bal ma en timo, ento ngat ma kite atir bedo ma opong ki yomcwiny.

7Dano ma kite atir ngeyo gin ma myero pi ngat ma lacan; ento dano marac pe niang kit gin macalo meno wa ki acel.

8Jo ma lungala gitwero tugu ayela mamiyo gang lyeti woko, ma nongo jo maryek gikweyo meggi kiniga woko akweya.

9Kace dano maryek tye kapido gin ki laming, laming bedo kalok anywaranywar ki yet, dok pe twero ling.

10Jo ma cwinygi puke pi oyo remo pa luwotgi, gidag neno ngat ma pe ki bal; gin jo maracuni giyenyo yo me rwenyo kwone woko.

11Laming loko ki teko me dwone ducu ka kiniga omako, ento dano maryek juku kinigane motmot.

12Kace dano ma laloc bedo kawinyo lok gobagoba, ci luditone ducu gibiloke gidoko jo maracu.

13Dano ma lacan ki ngat ma unu lacan gitye ki gin acel ma romrom, gin aryoni ducu Rwot aye ma miyogi wang me neno.

14Kace laloc ngolo kop atir kun paro pi lucan, ci birii kaloc matwal.

15Kace ipwodo latin ka obalo i yo me pwony bimiyo en doko ryek, ento ka itenyo latin liyak ma pe ipwonyo ci bikelo lewic iwi mine.

16Ka jo maracu aye gitye kaloc ci dano gimede ameda ki timo bal; ento jo ma kitgi atir gibineno can ma poto ikomgi.

17Pwony latini me bedo ki kit maber, ci ibibedo ma pe iparo gin mo; dok en bikweyo cwinyi bene.

18Kama lok pa Lubanga pe iye me telo dano, lwak me lobo gipong ki bwami, ento Lubanga miyo gum ki jo ma gwoko cik.

19Ka ibedo kalok aloka keken bot latici miyo en pe pwonye, kadi bed en niang gin ma iloko bote, pe bilubu wa ki acel.

20Ineno dano ma laro lok oyotoyot ma kun pe tamo gin ma etye kawacone? Itwero bedo ki gen ikom ngat ma laming makato en.

21Ngat mamiyo jamine ducu bot latice kit macalo latice mito nia katinone, i agikine binongo ni laticu dong odoko lale jamine.

22Dano ma opong ki akemo kare ducu tugu mere daa nyo lweny, ki ngat ma kinigane lyet kelo ayela dok timo bal mapol ata.

23Wake miyo dano poto i can, ento dano ma bedo mwol i cwinye jo mapol gibiworo.

24Ngat ma larem lakwo nongo lamonene kekene dok dag kwone; pien kadi bed en owinyo lok ma kiceno ki dano, ci pe twero tucu lok ada.

25Bedo kaparo gin ma dano tamo ikomi tye macalo owic, ento ngat ma geno Rwot bedo maber labongo ayela.

26Jo mapol gimito ni laloc opwogi, ento Rwot aye timo gin ma myero ki dano acel acel.

27Dano ma kite atir dag ngat ma labal, dok jo maracu gidag ngat ma bedo ki kit kwo ma atir.