Carolok 30

Lok me ryeko pa Agur

1Magi aye lok ki kwena ma Agur wod pa Jake me Maca oloko:

“Koma ool woko dong do ai Lubanga; koma ool dok onyot woko dong ai Lubanga.

2Adada an aming ma pe dong apore me bedo dano.

Pe atye ki kit niang mo wa ki acel macalo dano.

3Pe apwonyo lok mo me ryeko,

dok pe angeyoni Lubanga obedo anga.

4Anga ma dong oito iwi polo ka dok odwogo piny i lobo kany?

Anga ma otyeko mako yamo i cingeni?

Anga ma oboyo pii ki bongo?

Anga ma oketo agiki lobo ducu ma tyeni?

Nyinge anga, ki nying latine kono anga, ka ingeyo?

5Lubanga cobo lok ducu ma en ociko ada; en tye macalo kwot pa jo ma giringo gilaro bote. 6Pe imed lok mukene ma pe en owaco ikom loke ma en owaco, miyo en bijuki dok nyutu kamaleng ni in lagoba.”

Carolok mukene

7Lubanga, alegi imiya jami aryo ma pud peya ato: 8kwany lok me bwola ki goba woko ki idoga; pe amito imiya abed lacan nyo lalonyo; ento amito imiya jami ma oromo me gwoko kwona. 9Ka abibedo ki cam madwong mukato kare, miyo atwero kweri woko, kun awaco ni, “Rwot en anga?” Dok pe myero abed lacan, miyo akwalo kwo, ci apyedo nying Lubangana.

10Pe myero ilok marac ikom latic bot rwode, miyo laticu biceni.

11Tye jo mukene ma giloko lok me ceno won gi dok giloko lok marac ikom megigi.

12Tye jo mukene ma ginene keken gi ni gitye labongo bal mo ikomgi, ento nongo gupong ki bal mapol ata.

13Tye jo mukene ma ginene kun gitamoni gin aye giber makato, dok gicayo jo mukene!

14Tye dano mogo ma gitimo tim gero matek ikom lucan, gubedo calo pala ma lakgi bit ma gineko ki lucan gityekogi woko ducu ki i lobo, gijwero bene jo ma piny obwoyogi woko ducu ki ikin dano.

15Kwidi karadini tye ki anyirane aryo, ma gikok ni, “Miwa, miwa.”

Tye jami adek ma pe twero yeng; tye jami angwen kulu ma pe giwaco ni, “Dong oromo”:

16lyel, dako ma lalur,

ngom ma cwiyo pii madwong,

ki mac ma lyel ma pe twero waco bene ni, “Dong oromo.”

17Dano ma ngalo wone ki ngat ma cayo mine, agak ma i laora kulu gibigolo wange woko dok acut bicamo kome woko.

18Tye jami angwen ma abedo ki ur madit ikomgi; dok pe aniang kitgi, gin ene:

19kit ma ocur tuk kwede ki i polo,

kit ma twol mol kwede ki ikom got,

kit ma mel woto kwede idye nam madit,

ki kit ma laco gin ki nyako gicako miti kwede.

20Man aye kit pa dako ma lakwele: en timo abor, lwoko kome woko, ci waco ni, “An pe atimo bal mo.”

21Tye jami adek mamiyo lobo yenge; tye jami angwen kulu ma lobo kikome pe twero ciro:

22opii ka odoko rwot,

ki laming ka tye ki gin acama ducu ma iye mito,

23nyako ma kidag, ka kinyomo woko,

ki nyako angeca ka oleyo katyen min ot.

24Tye jami angwen iwi loboni ma gitino mo, ento gitye ki ryeko madwong:

25Nginingini pe gitek,

ento gicoko cam me acamagi ikare me oro;

26okile pe gitwoni oteka,

ento kabedogi tye ikom got;

27bonyo pe tye ki rwot mo

ento pud gitware kun gilube aluba i dul ki dul.

28Itwero mako lagwe i cingi,

ento pud ibinongo ni lagwe tye i gang pa luker.

29Tye jami adek manen me deyo ka gitye kawot; tye jami angwen ma girye aryeya i rek ka giwoto:

30labwor keken aye matye twon oteka makato lee mukene ducu

dok pe lworo lee mo wa ki acel;

31twon gweno ma lanywar, nyok dyel,

ki rwot matye kawot ma ngate angata inyim lwake.

32Kace onongo ming omaki, ma ibedo kakete malo piri keni, nyo ka ibedo ka tamo gin marac, ci myero i juk lebi cut. 33Ka ipwayo cak dyang ci inongo moo, ka itwomo um ngat mo matek ci remo kati cut, kitmeno bene ka itugu kiniga ki i cwiny dano mo, ci inyayo lweny cut.