Carolok 31

Tam ma kimiyo bot laloc

1Magi aye lok pa Lemuel, rwot me Maca, ma mine opwonye kwede.

2Latina, gin ango, abiwaci lok ango? In latina, an aye ma anywali, dok in ibedo lagam me legana bot Lubanga. 3Pe myero ityek teki woko ikom mon, pe iribe kwedgi pien gin jo ma gineko luker gityeko woko. 4Lemuel, mat pe opore pi luker, luker myero pe gumat kongo bwino, kadi luloc pe myero gubed ki miti me mato kongo makec; 5ka gumato miyo wigi wil woko ikom cik ma kiketo, dok bimiyo gingako pido pa jo ma gitye ki can ki gin ma myero botgi. 6Mii kongo makec bot ngat ma dong cok to, ki kongo bwino bot jo matye ki kumu pi can malit; 7wek gumat ci wigi owil woko ikom can gi, wek wigi pe opo ikom cwercwiny ma gitye kwede.

8Lok pi jo ma pe gitwero lok pirgi ken gi, ki pi jo ma kituru twerogi.

9Lok pirgi, dok ingol kopgi atir. Cung pi twero pa lucan ki jo ma piny obwoyogi.

Dako ma kwiri ma kite atir

10Anga matwero nongo dako ma kwiri ma kite atir? En ber kato jami me welgu ducu.

11Cware keto gene ducu ikome, pimeno cware pe bibedo lacan.

12Dakonu timo cware maber, pe miye peko mo pi kare me kwone ducu.

13En tiyo tic matek ki cinge, kun cweyo bongi me yer romo, ki mukene ma a ikom pamba.

14En tye macalo lwak mel pa lucat, en kelo came nia ki kamabor.

15En a malo dyewor ci yubu cam ki jo ma i ode ducu, ka dok poko tic ki angecane.

16En neno lobo ci wilo woko wek epur iye oloke; man en wilo ki lim ma en onongo ma oa ikom tic matek ma en otiyo.

17En dako matye ki kero ma kome mit bene i tice, en tye ki teko ma rome tic.

18En bene tye kaneno ni tice me cat kelo bote magoba maber. Dok mac tarane bedo kalyel alyela wa i dyeworgu ducu ma pe to.

19En wiyo ucine pire kene, dok en kikome aye cweyo bongine.

20En gire konyo jo ma lucan, dok bene konyo jo ma piny obwoyogi.

21En pe tye ki lworo mo pi jo ma i ode ikare me koyo, pien jo ma i ode ducu guruku bongo mapek me uci makwar.

22En cweyo bongi me giume; bongine ducu obedo bongi camanini mabere ki ma lamarlamar.

23Cware dong ngene mada bot jo ma i dog gang, ka obedo ikin ludongo me lobo.

24Dakone cweyo bongi nia ki ikom pamba ci catogi woko; en bene poko del me tweyo pyer bot lucat.

25En ruke ki tek kacel ki deyo, ma nongo pe tye ki lworo pi kare mabino anyimgu ducu.

26En loko loke ducu ki ryeko, pwony ma en pwonyo ki dano bene obedo pwony me kica.

27En tye kagwoko jo ma i ode ikit yo ducu ma mite, en pe lawackom.

28Ka lutinone gua malo gilwonge ni lagumkom; cware bene lwonge ni lagumkom, dok pake matek kun waco ni,

29“Mon mapol gutyeko tiyo tic mabeco makato, ento in itiyo dong ma ikatogi ducu.”

30Pe igen dako ma labuta, ki ber kom dano konye peke; ento myero kipak dako ma lworo Rwot aye.

31Myero kipwoye pi tic matek ducu ma en tiyo, dok myero jo ducu guwore pi tice magi ducu.