Latit lok 1

Kwo me lobo man ducu konygi peke

1Magi aye lok pa latit lok, wod pa Daudi, ma obedo rwot i Jerucalem.

2Latit lok owaco ni, konygi peke, konygi peke! Gin ducu konygi peke. 3Dano twero nongo kit magoba ango ki ikom tic matek ma en tiyo dyeceng jwini? 4Yalwak me kare man kato, ci dok yalwak mukene leyo kakargi, ento lobo bedo mere matwal. 5Ceng tuc ci cito poto, ka dok loke oyotoyot dok kama en tuc ki iye. 6Yamo kodo dok tung kupiny, ka dok wire kodo dok tung kumalo; bedo kakodo tungi ki tungi, ka dok loke rumu piny aruma. 7Pii ma opong i kulu ducu mol cito i nam, ento nam pe pong; pii dok cen kama kulu ocake ki iye, ka cako mol ki kunu dwogo i nam. 8Kom dano dong pong woko aponga ki olokom ma pe gitwero titone; wang dano pe twero yeng ki gin ma dano neno, kadi ki it bene pe twero yeng ki gin ma winyo. 9Gin ma dong otyeko time en aye gin ma bitime bene, ki gin ma kityeko tiyo en aye bene gin ma kibitiyo; pimeno pe tye gin mo manyen iwi loboni kulu. 10Tye gin mo ma kiloko pire ni, “Nen, man gin manyen”? Man otyeko time wacon, ikare ma onongo pud peya kinywalowa. 11Dano pe po ikom gin ma otime yam wacon, dok ikare me anyim bene pe tye ngat mo ma bipo ikom gin ma tye katime ikare man.

Yenyo ryeko bene konye peke

12An Latam matut onongo abedo rwot maloyo jo Icrael i Jerucalem. 13Amoko tama me tato ki ngiyo ki diro gin ducu ma dano gitye katiyone ite polo i lobo kany.

Lubanga omiyo tic ma kelo cwercwiny keken bot dano ma myero gubed katiyone. 14Atyeko neno gin ducu ma kitye katiyone i lobo kany, ci aneno ni gin ducu konygi peke, dok bedo calo ryemo kor yamo ma kodo. 15Gin ma ogom pe dong kitwero twenyone bedo atir, dok jami ma komgi pe nen, pe kitwero kwanogi. 161

Ci an aloko kekena ni, “An dong alimo ryeko madit makato ryeko pa luker ducu ma gukwongo nyima ma gubedo kaloc i Jerucalem. Angeyo kit ma ryeko ki ngec ducu bedo kwede.” 17Aketo cwinya me ngeyo ryeko, ki me ngeyo apoya ki mingo. Anongo ni magi ducu bene obedo calo ryemo kor yamo ma kodo. 18Pien bedo ki ryeko madwong miyo dano bedo ki cwercwiny madwong bene, ki ngat ma ngece tye kamede meno nongo tye kamedo cwercwiny bote.