Latit lok 2

1Aloko kekena ni, “Bin ba, amito kong atem yomo cwinya wek aniang kit ma yomcwiny tye kwede.” Ento anongo ni man bene gin ma konye peke. 2Ka aloko kekena ni nyero obedo gin me apoya, ki gin ma yomo cwiny obedo gin ma pe konyo. 3Atamo ni myero kong atem mato kongo bwino wek olyet koma, kun nongo tama tye katela ki ryeko, dok ni kong atem ngiyo kit tim me mingo, nio wang ma aneno gin maber atika ma myero dano gutii ikare manok me kwogi ma gibedo kwede i lobo. 41

Atiyo tic matego; agero odi, ka dok apito olok. 5Ayubu poti mabeco me yomcwiny ma kicelogi woko ki cel, ci apito iye kwa yadi ducu ma nyak ma kicamo nyiggi. 6Dok akwinyo dago kama pii gure iye me aonya ite yadi ma gitye ka dongo i kabedo ma kiyubu me bunga. 72Awilo opii ki angeca; ka dok abedo ki opii ma kinywalogi ki ikin jo ma i oda. Abedo ki lwak dyangi kacel ki romi mapol, kun akato jo ducu ma gukwongo nyima ma gubedo kaloc i Jerucalem. 83Acoko lwak ryal ki jabu ki lonyo pa luker kacel ki dul lobo mayam giloyo odoko mera. Abedo bene ki luwer ma co ki ma mon, kacel ki mon mapol mapatpat ki gin ducu ma yomo cwiny dano. 94

Kitmeno adoko twon dano mo madit ma pe wace, kun aloyo bene wa jo ducu ma gukwongo nyima ma gubedo kaloc i Jerucalem; ryekona aye obedo ka konya. 10Dok gin mo keken ma amito, ka wanga oneno, anongo; dok pe akwero gin ma yomo cwiny dano, pien anongo yomcwiny ma dwong i tic ducu ma abedo katiyone. Dong meno aye obedo mot pi tic ma atiyo. 11Lacen aloke acako ngiyo jami ducu ma atiyo ki cinga ki kit ma ayele kwede katiyone, ci nen, anongo ni man gin ma konye peke, rom ki ryemo kor yamo ma kodo, dok ni pe tye kit magoba mo ma dano twero nongo i lobo.

12Kitmeno aloke abedo katamo tam matut ikom ryeko, apoya ki mingo. Ci anongo ni gin mo ma ngat ma oleyo ka tyen rwot twero timo peke. Myero en olub gin ma rwot ma okwongo nyime otiyo. 13Ci cutcut aniang ni ryeko ber kato mingo macalo deru kato colpiny. 14Dano ma ryek neno yoo kama en cito iye, ma nongo ngat ma laming woto mere i colpiny; ento kadi bed kumeno gin aryoni ducu gibibedo ki agiki maromrom. 15Ka dok aloko kekena ni, “Gin ma bipoto ikom ngat ma laming bipoto ikoma bene; ka kumeno pingo kono abedo ma ryek tutwal?” Ci adok iye kekena ni, man bene gin ma konye peke. 16Pe tye ngat mo matwero po pi dano ma laryeko kadi pi laming, pien ikare ma tye anyim nongo wi dano dong otyeko wil woko wacon ikom gin aryo ducu. Dano ma ryek ki dano ma laming ducu gito i yo marom aroma! 17Kitmeno iya okwero bedo kwo, pien gin ma gitye katiyone i lobo man obedo gin ma kelo can i koma keken; pien gin ducu ma gitiyo konye peke, rom ki ryemo kor yamo ma kodo.

18Cwinya ocako kwero tica ducu ma atiyo i lobo man, kun aneno ni jami ducu ma anongo myero abwot ki ngat ma bileyo ka tyena, 19dong anga mono ma ngeyo kace en bibedo dano ma laryeko nyo laming? Kadi bed kit meno en bibedo ladit maloyo jami ducu mayam alimo kun atiyo pirgi matek, ma ayele kwede katiyone kun atiyo ki ryekona i lobo man. Man bene gin ma konye peke. 20Ci aloke abedo ki cwercwiny ma iya oari woko ikom tica ma atiyo i lobo man, 21pien kare mogo dano ma otiyo tic matek ki ryekone, ki ngec ma en tye kwede dok ki kwirine ducu myero owek jamine bot dano mo ma pe otiyo tic mo liweng pi jami magi, wek ole olony kwede labedo. Man bene gin ma konye peke, dok tye gin marac tutwal. 22Kit gin ango ma dano nongo ki ikom tice ducu, ki kero ma en otiyo kwede tic i lobo man? 235Mwaka me kwone ducu opong ki arem, ki tice bene kelo bote cwercwiny keken; kadi wa i dyewor wiye pe twero ywe ki tam. Man bene gin ma konye peke. 246

Dong gin maber makato ma dano myero otim en aye ni en omyero ocam cam dok omat mat, wek onong yomcwiny i tic ma en tiyo. Ento aneno ni man bene Lubanga aye ma omiyo; 25pien ka Lubanga pe, ngat mo pe twero camo cam dok ngat mo pe twero nongo yomcwiny. 267Lubanga miyo ryeko, ngec ki yomcwiny bot dano ma en pwoyo; ento bot dano ma labalo en miye tic me guru jami ki durugi kacel, me amiya bot ngat ma onongo pwoc ki bote. Man bene gin ma konye peke, rom ki ryemo kor yamo ma kodo.