Latit lok 3

Kit tim acel acel tye ki karene

1Kit tim acel acel ducu tye ki karene, dok kit lok mo keken tye ki karene i lobo man.

2Kare ma kinywalo iye dano, ki kare ma en bito iye;

kare me pito ginapita, ki kare me putu gin ma kipitoni woko;

3kare me neko dano, ki kare me cango dano acanga;

kare me muku ot ki retone woko piny, ki kare me gerone odoco.

4Kare me koko, ki kare me nyero;

kare me kumu, ki kare me myel;

5kare me bolo got atata, ki kare me gurune kacel;

kare me kwako lawoti, ki kare ma pe ikwako iye lawoti;

6kare me yenyo jami, ki kare ma jami rwenyo ki iye arwenya;

kare me gwoko gin moni, ki kare me bolone woko;

7kare me yeco bongo ki kare me kwoyone woko doki;

kare me ling alinga, ki kare me lok;

8kare me maro dano, ki kare me kwero dano akwera;

kare me lweny, ki kare me bedo ki kuc.

9Dano ma latic mono nongo kit magoba ango ikom tic ducu ma en tiyo?

10Dong atyeko neno kit tic ma Lubanga omiyo bot dano ma myero gubed katiyone. 11En oketo jami ducu maber ma oporo karegi kikome; dok oketo dano me ngeyo kare mukato angec ki kare ma pud tye anyim, ento kadi kumeno dano pe twero ngeyo gin ma Lubanga otiyo nia i acaki nio i agiki. 12Ci aniang atir ni pe tye gin mo maber pi dano makato kono bedo ki yomcwiny pi kare me kwone ducu i lobo man. 13Dok aniang bene ni man obedo mot ma Lubanga omiyo bot dano, kun mito ni dano acel acel myero ocam cam, dok omat mat, ci onong yomcwiny ma a ki ikom tice ducu ma en tiyo.

14Angeyo ni gin mo keken ma Lubanga tiyo bedo matwal; pe kitwero medo gin mo iye, dok pe kitwero kwanyo gin mo woko ki ikome. Lubanga oketo obedo kitmeno, wek omii dano gubed ki lworo inyime. 15Gin ma tye katimeni dong yam otyeko time con; ki gin ma bitime i anyim bene dong otyeko time woko; Lubanga weko kit gin acelu mayam otime, ci miyo dok time aye.

Tim ma atir peke i lobo

16Pe meno keken, anongo ni i lobo man kama myero tim ma atir obed tye iye inongo tim maracu aye, dok bene kama myero dano gubed ki kit ma atir inongo tim maracu iye. 17Abedo kalok kekena ki i cwinya ni, Lubanga bingolokop ikom jo ma kitgi atir kacel ki lutim maracu, pien dong otyeko yero kare pi kit lok acel acel, ki pi kit tic ducu. 18Abedo katamo ki i cwinya ni, Lubanga tye katemo dano atema wek enyut botgi ni kadi bed gin dano ento gin rom aroma ki lee tim. 19Pien can ma poto ikom dano ki gin ma time ikom lee tim ducu rom aroma; gin ducu gito woko. Gin ducu kimiyogi yweyo me kwo maromrom, ci dano pe bedo maber makato lee; pien gin ducu konygi peke. 20Gin aryo ducu gicito i kabedo acel; pien gin ducu gua ki i apwa, dok gibidok iye aye. 21Anga ma ngeyo kace tipu pa dano cito malo i polo, nyo ka tipu pa lee donyo piny i ngom? 22Kitmeno aniang ni gin maber makato ducu ma dano twero timo en aye me yomo cwinye ki gin ma en olimo ki i tice ma en otiyo, pien meno aye dul ma kipoko bote. Anga matwero nyute gin ma bitime lacen i anyim ma nongo en dong oto woko?