Carolok 21

1Rwot aye maloyo cwiny laloc, macalo kulu ma mol, en loko piine mol cito kama en mito.

2Dano neno ni gin ducu ma etimo tye atir ki tung bote, ento Rwot aye neno cwinye ka leng.

3Tiyo gin ma atir, ki ngolo kop atir, yomo cwiny Rwot makato gitum.

4Wang dano ma lakete, ki cwiny me wake, magi ducu bal; ento gin tye macalo tara ki bot jo maracu.

5Ngat ma yubu yube ma nongo kong oketo i tam dok tiyo matek, bilimo jami madwong ata; ento ngat ma mito nongo lonyo aruya bibedo lacan.

6Lonyo ma inongo ki loko lok goba duny woko macalo lupuu, dok tye calo owic ma tero dano ito.

7Jo maracu bito pi tim bwamigi, pien gukwero tiyo gin ma atir.

8Jo ma lubalo giwoto i yo ma ogom, gitiyo gin ma pe atir; ento jo mabeco ma gipe ki bal mo gitiyo gin ma atir.

9Bedo woko ite ot, ber kato ribo ot kacel ki dako ma lapyem.

10Dano marac bedo ki miti i cwinye pi timo gin marac, ma nongo pe tye ki kica ikom lawote wa ki acel.

11Kace kimiyo pwod ki ngat ma langala, ci ngat ma kwiya piny bene cako doko ryek; dano ma laryeko mako pwony ma kipwonye kwede, ci medo ngece doko dwong.

12Lubanga ma kite atirni, neno odi pa jo maracu ki gin ma gitimo; ci bityekogi woko matwal.

13Ngat ma dingo ite woko kawinyo koko pa lucan, en bene ka bikok pi kony, ngat mo pe biwinyo kokone wa ki acel.

14Mot ma kimiyo laling i mung kweyo cwiny dano matye ki kiniga; ki lim ma kimiyo i mung me wilo dano kwanyo akemo madit woko.

15Ka ngolo kop woto kakare, jo ma kitgi atir bedo ki yomcwiny madwong, ento lutim maracu aye gibedo ki kumu.

16Dano ma ngak weko yo me niang maber bito, ci kiyiko woko nywako kabedo ki jo ma oto.

17Ngat ma lacam kwo bibedo lacan; ki ngat ma lamat matek ma mito mere kwo ma lamal pe bilony.

18Jo maracu gikelo can ma onongo gimito keto ikom jo ma kitgi atirni ikomgi ken gi.

19Bedo i tim aroo ber, kato bedo kacel ki dako ma lapyem ma lakel ayela.

20Dano maryek bedo ki jami ma beco ki lonyo i pacone, ento dano ma ming tyeko lime woko ducu oyotoyot.

21Ngat ma bedo ki leng cwiny dok ki kica, bibedo kwo pi kare malac; ci jo mapol bene gibiwore.

22Dano maryek twero mayo taun madit pa jo ma gin oteka woko, dok muku cel gogogi ma gigenoni reto woko piny lirum.

23Ngat ma gwoke ikom lok ducu ma en loko, pe twero bedo ki ayela mo.

24Langala aye dano ma lawake dok ma lakete, ma gin ma en tiyo ducu bedo tim me anywaranywar ki wake marac.

25Miti ma lawackom tye kwede twero neke bene, pien en dag tiyo tic pi nongo gin ma en mito.

26Dano marac bedo ka paro jami pa jo mukene dyeceng ki dyewor benebene, ento dano ma kite atir miyo jamine me konyo jo mukene ki cwinye ducu.

27Gitum ma dano marac otyero en gin me kwer bot Rwot; race bedo rom mene kace en tyero gitum bot Rwot ma nongo tye ki tam marac i cwinye?

28Caden me goba pe kiye loke; ento dano ma loko lok ada, kiwinyo loke.

29Dano marac poro bedo ngat cir ma tame atir, ento dano ma cwinye atir bedo katamo motmot ikom gin ma myero etim i lobo.

30Ryeko, niang ki tam ma kimiyo me konyi, pe konyi ka ipyem ki Rwot.

31Kitwero coko aguragura kacel ma dong kiyubugi pi kuru nino me lweny, ento loyo lweny twerone tye bot Rwot.