Carolok 20

1Mato kongo bwino makec madwong mukato kare loki idoko lakolo dok miyo kicayi bene; ngat ma mato kongo bwino mer kwede nongo pe ryek.

2Kiniga pa rwot kelo lworo calo koko pa labwor; ngat mamiyo kiniga mako rwot kelo to ikome kene.

3Bedo cen ki kama daa tye iye kelo woro ikomi; ento ngat ma laming maro daa.

4Lapur ma lawackom pe puru potone i poto kot kikome; pimeno en pe binongo cam mo ma myero eka ikare me kac.

5Tam ma dano tye kwede i cwinye tye calo pii matut, ento dano matye ki niang matut twero golo woko kamaleng.

6Dano acel acel loko pi genene ki mar me ada ma en tye kwede, ento anga matwero nongo dano ma gene?

7Likwayo pa dano ma cwinye leng dok ma tiyo gin matye atir gitye ki gum!

8Ka rwot obedo iwi komker me ngolo kop wange yeko gin marac ducu.

9Tye ngat mo matwero waco ni, “Dong atyeko lwoko cwinya odoko leng kombedi atye maleng, bala ducu dong kijwayo woko”?

10Rwot dag jo ma gitiyo ki agwata ki mijan ma pe pimo jami kakare.

11Kadi wa latin bene nyutu kit ma etye kwede i gin ma en tiyo, ka gin ma en tiyoni ber nyo tye atir ci nongo en latin maber.

12Rwot aye ma omiyowa it me winyo lok ki wang me neno piny, en aye ma oketo gin aryonu ducu.

13Pe ibed kanino anina, miyo idoko lacan; yab wangi itii tic, ci ibibedo ki cam madwong.

14Lawil ngur bot lacatwil kun waco ni, “Wel rac, wel rac” ento ka dong okato ocito woko ci nyate ni kidwoke wel maber.

15Kace ingeyo gin ma itye kalok ikome, ci itye giri ki gin me wel makato jabu ki godi me welgu.

16Pore me gamo ginaruka pa dano ma ocung pi banya pa dano mo ata, dok ber me mako gin ma en ocibo kace ocung pi banya pa jo ma gin lurok.

17Jami ma dano nongo i yo me bwola bedo lim alima bote, ento lacen bibedo calo kweyo mupong idoge.

18Yub ducu cobe maber ka kong ityeko nongo tam mabeco ma oromo; pe icit ilweny ka pe iyube maber.

19Ngat ma bedo kawire ki lok me kwot ikin dano tucu mung woko; pimeno pe myero iribe ki ngat ma loko lok mapol.

20Kace ngat mo oceno wone nyo mine, ci kwone bitum woko macalo mac tara ma to woko i colpiny.

21Lonyo ma dano limo oyotoyot i acaki pe gibilimo iye gum i agikine.

22Pe myero iwac ni, “Abiculu wang gin marac ma kitimo ikoma”; ber iket gen ma meri ikom Rwot, ci en bikonyi.

23Rwot dag jo ma gitiyo ki lapim jami ma pe pimo kakare; ki mijan ma pe pimo jami kakare me bwolo dano pe ber.

24Rwot aye ma telo dano i yo me kwone; dano twero niang kit kwo ma etye kwede ningning?

25Dano ma waco oyotoyot ni, “Man adyero bot Rwot”, ka dok tamo lacen ma nongo dong otyeko kwongo kwong, rom ki winyo ma omoko i owic.

26Laloc maryek yeko jo maracu, ci miyo pwod ikomgi labongo dwoko cwinye.

27Cwiny dano aye tara pa Rwot, ma menyo wa gin ducu ma okane i kwogi.

28Rwot twero rii i loc kace tye ki mar me ada ki gen; dok bedo ki kit ma atir aye miyo komker cung matek.

29Deyo ma co matino gitye kwede aye tek komgi, ento co ma oteggi kiworogi pi yer lwar ma otwi iwigi.

30Adong ma keto ret ikom dano kwanyo gin marac woko; dok odoo ma kigoyo ki dano malit aye loko kwone.