Carolok 19

1Dano ma lacan ma loko lok ada dok lagen ber kato ngat ma loko lok gobagoba ma nongo en laming kwede.

2Miti ma dano tye kwede labongo ngec rac, dano ma pe diyo cwinye bipoto i peko.

3Mingo ma dano tye kwede aye kelo can bote, ka dok cako keco mere ikom Rwot ki icwinye.

4Ngat ma lalonyo nongo lurem manyen mapol kare ki kare, ento dano ma lacan kadiwa lareme kikome bene tenye woko liyak.

5Caden ma lagoba pe kibiweko ma pe kong kipwodo, ki ngat ma loko lok goba bene pe bibwot.

6Jo mapol giyenyo gum ki bot dano ma cwinye yom; ngat acel acel mito ni ebed larem dano mo ma maro miyo mot.

7Dano ma lacan kadiwa omegine ducu bene gidage, ki lureme bene ducu giket gicito woko cen kamabor kwede. Pe dong gitwero dwogo cen bote, kadi en obitgi ki lok mamit marom kwene.

8Ngat ma mare kekene nongo ryeko; ki ngat ma wiye tiyo ikom gin ma en opwonyo bibedo ki kwo maber.

9Caden ma lagoba pe kibiweko ma pe kong ki pwodo, ki ngat ma loko lok goba bene bito.

10Pe pore pi laming me bedo i kwo me lonyo, dok bedo rac ka opii bedo ki twero me loyo rwodi.

11Dano matye ki ryeko maber kiniga pe mako oyot, en bedo ma cwinye tye atir pi jalo bal ma ngat mo otimo ikome.

12Kiniga pa rwot bedo calo koko pa labwor, ento bere calo toyo ma ton ikom lum.

13Latin ma ming kelo can ikom wone, ki daa pa dako obedo calo ot macwer ka kot cwer.

14Ot kacel ki lonyo kileyogi ki bot kwaro, ento dako maryek Rwot aye miyo.

15Wackom miyo dano nino nino matut; dano ma lawackom kec bineko matek.

16Ngat ma lubu gin ma Rwot ociko, meno nongo tye kagwoko kwone; ento ngat ma cayo loke bito.

17Ngat ma konyo lucan nongo omiyo banya bot Rwot; pimeno Rwot bicule pi gin ma en otiyo.

18Pwony lutinoni me bedo ki kit kwo maber ma nongo pud gin tino; ka pe imiyogi pwod nongo itye ka balogi abala.

19Dano ma kinigane lyet bilimo pwod ma oporo kinigane; ka ikwanyo en woko ki ican kicel, en pud dok bimitoni ikonye dok aye ikare mukene.

20Winy tam ma kimiyi dok imak pwony ma kipwonyi kwede, ci ibibedo dano ma laryeko ikare me anyim.

21Dano twero bedo ki yub pi jami mapol i tame, ento gin ma Rwot mito aye ma bicobe kakare.

22Gin ma myero dano obed kwede aye mar me ada; dano ma lacan ber kato ngat ma lagoba.

23Lwor Rwot, ci ibibedo kwo; ngat ma lworo Rwot bedo ki yweyo ma oromo i cwinye; gin marac bene pe twero gudu kome.

24Lawackom lutu cinge i atabo, ento kwanyo cinge me tero cam idoge loye woko.

25Pwod jo ma gin lungala, ci jo ma kwiya piny gibipwonye; juk dano ma niang, ci bilimo ngec ma oromo.

26Ngat ma timo bwami ikom wone, ma ryemo mine woko bene ki igang, meno latin makelo lewic ki cwercwiny bot lunyodone.

27Latina, ka iweko pwony, ci ibingak ibwoto lok me ngec ma dong itye kwede con.

28Caden ma konye peke kelo ngala ikom ngolo kop atir, jo maracu bene guloko bal odoko camgi.

29Pwod dong tye ma kitero woko pi jo ma gin lungala, ki luming bene kibigoyo ngegi ki odoo.