Carolok 18

1Ngat ma pe ribe ki jo mukene nongo kete kene, kun kwero lubu tam pa jo ma ticgi nyutu ryekogi.

2Laming pe paro pi niang jami moni; ento gin ma en mito aye me nyutu ka tame kene.

3Bal ki lewic giwoto kacel; ka woro orwenyo, ci yet bene cake.

4Lok ma dano loko cal ki pii matut; ryeko cal ki wang it ma gunye doko kulu.

5Dworo kor dano marac pe ber; ngolo kop me loyo dano ma pe ki bal bene rac.

6Laming loko gin ma nyayo daa ki pyem; pi lok maracu ma en loko aye miyo kigoye.

7Laming kelo can ikome kene ki lok ma en loko, dok gin ma en loko ducu tye macalo owic matwero mako en kekene.

8Lok pa ngat ma lakwot dano mit calo cam ma kitedo makur atika, ma kimwonyo cito i ic kikome.

9Dano ma kome wac katiyo tice rom ki dano ma balo jami abala.

10Rwot obedo calo cel matek kama dano ma kite atir ringo iye ci laro kwone.

11Lonyo bedo calo gang matek bot lalonyo, dok macalo cel ma kigero ocudu malo likung me gwoko en.

12Cwiny me nyate miyo dano poto i can; bedo ki mwolo aye yo me limo woro.

13Myero kong iwiny lok ma nongo peya igamo lok mo; ka pe, ci inyutu mingi dok iywayo yet ikomi.

14Dano twero ciro arem matek ikare ma nongo en two, ento anga matwero ciro ka cwinye odoko nyap?

15Tam pa ngat matye ki niang matut tye me yenyo ngec, jo maryek bene gimito ni giwiny lok ma medo ngecgi.

16Mot ma dano miyo twero yabo yo bote, dok miyo en o wa inyim jo madito.

17Dano ma kwongo tito lok inyim kot nen calo loke tye atir, nio ka lawote ma pido kwedeni openye ki peny madwong.

18Ka jo aryo ma gitego gitye kapyem inyim kot, ce ka kibolo kwir ikin gi, ci tyeko daa ma ikin gi.

19Kony omeru ci en bigwoki macalo ibedo i cel me gang matek, ento ka ibedo ka daa kwede ci en loro dogola woko piri.

20Dano nongo gin maber nyo marac pi lok ma en oloko; lok ma oa ki idoge tye ki adwogine.

21Lok ma i loko twero gwoko kwoni, nyo twero neki woko aneka; jo ma gimaro loko lok maracu gibineno can.

22Ngat ma onongo dako, nongo onongo gin maber; en biniang atir ni Rwot kara pwoye.

23Dano ma lacan ka loko, bako doge ki mwolo; ento ngat ma lalonyo gamo mere lok ki gero cut.

24Tye jo mogo ma giporo bedo lurem apora, ento tye dano ma moko mere ikom lareme liking maloyo omine kikome.