Carolok 17

1Kwon ma ngic mo ma icamo ki kuc ber kato karama ma icamo i ot ma opong ki daa.

2Opii ma tiyo tice ki ryeko twero bedo ki loc ikom latin ma tiyo gin me lewic, dok twero nywako ginaleyagi kwedgi macalo ngat acel ma ikom omegigi.

3Jabu ki ryal kilenyo i ruk mac wek cilo opoke woko ki iye, Rwot bene temo cwiny dano.

4Lutim maracu giwinyo lok pa jo maracu; ki lugoba bene giwinyo lok ma balo nying dano.

5Ngat ma ngalo lacan meno yeto Lubanga ma ocweyo danoni; ki ngat ma bedo ki yomcwiny pi can ma opoto ikom lawote pe bibwot ma nongo pe kong kimiye pwod.

6Ludito ma otii ginongo deyo pi likwayogi, ki lutino bene ginongo deyo pi won gi.

7Laming pe twero loko lok maber, pe ber bene ki laloc ma kiworo me loko lok goba.

8Lim me wil i mung nen bot lamiyone calo lwit ma dano otweyo ibade; en geno ni ebinongo gum pire.

9Dano ma timo kica bot jo ma gitime marac gwoko larem, ento ngat ma wiye bedo kapo ikom bal ma lawote obalo bote keto larem woko ki ikin gi.

10Dano ma niang matut twero ye lok acel keken me juk ki cwinye ducu, kato laming ma kadi ka kidongo tyen miya pe winyo lok moni.

11Dano ma latim marac tamo lok me jemo keken; pimeno kibicwalo lakwena mager wek olweny ikome.

12Bedo ber ka dano orwate ki nguu mager ma lutinone kineko woko, kato ma orwate ki laming ma tiyo gin me mingomingo.

13Kace dano timo gin marac bot ngat ma otime ber, gin marac pe bia ki i ode wa ki acel.

14Lweny cake matitidi ki lok me pyem macalo pii ma ka i yabo doge kong kwongo mol ma manoknok; pimeno myero ijuke woko ma pud peya daa ocake.

15Langolkop mamiyo dano marac loyo kop, ki langolkop ma ngolo lok loyo dano ma loke tye atir, gin aryo ducu Rwot daggi.

16Kadi laming tye ki lim ma oromo maromo wilo ryeko, meno kono konyo ango, ma kun nongo wiye oding woko?

17Luremi ginyuti mar ikare ducu, ki wadini gikonyi ikare me peko.

18Dano ma wiye oding aye jengo jamine, kun miine me cung maka lawote.

19Dano ma maro bal nongo bene maro kelo ayela; ki ngat ma lawake lwongo can keken ikome.

20Dano ma tamo lok marac pe twero limo gin maber, ki ngat ma loko lok me rwenyo dano arwenya bipoto i can.

21Latin ma laming cwero cwiny wone; ngat ma latine ming pe bedo ki yomcwiny.

22Yomcwiny kelo yotkom, cwercwiny miyo dano mok1 woko.

23Langolkop marac ye gamo lim me wilo loyo kop i mung, ma balo ngolo kop atir woko.

24Dano matye ki niang matut ngeyo gin ma myero etim, ento dano ma laming bedo mere ma pe romo moko lok mo pire kene.

25Latin maming miyo wone bedo ki cwercwiny dok mine bene bedo ma cwinye kec adada.

26Pe ber me ngolo cul ki dano ma peke ki bal; nyo me miyo pwod ikom jo ma kitgi beco pi lokgi me ada.

27Ngat matye ki ngec loko lok manok, ki ngat ma kome pe ryange aye dano matye ki niang matut.

28Kadi bed ngat ma laming, kace ling alinga miyo kitwero tamo ni ryek; ka pe ongamo doge kalok miyo kitamo ni niang telok.