Carolok 16

1Dano twero bedo ki yub i tamgi, ento Rwot aye mamiyo cobe kakare.

2Dano neno ni gin ducu ma en timo tye atir ki tung bote, ento Rwot aye neno ka kitimo ki cwiny ma atir.

3Leg Rwot okonyi i tici ducu ma itiyo, ci yub ducu ma itye kwede bicobe maber dok kakare.

4Kit jami acel acel ma Rwot oketo tye ki tyen loke, dong en bene oyubu nino me pwodo jo maracu.

5Rwot dag jo ma luwake; en pe biweko gibwot ma pe kong nongo opwodogi.

6Bed ki mar me ada dok ki gen ci Lubanga biweko bali; lwor Rwot ci gin mo marac pe bitime ikomi.

7Ka inen kit pa dano yomo cwiny Rwot, ci Rwot bene cako miyo kuc bedo ikin dano meno ki lumonene.

8Gin matidi ma inongo ki yo ma atir ber kato lim madwong ma ilimo i yo me bwami.

9Dano yubu yube ki i cwinye, ento Rwot aye ma telo en miyo cobo maber.

10Laker loko lok kit ma nongo Lubanga omiye ni oloki; miyo doge bene pong ki ngolo kop atir kare ducu.

11Rwot cwinye yom ikom jo ma gitye ki mijan ma pimo jami kakare; kidi lapim jami me acata ducu en ma otiyogi.

12Luker pe gitwero ciro jo ma gitiyo gin marac, pien bedo ki kit ma atir aye miyo komker cung matek.

13Laker bedo ki yomcwiny ikom dano ma loko lok ki gen, dok en maro ngat ma loko lok ada.

14Ka kiniga omako rwot ci en twero ngolo to iwi dano mo cut, ento ngat maryek twero kweyo akemo pa rwot ka kiniga omake.

15Yomcwiny ma rwot tye kwede nen wa i tur wange dok miyo kwo, ki kicane bene tye macalo pol mamiyo kot cwer i cwir.

16Bedo ki ryeko kacel ki niang matut ber loyo bedo ki jabu ki ryal.

17Jo ma cwinygi atir giwoto i yo ma pe terogi katimo gin marac; ngat ma gwoko kite bilaro kwone bene.

18Wake tero dano i can, ki cwiny me nyate miyo dano poto i can.

19Bedo kacel ki lucan ki cwiny me mwolo ber kato poko jami ayaka ki jo ma luwake.

20Ngat ma winyo lok me pwony ma kipwonye kwede bibedo ki kwo maber, dok ngat ma geno Rwot bedo ki yomcwiny.

21Dano maryek ki i cwinye ki ngeyo ni tye bene ki niang matut; en loko lok mamit ma bito ki tam pa dano.

22Ryeko miyo kwo bot ngat matye kwede, ento mingo kelo can keken ikom luming.

23Dano maryek lwodo lok ma en loko maber, miyo gin ma en waco ducu bedo lok me pwony ma winye mamit ma ywayo tam pa dano.

24Lok ma kiloko ki kica lim calo moo kic, lim mada mayomo cwiny dok miyo yotkom. 251

Tye gin ma dano tamo ni en aye yo ma atir, kun nongo yo ma kit meno tero en ito.

26Limdog ma latic tye kwede miyo en tiyo matek, pien mito ni ecam eyeng kare ducu wek kec pe obed kaneke.

27Jo maracu gipiro lok me wano jo mukene, dok lok ma giloko nongo lyet calo mac.

28Dano ma cwinye rac bedo kun keto lok ma nyayo mone ikin dano, ki ngat ma maro kwoto dano, keyo larem pa jo mapol.

29Dano ma labwami bwolo lawote, miyo lawote lubu yo ma pe ber ci poto woko ican.

30Ngat ma gayo lawote ki wange nongo tye ki yub me timo gin marac ikom lawote; dano mamiyo doge liking bitimo gin marac.

31Lwar wic aye lalukana me deyo pa ludongo, bino macalo mic pi kwo matye atir.

32Ngat ma kiniga pe mako oyot ber loyo twon oteka, ngat maloyo tam ma i cwinye kene loyo ngat ma omayo taun madit kulu.

33Dano bolo kwir pi gin ma omyero gutim, ento Rwot aye ma moko gin ma bitime.