Jo Pilipi 4:8

Wubed ki yomcwiny i Rwot

1Pimeno utmega, ma amaro dok ma aparo pirwu tutwal, wucung matek i Rwot kitmeno, pien wun aye wubedo yomcwinya ki tok wiya me deyo, wun ma luwota, ikit yo eno ma atito botwu dok apwonyowu kwede myero wumede ki ye i kom Rwot kun otimo gin ma kitito botwu.

2Dong in Euodia ki in Cintuke, alegowu me bedo ki cwiny acel i Rwot. 3In latic lawota me ada, alegi ikony mon magi ba, pien gin bene gulwenyo kacel kweda pi lok me Kwena Maber kacel ki Kelemente bene ki lutic wadiwa mukene ducu, madong gityeko coyo nyinggi woko i buk me kwo.

4Wubed ki yomcwiny i Rwot kare ducu. Dok anwoyo waco botwu aye ni, Wubed ki yomcwiny. 5Wuwek dano ducu gunge mwolo ma wutye kwede. Rwot dong cok dwogo. 6Pe wubed ki par ikom gin mo, ento i lok ducu wumii Lubanga onge gin ma wumito ilega ki bako dogwu kacel ki miyo pwoc bene. 7Man bimiyo kuc pa Lubanga makato ngec pa dano ducu gwoko cwinywu ki tamwu maber i Kricito Yecu.

Wuket tamwu ikom lok macalo magi

8Me agikine, utmega, wuket tamwu ikom lok macalo magi: gin ducu matye ada, gin ducu maromo awora, gin ducu matye atir, gin ducu maleng, gin ducu ma mwonya, gin ducu ma dano pwoyo, ki kit gin ducu maber atika, ma myero me apaka. 9Wutii gin ma nene wupwonyo, ma wugamo, ma wuwinyo, dok ma wuneno ki bota; ci Lubanga won kuc bibedo kwedwu.

Pwoc pi mot ma jo Pilipi gucwalo

10An atye ki yomcwiny matek i Rwot pien kombedi dok wuparo pira kit mayam con. I adane, pe wuweko paro pira, ento kare me konya aye obedo peke botwu. 11Dok bene pe akoko can, pien dong apwonye woko ma angeyo ni gin ma atye kwede roma. 12Angeyo bedo ki gin manok, dok bene angeyo bedo ki gin mabup. Apwonye me bedo ma cwinya opye ki gin mo keken ma atye kwede, i yengo matek mukato kare, nyo ciro kec, bedo ki lonyo madwong nyo bedo ki can. 13Atwero jami ducu liweng pi Kricito ma miya teko.

14Ento wun yam wutimo ber me ribe kweda i can ma onongo odiya. 151 Dok wun jo Pilipi wungeyo maber ni, ikare mayam an aa i Makedonia i acaki tito lok me Kwena Maber pe tye lwak mo ikin jo ma oye Rwot ma guribe kweda i yo man me miyo ki gamo mot, ento kono wun keken. 162 Kadi wa ikare ma atye i Tecalonika wucwala kony mamite tyen aryo kulu. 17Pe tyen loke ni amito mot, ento amitoni wunong gum pa Lubangawu ma a ki imiyo mot ma koni binyayo magoba ma kibikwano botwu. 183 Atyeko gamo gin ma wumiya ducu, obedo dwong mukato kare. Oroma dong maber, pien Epaprodito bene omiya mot ma wucwale kwede ni okel bota. Man gin aye gin ma ngwece kur ma kityero bot Lubanga, ma en pwoyo, dok ma yomo cwinye. 19Ento Lubangana bimiyowu jami ducu ma wumito, kun kwanyo ki i lonyone me deyo ma en tye kwede i Kricito Yecu. 20Deyo obed bot Lubanga Wonwa nakanaka. Amen.

Mot me agiki

21Wumot jo pa Lubanga ducu i Kricito Yecu. Utmega ma gitye kacel kweda kany bene gumotowu. 22Jo pa Lubanga ducu gumotowu, makatone jo me ot pa Cecar.

23Kica pa Rwotwa Yecu Kricito obed kwedwu.