Jo Kolocai 1

Mot

1Waraga man oa ki bot an Paulo ma lakwena pa Yecu Kricito pi mit pa Lubanga, ki bot ominwa Temceo.

2Bot jo pa Lubanga ki utmego ma gene i Kolocai, ma gitye i Kricito: Lubanga Wonwa omiwu kica ki kuc.

Lega me pwoc

3Wapwoyo Lubanga Won Rwotwa Yecu Kricito kare ducu ma walego pirwu. 4Wan dong wawinyo pi niyewu ikom Kricito Yecu ki pi marwu ma wumaro kwede jo pa Lubanga ducu. 5Meno ducu obino pi gin ma wugeno ma kikano i polo pirwu, mayam dong wuwinyo pire con i lok me ada, ma en aye lok me Kwena Maber 6ma obino botwu. Tye bene kanyako nyige kun nya iwi lobo ducu ikit yo acelu, macalo tye katime botwu, cake inino ma wuwinyo iye, ka dong oweko wuniang i kica pa Lubanga i ada. 7Epapira ma en latic pa Kricito pirwa ma gene ma en latic wadiwa ma wamaro opwonyowu kwede. 81 En bene ma otitiwa pi mar ma wutye kwede i Cwiny Maleng.

9Cake inino ma wawinyo pirwu, walego Lubanga ma pe wakeng, kun walego ni omyero dok wuniang matut i gin ma en mito, kun wubedo ki ryeko ki niang ducu ma Cwiny Maleng miyo. 10Wek kwowu obed ma myero bot Rwot, ma yomo cwinye maber, kun wutiyo tic mabeco mamiyo kwowu nyak nyig madwong, dok wumede bene kangeyo Lubanga. 11Walegoni Lubanga omiwu tek ducu ma a ki i twero me deyone, wek wucir can ducu kun wudiyo cwinywu i yo ducu ki yomcwiny. 12Walegoni wubimiyo pwoc bot Lubanga Won ma omiyowa twer me nywako kacel ki jone maleng jami ducu ma en bimiyo botgi i ker ma mere i lengpiny. 13En ceng olarowa ki ite loc me piny macol ci okobowa woko ite loc pa Wode ma en maro. 142 Koko dano, ma en aye weko bal, a ki bote.

Kricito en lawi jami ducu

15Kricito obedo cal pa Lubanga ma pe nen ni, latin kayo ki ikin ginacweya ducu ma Lubanga ocweyo. 16Pien i en Lubanga ocweyo jami ducu, gin matye i polo ki gin matye iwi lobo, gin manen ki gin ma pe nen, kadi wa wegi komker ki wegi dito, ki luloc, ki wegi twer ducu. Jami ducu yam kicweyo pi twere dok pire bene. 17En aye mukwongo kati atii ki jami ducu, dok bene i en jami ducu ribe kacel. 183En aye wic, ki jo ma oye en gubedo kome. En obedo acaki, en mukwongo cer ki ikin jo ma oto, wek etel yo ikin jami ducu. 19Pien Lubanga oye bedo i en ikit yo ducu ma en tye kwede. 204 Lubanga bene oye me dwoko jami ducu bote i Kricito, gin matye iwi lobo ki gin matye i polo, kun Kricito okelo kuc pi remo me tone ikom yatariya.

21Wun yam wupoke woko ki Lubanga; onongo wubedo lukwore i tamwu, kun wutimo gin maracu. 22Ento kombedi dong pi to pa Wode mayam odoko dano, en odwokowu woko bote, wek ekelwu inyime ma nongo wutye maleng, dok bene ma wutye labongo bal mo, ma lok mo marac pe ikomwu. 23Wumede me bedo ki niye, kun wucung matek, dok wumoko woko liking ma pe wulenge ki i gen me lok me Kwena Maber madong wuwinyo, ma gitito bot ginacweya ducu matye ite polo, dok bene an Paulo kikoma yam adoko latic pire.

Tic pa Paulo bot jo ma oye Kricito

24Kombedi an gira cwinya yom i can ma aneno pirwu, pien pi arem ma atye kacirone ikoma, atye kamiyo kony me tyeko gin ma orem i can pa Kricito, pi kome, ma en aye jo ma oye en. 25Pire omiyo yam adoko latic ma konyo lwak man, pi tic ma Lubanga omiya pirwu, wek amii lok pa Lubanga ongene. 26En mung ma okane pi kare malac bot lwak mapol ata, ento kombedi dong Lubanga omiyo onen woko kamaleng bot jone.

27Lubanga gire otamo ni emii jone gunge kit ma lonyone me deyo me mung man pire dit kwede ikin Lurok, i mitine kene. Mung meno en ene ni, Kricito bedo i iwu, miyo wubedo ki gen me nywako deyo pa Lubanga. 28Wan watucu pi Kricito kun waciko jo ducu, dok bene wapwonyo jo ducu ki ryeko ducu, wek wakel dano acel acel inyim Lubanga madong otegi i Kricito. 29Man aye gin ma omiyo ayele matek, kun acuke ki tekone madwong matye katic i iya.