Jo Kolocai 2

1Amito wunge kit ma acuke kwede katic pirwu, ki pi jo matye i Laodicea, kadi ki jo ducu ma pud peya guneno wanga, 2wek cwinygi obed tek, dok wek guribe kacel i mar wek gubed ki lonyo ducu ki ngec ducu ma gungeyo mung pa Lubanga ma en Kricito kikome. 3I en Lubanga okano iye lonyone ducu me ryeko ki ngec. 4Awaco man wek ngat mo pe ongakwu ki pyem me gobagoba me bwola. 5Kadi bed pe atye kacel kwedwu ikom, ento watye kacel i cwiny kun cwinya yom me neno kit ma wuwoto kwede maber i lok ducu, ki niyewu ma ocung matek ikom Kricito.

Kwo ma opong i Kricito

6Kit macalo yam dong wuye Rwot Yecu Kricito, omyero bene wubed i en. 7Lwitwu omyero odony ocung matek ikome, dok wubed macalo ot ma kigero ikome, ma wucung matek i niyewu kit mayam kipwonyowu kwede, kun pwocwu bene mede ameda.

8Wugwoke wek ngat mo pe ongakwu woko ki tam me ryeko nyo me bwola mo ma tere peke, kun wulubu kit yo me tekwaro ki pwony pa jogi maloyo lobo man, ma pe a ki bot Kricito. 9Pien Lubanga ikit ma en tye kwede i yo ducu, bedo ikom kricito i cal pa dano. 10Wun bene dong kimiyowu kwo ma opong i Kricito. En obedo lawi luloc ki wegi twer ducu. 11I Kricito bene dong yam kilirowu woko ki lire mere kikome, pe i lire ma dano gutiyo ki cinggi ikomwu, ento pi kwanyo kit me kom woko ki ikomwu. 121 Dok ikare ma kibatijawu kiyikowu kacel ki Kricito, ka lacen wucer woko kacel kwede i niyewu ikom tic pa Lubanga matek mayam ocero kwede Yecu Kricito ki ikin jo ma oto. 132 Wun mayam onongo dong wuto woko pi balwu, ki ni pien pe kiliro ringo komwu, wun aye dong Lubanga omiyo wukwo kacel ki Kricito, kun bene dong oweko balwa woko ducu. 143 En bene yam ongolo banya ducu ma kicoyo iwiwa ki miti me cik ma ceng omiyo kop oloyowa, ocwalo cen ci oguru woko ikom yatariya. 15Lubanga dong otyeko loyo jogi woko ma gin luloc ki wegi twer, ci nyutu kamaleng ikare ma Kricito oto ikom yatariya ni dong eloyogi woko. 164

Pimeno, pe wuwek ngat mo ongol kop ikomwu pi lok kom cam nyo ginamata, kadi pi nino madito, nyo por dwe, nyo pi Cabit. 17Magi ducu gubedo tipu keken ma nyutu gin ma bibino, ento kom gin meno tye bot Kricito. 18Pe wuwek ngat mo ongol ni kop oloyowu, kun mito pire kene ni dano gumwole keken gi gobagoba me woro lumalaika, ma nongo en ocung pi ginanyuta ma en oneno. Kit dano macalo meno wakene mwa labongo tyen lok mo, kun tamo tam me kom keken. 195 En pe omako Kricito matek ma en aye wic, mamiyo dul kom ducu limo cam, dok gikube kacel iwang mwot ki i ler, ka dong cako dongo ikit ma Lubanga mito ni odong kwede.

Kwo manyen i Kricito

20Ka wun yam dong wuto woko kacel ki Kricito, kun dong kigonyowu woko ki ite loc pa jogi me lobo man, pingo pud dok wumede ki bedo calo jo me lobo, kun wugwoko bene cik macalo magi ni, 21“Pe imak, pe ibil, pe igudi”? 22Magi ducu gubedo cik ki pwony pa dano, ma kemo mere jami ma tum woko ka kitiyo kwedgini. 23Ada, cik magi nen calo ryeko tye iye pien nyutu yo me woro ma lamal ma wun wuroto giwu pirwu kenwu, dok pi mwole ken me yelo kom i ciro can, ento pe konyo kadi ki acel me diyo miti me kom.