Jo Pilipi 3

Kit ma atir me ada

1Me agikine, utmega, wubed ki yomcwiny i Rwot. An pe aol gira me nwoyo coyo lok mayam kong acoyo botwu, dok loke twero jukuwu miyo pe wupoto i gin marac.

2Wuyab wangwu wunen gwogigu, ma gin lutim maracu, ma gingolo dul kom dano wokoni. 3Pien wan aye jo mulire me ada, wan jo ma waworo Lubanga i Cwiny Maleng, dok ma wa wake i Kricito Yecu, kun pe watye ki gen mo ikom gin ma nen ki woko ikom dano. 4Ento an kikoma onongo bene aromo bedo ki gen macalo meno; kace ngat mo tamo ni etwero bedo ki gen ikom gin ma nen ki woko ikom dano, ci an gira aloye. 51 An gilira inino me aboro me dita, roka jo Icrael ma i kaka pa Benjamin. An Laibru ma jo Ibru aye gunywala. I lok ma dok ikom Cik pa Moses, an abedo Laparicayo. 62 Lok ma dok ikom keto cwiny, yam alwenyo marac ikom lwak jo ma oye Yecu. Ka dong lok ma dok ikom bedo ki kit atir ma cung i lubu Cik, onongo gire lok mo pe ikoma. 7Ento i gin ducu mayam atamo ni konya, kombedi dong anenogi macalo gin ma konygi peke, pi Kricito. 8Adada, pe tye gin mo maber makato man en aye ngeyo Rwotwa Yecu Kricito; meno aye gin ma omiyo aneno jami ducu macalo gin ma konygi peke. Pi Kricito omiyo aloke adoko lacan jami ducu, dok anenogi calo yugi, wek anong Kricito, 9ci wek aribe bene kacel kwede. Pe atye ki kit ma atir ma mera kikoma, kadi ki mo ma bino pi lubu Cik bene peke, ento atye ki kit ma atir ma kinongo pi ye Kricito, ma oa ki bot Lubanga kikome, dok ma en miyo pi niye. 10Amito ange Kricito, ki tek ma en ocer kwede, amito bene anywak kwede can ma en ociro, adok calo en i tone, 11wek ka twere ao wa i cer ki ikin jo ma oto.

Ngwec me o iwang tol

12Pe atye ka waconi dong anongo, nyo ni dong ao ikit ma Lubanga nongo con mito ni abed kwede, ento pud amede ki ngwec anyim kun ateme ki tek me doko calo Kricito Yecu pien en oyera me doko calo en. 13Utmega, pe atamo ni dong atyeko nongone; ento tye gin acel keken, en aye ni wiya bedo ka wil i gin mukato angec, kun alaro gin matye anyim calo dano matye i ngwec me pyem. 14Aringo acito anyim atir kun akemo tol, wek anong mot, ma en aye lwongo ma Lubanga tye ka lwongowa kwede malo i Kricito Yecu. 15Wan ducu jo muteggi myero wabedu ki kit tam meno; dok bene ka tamwu opoke woko i lok mo, Lubanga binyutune botwu. 16Gin mamite keken aye ni myero wamede me cung matek i yo madong wao iye. 173

Utmega, wuribe kacel kun wulubu kita. Wan dong watyeko nyutu botwu lanen ma myero wulubi; wucik wangwu me neno jo ma lubu lanen meno. 18Abedo ka titiwu lok man tyen mapol ata, dok bene tin anwoyo tito botwu ki pig wanga ni, tye jo mapol ma kwogi miyo gibedo lukwor me to pa Yecu ikom yatariya. 19I agikine, jo meno gibito woko, pien lubangagi en aye miti me komgi, dok bene ginongo deyogi i gin ma myero omii lewic omakgi, tamgi kemo jami me lobo man keken. 20Pien wan anywali me polo; watye ka kuru Lalarwa ma bia ki kunu, en aye Rwotwa Yecu Kricito. 21En biloko komwa magoro ma to wokoni ci doko calo kome me deyo, kun tiyo ki tek mere ma miye twero me kelo jami ducu ite loce.