Jo Pilipi 2

Mwolo pa Kricito ki dite

1Pimeno, ka wunongo tekcwiny mo pi bedo i Kricito, nyo wunongo diyo cwiny mo ma a ki i mar, nyo ka gimiyowu ribe mo i Cwiny Maleng, nyo cwiny mo me kica nyo cwiny me con ne ma weko itimo ber bot jo mukene, 2dong alegowu ni, wumii yomcwinya ocobe maber kit man: wubed ki tam acel ki mar acel, kun wuribe kacel i cwinywu, ki tamwu bene myero obed acel. 3Pe wubed jo ma paro pirwu kenwu makato pi dano mukene ducu, ento wubed ki mwolo, kun dano acel acel woro lawote macalo ngat ma pire tek loye. 4Pe itam pi gin ma konyo in keken, ento tam pi gin ma konyo jo mukene bene. 5Wubed ki cwiny marom ki cwiny mayam Kricito Yecu obedo kwedeni. 6I kite kadi bed en Lubanga kikome, ento pe oride ki tek me bedo rom ki Lubanga. 7En oweko meno ducu, ci okwanyo kit me opii, ka kinywale macalo dano. 8Ka dong okati macalo dano, ci omwole woko gire kene, obedo lawiny nio wa i to, kadi bed bene en oto wa ikom yatariya. 9Pimeno, Lubanga omiye dit mamalo tutwal, dok bene omiye nying matye malo makato nying mukene ducu. 101 Lubanga otimo man wek gigu ducu matye i polo ki i lobo, kadi wa gigu ducu matye piny ite lobo, gurum cong gi piny me woro nying Yecu, 11ki leb ducu myero otuc bene ni, Yecu Kricito aye Rwot, kun kelo deyo bot Lubanga Won.

Ryeny calo dero i lobo

12Pimeno, wun ma amaro, macalo yam wuwinyo loka ikare ducu ma onongo pud atye botwu, myero wubed ki winy makato kombedi madong atye bor kwedwuni. Wutii tic me cobo larwu kekenwu ki lworo kacel ki myelkom, 13pien Lubanga aye matye katic i cwinywu, kun miyowu miti ki teko me tic, wek wun wuyom cwinye.

14Wutii tic ducu labongo nguru nyo pyem mo, 152 wek wubed labongo lok mo maloyowu, ma bal mo bene pe i cwinywu, lutino pa Lubanga ma bal mo pe ikomwu liweng ikin lwak jo me kareni ma gubale wokoni. Wutye ka ryeny i lobo ikin dano calo lakalatwe, 16pien wumako lok me kwo dong matek. Meno bimiyo awake inino me dwogo pa Kricito ni, yam kara onongo pe aringo ngwec nono, dok bene pe ayele nono. 17Kadi bed kiony remona me bedo macalo gityer amata ma kionyo iwi keno tyer, kun nongo niyewu kacel ki ticwu bote bedo macalo mot ma kitumu bot Lubanga. Ci an gira cwinya bedo yom kacel ki wun ducu. 18Kitmeno, wun bene myero cwinywu obed yom, wek wuribe kweda i yomcwiny.

Tam me cwalo Temceo ki Epaprodito

19Atye ki gen i Rwot Yecu me cwalo Temceo botwu oyot, wek omii awiny kit ma wutye kwede, kun cuko cwinya bene. 20Pe atye ki ngat mo mukene doki matye ki kit cwiny ma en tye kwede, dok matwero paro pirwu adada macalo en. 21Jo mukenegu ducu giparo pi gin ma konyogi keken, pe gitamo pi gin ma Yecu Kricito mito. 22Ento wun wungeyo kit Temceo ki konye ma en onyutu. En ki an wabedo calo wego ki latine; waribe kwede i tic kacel pi lok me Kwena Maber. 23Pimeno atye ki gen me cwale botwu oyot, tek aniang kit ma pinye tye kawot kwede ki tung bota kany. 24Dok bene atye ki gen i Rwot ni an kikoma abio botwu ikare macokcoki.

25Atamo bene ni myero acwal omera Epaprodito botwu, ma en latic wadwa ma olwenyo kacel kweda, en ngat mayam wuore bota pi konya i pekonani. 26Pien en paro pi wun ducu, kun mito ni enenwu, dok bene cwinye obedo ka cwer matek, pien yam wuwinyo ni kome lit. 27Adada, kome onongo obedo lit matek ma obwot to woko. Ento Lubanga okonye, pe en keken, ento kadi wa an bene, wek pe omeda cwercwiny ikom cwercwiny mukene ca. 28Meno aye gin ma omiyo amito tutwal ni myero acwale botwu wek wubed ki yomcwiny ka dok wunene, ki an bene pe dong myero abed ki cwercwiny madwong. 29Wujole i Rwot ki yomcwiny wun ducu; dok bene wuket deyo ikom jo ma cal kwede. 30Pien en yam omiyo kwone adada ma obwot to woko pi tic pa Kricito, wek ecob gin ma orem ikom kony mayam wumiya.