Jo Pilipi 1

Mot

11

Waraga man oa ki bot an Paulo ki Temceo, ma lutic pa Kricito Yecu.

Bot jo pa Lubanga ducu matye i Kricito Yecu ma gibedo i Pilipi, kacel ki luneno ki ludikon ma konyogi.

2Lubanga Wonwa ki Rwotwa Yecu Kricito omiwu kica ki kuc.

Lega pa Paulo pi jo pa Lubanga matye i Pilipi

3Apwoyo Lubanga ikare ducu ma nongo atye ka po pirwu. 4I legana ducu alego pirwu ducu ki yomcwiny, 5pien cake inino mukwongo nio kwede wa onyo, wuribe kweda i tic me tito lok me Kwena Maber. 6Aniang maber ni, Lubanga ma ocako tic man ikinwu bicobo kakare nio wa inino me dwogo pa Kricito Yecu. 7Opore bota me paro pi wun ducu kitmeno, pien pirwu lita tutwal, pien wun ducu wuribe kacel kweda i nywako kica ma Lubanga omiya i buc kany, ki dok ikare ma atye ka laro lok me Kwena Maber wek omok matek. 8Lubanga aye cadena ma ngeyo ni, par matut ma abedo kwede pirwu a ki i mar pa Kricito Yecu kikome. 9Dok alego Lubanga ni meno, mar mewu omyero odong omede ameda i ngec kikome ki niang matut, 10wek wuyer gin maber makato. Man bimiyo wubedo ma cwinywu leng labongo bal mo inino me dwogo pa Kricito. 11Man bene bimiyo kwowu bedo ma opong ki kit tic ducu mabeco pi yewu i Yecu Kricito, kun kelo deyo ki pak bot Lubanga.

Bedo kwo en aye Kricito

12Utmega, amito wunge ni, lok mutime ikoma okonyo matek me nyayo lok me Kwena Maber. 132 Man oweko acikari pa Cecar ducu, ki jo mukene bene, kombedi gin ngeyo maber ni, an atye i buc pi Kricito. 14Dok utmegiwa mapole gen gi bene omede ikom Rwot pi bedona i buc, omiyo gitito lok pa Lubanga ki tekcwiny madwong tutwal, labongo lworo.

15Ikom lok ada, jo mogo tito pi Kricito ki cwiny me nyeko ki me daa, ento jo mukene gitito ki cwiny maber. 16Jo ma tito ki cwiny maber ni gitito pi mar, kun gingeyo ni Lubanga oketa kany me bedo caden pi lok me Kwena Maber. 17Jo mukene ca gitito nying Kricito pi laro dito kun nongo cwinygi pe leng, tamgi tye me medo can bota i buc kany. 18Lok mo pe, an gira cwinya yom ayoma, pien i yo ducu, kadi i goba nyo lok ada, gitye katito pi Kricito.

19Eyo, pud dok abibedo ki yomcwiny. Pien angeyo maber ni, pi legawu ki pi kony ma a ki bot Cwiny Maleng pa Yecu Kricito, bimiyo abwot ki i can. 20Pien mitina ki gena madwong tye ni, lewic pe bimaka i gin mo, ento atamo me miyo deyo bot Kricito ikomani ki tekcwiny madwong, ikare ni macalo ikare ducu, kadi akwo nyo kadi ato. 21Pien ki tung bota, bedo kwo en aye Kricito, ki to kono aye dok ber makato ducu. 22Ka abedo kwo ikom, miyo abitiyo tic mogo ma konyo ento pe angeyo gin ma abiyero. 23Kwanyo acel ikom gin aryoni ocungo wiya woko. Mitina tye ni kono ato wek abed kacel ki Kricito, pien meno aye ber makato ducu. 24Ento bedo kwo ikom mite tutwale pirwu. 25An dong aniang i lok man, omiyo angeyo ni pud abibedo, dok abirii botwu wek wumede wuwot anyim, wubed ki yomcwiny i niyewu. 26Meno bimiyo wakewu pira i Kricito Yecu bedo dwong tutwal, ka dok adwogo botwu.

27Gin acel ma pire dit en ene ni, kit kwo me bedowu myero orwate ki gin ma lok me Kwena Maber ikom Kricito mito, wek kadi abino me nenowu, nyo kadi abedo bor kwedwu, ka awinyo lok ikomwu, myero ange ni, wucung matek i cwiny acel ki tam acel, kun wulwenyo kacel pi niye ma bino pi lok me Kwena Maber. 28Pe wuwek lukworwu gumiwu lworo i gin mo. Man aye lanyut ma cimo botgi kamaleng ni kibityekogi woko matwal, ento lanyut man nyutu botwu ni kibilarowu; pien loc man Lubanga aye miyo. 29Pien en omiyowu mot me kica pe me ye Kricito keken, ento me neno can pire bene. 303 Piman wun bene dong wudonyo ikit lweny mayam wuneno ikomani, dok bene kombedi pud wuwinyo ni atye iyeni.