Matayo 6:33

Lok ma Yecu opwonyo ikom konyo lucan

11

“Wugwoke, pe wunyut kitwu ma atir inyim dano ni wek gunenwu. Ka wutimo kumeno ci pe wubinongo mot mo ki bot Wonwu matye i polo.

2Pimeno, ka ikonyo lucan pe ikut tum, macalo lugoba mogo gitimo i kacoke ki i yoogu, ni wek dano opakgi. Adada awaco botwu ni, dong gutyeko gamo mot meggi woko. 3Ento in ka imiyo kony bot lucan, pe iwek cingi ma lacam onge gin ma cingi ma lacuc timo, 4wek imii kony bot lucan i mung; ento Woru ma neni i mung bimiyi mot.

Lok ma Yecu opwonyo ikom lego Lubanga

(Luk 11:2-4)

52

Dok ka wutye kalego Lubanga, pe wubed calo jo ma lugoba, pien gimaro lego Lubanga kun gicung acunga i kacoke ki i angaka ngaka yoogu ducu, ni wek dano onengi. Adada awaco botwu ni, gin dong gutyeko gamo motgi woko. 6Ento ka ilego, cit idony i kicikani ci ilor dogola woko, ka ileg Woru matye i mung; ci Woru ma neni i mungngi bimiyi mot.

7Ka wutye ka lega pe wudur lwak lok mapol kit macalo Lurok ma pe gingeyo Lubanga gitimo ni; pien gitamo ni Lubanga winyo legagi pi lwak lok mapol ma giduroni. 8Pe wubed calo gin, pien Wonwu ngeyo gin ma wumito ma nongo peya wupenye. 9Dong wuleg kit man ni,

‘Wonwa matye i polo,

kiwor nyingi maleng.

10Ker meri obin;

kitii gin ma i mito i lobo kit ma kitiyo i polo.

11Miwa tin camwa me tin.

12Iwek balwa,

macalo wan waweko bal pa dano ma gibalo botwa.

13Pe iwek kibitwa,

ento ilarwa ki igin marac.

Pien ker ki dit ki deyo obedo meri matwal, nino ma pe tum. Amen.’ 143

Ka wutimo kica bot dano pi balgi, ci Wonwu matye i polo bene bitimowu kica. 15Ento ka pe wutimo kica bot dano pi balgi, ci Wonwu matye i polo bene pe bitimowu kica pi balwu.

Lok ma Yecu opwonyo ikom rii kec

16Ka wurii kec pe wubed macalo lugoba ma wanggi nongo olwal woko, pien gibalo wanggi kitmeno ni wek dano onen ni gitye ka rii kec. Adada an awaco botwu ni, dong gutyeko gamo motgi woko. 17Ento ka wurii kec, wuwir wiwu woko ki moo, ci wulwok wangwu woko bene, 18wek dano pe gunen wun ni wutye ka rii kec, ento Wonwu makome pe nen aye onen; en Wonwu ma nenowu i mung bimiyowu mot.

Lonyo ma kikano i polo

(Luk 12:33-34)

194

Pe wukan lonyo pirwu kenwu i lobo, kama nyenye ki nyal gibalo woko, dok kama lukwo gibino gituru ot ci gikwalo woko. 20Ento wukan lonyo pirwu kenwu i polo, kama nyenye ki nyal pe gibalo, dok kama lukwo pe bino gituru ot ci gikwalo. 21Kama lonyowu tye iye cwinywu bene bedo iye.

Tara me kom

(Luk 11:34-36)

22Tara me kom aye wang. Kace wangi bal mo peke iye, ci komi kulu bibedo i dero. 23Ento kace wangi tye kibal mo ikome, ci komi kulu bibedo i colpiny. Dong ka dero ma i cwiny ni odoko mutu, ci mutune dong bedo rom mene!

Tic pi Lubanga ka dok tic pi lim

(Luk 16:13)

24Pe tye dano mo matwero tic ite twero pa ludito aryo; pien bikwero ngat acel ci maro mukene ni, nyo bimoko ikom ngat acel, ci cayo ngat mukene ni. Pe wutwero tic pi Lubanga ka dok wutiyo pi lim bene.

Bedo ki par mapol

(Luk 12:22-31)

25Pimeno awaco botwu ni, pe wubed ki par mapol pi kwowu, ni wubicamo ango, nyo ni wubimato ango, nyo pi komwu, ni wubiruku ango. Kwo pe pire tek kato cam? Ki kom kono pe pire tek kato ginaruka? 26Kong wunen winyo me polo; pe gicoyo kodi dok bene pe gikayo kac, pe bene gidilo cam idero, ento Wonwu matye i polo pud pitogi. Wun pe pirwu tek kato pirgi woko? 27Dong anga ikinwu matwero medo mwaka acel ikom kwone pi bedo ki par mapol? 28Pingo wubedo ki par mapol pi ginaruka? Kong wutam pi lenga me tim, kit ma gidongo kwede. Pe giwiyo uci, dok bene pe gicweyo bongo; 295 ento pud amede ki waco botwu ni, kadi bed Solomon yam oruke ki deyone ducu, ento pe oruke macalo mo acel ikin gi. 30Kace Lubanga ruku lum ma i tim kitmeno, ma bedo tye pi nino ma tin keken, ento diki inongo kibolo woko i keno, ci en pe birukuwu makato, wun jo ma niyewu nok? 31Pimeno pe wubed ki par mapol kun wuwaci, ‘Wabicamo ango?’ nyo ni, ‘Wabimato ango?’ nyo ni, ‘Wabiruku ango?’ 32Pien Lurok gitye kayenyo jami magi ducu; Wonwu matye i polo ngeyo bene ni wumito jami magi ducu. 33Ento kong wukwong keto cwinywu ikom kere, ki nongo kit ma atir ma en tye kwede, ci jami magi ducu kibimedo botwu. 34Pe wubed ki par mapol pi nino ma diki, pien nino ma diki biparo pire kene. Wuwek can me nino acel acel otum ki ninone.”