Jon 1:5

Lok me kwo

1I acaki Lok onongo dong tye, Lok onongo tye bot Lubanga, Lok onongo en Lubanga. 2En yam tye bot Lubanga i acaki. 3Jami ducu yam kitiyo kun a ki i en, pe tye gin mo mayam kicweyo labongo en. 4I en onongo tye pete me kwo, kwo meno con obedo dero lameny piny pa dano. 5Dero ryeny menyo piny macol, ento piny macol pe twero genge ryeny. 61

Yam tye dano mo ma Lubanga ooro, nyinge Jon. 7En obino pi bedo caden me tito lok ikom dero meno, wek dano ducu guye pi loke. 8En kikome onongo pe dero, ento obino pi tito lok me caden ikom dero.

9Dero me ada ma menyo dano ducu onongo obibino i lobo. 10En yam con onongo tye i lobo, jami ducu yam kicweyo kun a ki i en, ento lobo pe obedo ki ngec ikome. 11En obino tugi, ento lutugi pe gujole. 12Ento dano ducu ma gujole, ma guye en, en omiyogi twero me doko lutino pa Lubanga. 13Gin pe gudoko lutino pa Lubanga pi remogi, kadi pi miti me kom, kadi pi miti pa dano, ento pi miti pa Lubanga.

14Lok odoko dano, obedo ikinwa, kun opong ki kica ki ada; wan waneno deyone, deyo ma en onongo macalo pa latin acel keken ma en wod pa Won. 15Jon obolo lok me caden ikome kun dange ni, “Man aye ngat mayam atitiwu pire ni, ‘Ngat ma bino ingeya kata ki dit, pien en okwongo bedo tye inyima wa yam con.’” 16Nia i lonyone mapol wan ducu kimediwa kica ikom kica. 17Pien cik yam kimiyo kun wok ki bot Moses, ento kica ki ada, Yecu Kricito aye okelo. 18Pe tye ngat mo mayam oneno Lubanga; kono Wod acel keken marom ki Lubanga, matye acel ki Won, en aye omiyo Won ongene.

Lok me caden ma Jon otito

(Mat 3:1-12; Mar 1:1-8; Luk 3:1-9)

19Man lok me caden ma Jon obolo, ikare ma Lujudaya guoro ajwaki pa Lubanga ki jo Levi nia Jerucalem bote me penye ni, “In anga?” 20En otucu kamaleng, pe omungo, otucu ni, “An pe a Kricito ma Lubanga oyero.” 212 Gupenye ni, “In dong anga? In Eliya bo?” En odok iye ni, “Pe.” Ci gin dok gupenye ni, “In lanebi mono?” En ogamo ni, “Pe”. 22Dok gupenye ni, “In anga ka? Titiwa, wek wadwok lok bot jo ma oorowa. Ilwonge kekeni ni in anga?” 233 En odok iye ni, “An a dwon ngat ma dange i tim ni, ‘Wutir yo pa Rwot ocung atir,’ kit mayam lanebi Icaya owaco.”

24Jo mogo ma ceng kiorogi nia ikin Luparicayo 25gupenye ni, “Dong pingo ibatija dano, ka in pe i Kricito ma Lubanga oyero, nyo Eliya, nyo lanebi meno?” 26Jon odok ki gin iye ni, “An abatija dano ki pii; ento ikinwu ocung ngat mo ma wun wukwiya, 27en aye ngat ma bino ki ingeya, ma an pe amyero me gonyo del ware.” 28Lok man ducu otime i Betania loka Jordan, kama Jon yam obedo ka batija iye dano.

Latin romo pa Lubanga

29Orwone Jon oneno Yecu kun woto bino tung bote, ci owaco ni, “Nen Latin romo pa Lubanga ma kwanyo bal me lobo! 30Man aye ngat mayam awaco pire ni, ‘Ingeya bibino ngat ma kata ki dit, pien en okwongo bedo inyima wa yam con.’ 31An kikoma onongo pe angeye, ento pi lok man omiya abino kun abatija dano ki pii, wek kinyute bot Jo Icrael.”

32Jon otito lok me caden ikome ni, “Ceng aneno Cwiny Maleng kun bino nia ki i polo macalo amam, opye, obedo ikome. 33An kikoma yam pe angeye; ento ngat ma oora ka batija dano ki piini owaca ni, ‘Ngat ma ibineno Cwiny Maleng bino, pye, bedo ikome, en aye ngat ma bibatija dano ki Cwiny Maleng.’ 34Dong aneno, dok atito lok me caden ikome ni, man en Wod pa Lubanga.”

Lupwonye ma gukwongo lubu Yecu

35Orwone doki, ma Jon ocung ki jo aryo ikin lupwonyene, 36ci oneno Yecu matye kawot, ci owaco ni, “Nen Latin romo pa Lubanga!” 37Lupwonye meno aryo guwinyo kun waco lok man, ci gulubu Yecu. 38Yecu oloke, onenogi kun gilube, ci openyogi ni, “Wuyenyo ango?” Ci jonu gupenye ni, “Rabbi (ma te loke ni, Lapwony) ibedo kwene?” 39Ci Yecu odok ki gin ni, “Wubin, wunen.” Ci gubino, guneno kama en onongo bedo iye; ci gubedo bote inino meno, pien cawa dong onongo cok romo apar.

40Ngat acel ikin jo aryo mayam guwinyo Jon kun loko, ci gulubu Yecu, onongo Anderiya, omin Cimon Petero. 41En okwongo nongo omine Cimon, ci owace ni, “Watyeko nongo Meciya” (ma te loke ni, Kricito). 42Ci otere bot Yecu. Ka Yecu onene, ci owace ni, “In aye Cimon, wod pa Jon. Kibilwongi ni, Kepa” (ma en aye Petero dok teloke “pata”4).

Yecu olwongo Pilipo ki Natanael

43Orwone Yecu oa me cito i Galilaya. Ka orwate ki Pilipo, ci owace ni, “Luba.” 44Pilipo yam onongo a ki i taun Betecaida, ma obedo taun ma Anderiya ki Petero bene gia ki iye. 45Pilipo onongo Natanael, ci otite ni, “Watyeko nongo ngat ma Moses yam ocoyo pire i Cik, ma lunebi bene gucoyo pire, en aye Yecu me Najaret, wod pa Yucepu.” 46Ci Natanael openye ni, “Gin mo maber twero kati ki i Najaret?” Pilipo odoke iye ni, “Bin, inen.”

47Ka Yecu oneno Natanael matye kabino bote, ci oloko ikome ni, “Nen Laicrael me ada, ma pe tye ki goba mo i cwinye!” 48Piman Natanael openye ni, “Ingeya ningning?” Yecu odoke iye ni, “An aneni ma onongo ibedo ite olam ma peya Pilipo olwongi.” 49Natanael odoke iye ni, “Lapwony, in giri i Wod pa Lubanga. In i Rwot me Icrael!” 50Ci Yecu odoke iye ni, “In iye pien awaci ni, ‘Aneni ka ibedo ite olam’? Ibineno jami madito makato magi.” 515 Dok owace ni, “Adada awaciwu ni, wubineno ka polo yabe, kun lumalaika pa Lubanga giito dok gilor piny ikom Wod pa dano.”