Jo Galatia 3

Lubu Cik nyo bedo ki niye

1Wun jo Galatia kara wuming kuman! Anga ma orogowu? Wun ceng kinyutu botwu atyer kit ma kiguro kwede Yecu ikom yatariya kun wuneno ki wangwu! 2Kong apenywu ki peny man keken: wun mono yam wulimo Cwiny Maleng pi lubu Cik, kece nyo pi ye lok me Kwena Maber ma wuwinyo kitito botwuni? 3Wun kara luming kuman! Wucako lubu kit me Cwiny, ci kombedi dong wumito wugik ki tekomwu? 4Gin jami mapol madongo macalo meno otime botwu nono? I adane onongo otime ki tyen lok! 5En Lubanga ma omiyowu Cwiny Malengi, dok otiyo bene tango mapol ikinwu, wutamoni en otiyo man pien ni wulubu Cik, kece nyo pi ye kwena ma wuwinyo ma kitito botwuni? 61

Kitmeno bene yam kicoyo lok ikom Abraim ni, “En oye Lubanga, omiyo kikwane ni en dano ma kite atir.” 72 Myero wunge ni jo matye ki niye, gin aye likwayo pa Abraim kikome. 83 Lucoo ginacoya yam con onongo dong gungeyo woko ni, Lubanga bikwano Lurok ni gin jo ma kitgi atir pi niye. Lubanga yam otito lok me Kwena Maber con bot Abraim kun wace ni, “Rok ducu bilimo gum piri.” 9Pimeno, jo matye ki niye gibinongo gum kacel ki Abraim ma obedo ki niye. 104

Jo ducu ma gujenge ikom tic me lubu Cik dong kicenogi woko; pien yam kicoyo ni, “Cen opot ikom jo ducu ma pe gilubu gin ducu ma kicoyo i buk me Cik, kun kicobo bene tice kakare.” 115 Kombedi lok dong ongene woko ni, pe kikwano dano mo ni kite atir inyim Lubanga pi tiyo gin ma Cik mito; pien kicoyo ni, “Ngat ma kite atir pi niye bibedo kwo.” 126 Ento Cik pe ocung ikom niye, pien kicoyo ni, “Ngat ma tiyo kun lubu gin ma Cik mito bikwo pire.” 137 Kricito aye ma nene okokowa ki i cen ma opoto ikomwa pien pe walubu Cik; en obino ci oloke odoko dano ma kiceno ma kakawa. Pien yam kicoyo ni, “Cen opoto ikom dano ma kingabo malo iwi yat.” 14Lok man otime wek gum ma Lubanga ceng omiyo ki Abraim Lurok bene gunong pi Yecu Kricito, ka wek wan bene walim Cwiny Maleng mayam kiciko pireni pi niye.

Cik ki gicike

15Utmegina, kong anyut labol me lok ikom dano. Ka jo aryo gucike i gin moni, ma gumoko gicikegi, ngat mo pe dok twero lokone, dok bene pe twero medo gin mo i gicike meno. 168 Lubanga yam ocike gin ki Abraim ki bot lakware bene. Ento yam ginacoya pe owaco ni, “Ki bot likwayi,” ma nyutu ni gipol, ento owaco ni, “Ki bot lakwaru,” ma nyutu dano acel keken, ma en aye Kricito. 179 Gin ma myero alok tye kit man ni, Cik madong obino lacen inge mwaka miya angwen ki pyere adek pe dong romo turu gicike ma con Lubanga otyeko mokone wokoni, dok bene pe bimiyo gin ma ociko lal nono. 1810 Kace leyo jami ma kimiyo ki Abraim obedo pi Cik, meno nongo pe lubu kit cike mo. Ento Lubanga yam omiyo bot Abraim i gicike macalo mot.

19Cik dok mite pingo? Cik yam kimedo ni wek turu Cik onen woko kamaleng, nio wang ma lakwaro Abraim ma kiketo cike pireni obino. Lumalaika aye ma ceng gukelo Cik, ci gumiyo i cing ngat ma larib dano kacel. 20Ento larib dano pe mite pi ngat acel keken, ento Lubanga aye tye acel.

Gin ma omiyo kiketo Cik

21Itamo ni Cik dong tye kapyem ki gicike pa Lubanga? Pe kitmeno gire, pien ka nene kimiyo Cik matwero miyo kwo, kono kwano dano ni kite atir obedo pi lubu Cik. 22Ento coc mayam kicoyo otweyo dano ducu macalo lumabuc ite twero me bal, wek cike ma nene kiciko pi ye Yecu Kricito kimii bot jo ma oye en.

23Ikare ma niye peya obino, Cik aye ma onongo gwokowa, kun otweyowa woko macalo mabuc, nio ka kinyutiwa niye. 24Kitmeno Cik aye obedo lagwokwa ma myero olowa nio ka Kricito obino, ka dong kicako kwanowa ni kitwa atir pi niye. 25Kit ma dong niye tye ni, pe dok wabedo ite twero pa lagwokwa; 26pien wun ducu dong wudoko lutino pa Lubanga pi niye Yecu Kricito. 27Wun jo ducu madong kityeko batijawu inying Kricito dong wuruku Kricito macalo wuruku bongowu. 28Apokapoka mo dong pe ikin Lajudaya ki dano me Grik, ikin opii ki ngat ma lone kene, kadi ikin laco ki dako, pien wun ducu dong wurom i Kricito Yecu. 2911 Ka wun dong wulwak pa Kricito, ci dong wun likwayo pa Abraim; dok pi cike pa Lubanga, wun lule gin mayam en ociko bot Abraim.