Jo Galatia 4

1Kombedi dong waco kit man ni, laleyo ka pud latin bedo rom ki opii, kadi bed en won jami ducu. 2En kong bedo ite loc pa jo ma gwoke ki jo ma gwoko jamine, nio ka kare ma wone ociko oromo. 31 Wan bene watye kitmeno; ikare ma wan pud lutino, yam wabedo opii pa jogi ma gitye kaloc iwi loboni. 4Ento ma kare kikome ma kicikoni dong oromo, ci Lubanga ocwalo Wode ma dako onywalo, kun kinywalo ite Cik, 52 wek okok jo mayam tye ite loc me Cik, ka wek wan bene kilokwa wadok lutino me paco. 6Kit macalo wun dong lutino me paco, en aye ma omiyo Lubanga ocwalo Cwiny pa wode i iwa ma weko walwongo Lubanga ni, “Abba! Wora!” 7Kitmeno, pi tic pa Lubanga omiyo in dong pe opii, ento latin me paco; ka dong in latin me paco, man nyutu ni in dong lale jami.

Paulo oparo pi jo Galatia matek

8Ikare macon ma onongo peya wungeyo Lubanga, onongo wubedo opii pa gin mogo atata ma i adane gin pe lubanga wa ki acel. 9Ento kombedi dong wungeyo Lubanga, nyo kong awac ni, Lubanga dong ngeyowu; ci dok wutwero dok cen ningning bot jogi macon ma gigoro, ma piny bene oloyogi wokoni? Pingo dok wumito bedo opiigi pi tyen me aryo? 10Wuketo cwinywu me gwoko nino, ki dwe, ki kare mapatpat, ki mwakagu! 11Atye ki lworo matek, pien tica ma ayele kwede botwu kara aneko iye koma nono.

12Utmegina, alegowu ni wubed calo an, pien an bene dong adoko calo wun. Wun giwu yam pe wutimo gin mo marac ikoma. 13Wungeyo ni, pi koma ma onongo obedo lit omiyo atitiwu lok me Kwena Maber pi tyen mukwongo. 14Yam pe wungala dok pe wucaya, kadi bed koma ma liti okelo botwu aoma cwiny, ento wujola maber calo wujolo lamalaika pa Lubanga, dok calo wujolo Kricito Yecu kikome. 15Gin ango dok ma ongole i yomcwiny ma onongo wubedo kwedeni? An cadenwu ma aloko ni, kace nene twere, kono wukolo wangwu woko ci wumiyogi bota. 16An mono aloke adoko lamerokwu pi tito botwu lok me ada?

17Jo mukene ca gibwolo wangwu nono, tamgi rac. Gimito cego wiwu woko, wek wucak dworogi. 18Dwore pi gin maber ber kare ducu, pe ka an atye botwu keken. 19Lutinona, pud dok atye kaciro arem pirwu macalo dako ciro arem ikare me nywal, nio ka kit pa Kricito ocwene i iwu. 20Onongo amito ni kong bed kwedwu kombedi, ka wek aniang kit gin ma myero alok botwu ki kunu, pien atye kaparo pirwu mada.

Carolok ikom Agar ki Cara

21Kong dong wutita mono wun jo ma wumito ni Cik olowu, wun pe wuwinyo gin ma Cik waco? 223 Pien yam kicoyo ni, Abraim onongo tye ki awobe aryo, acel obedo wod pa angeca, ki acel obedo wod pa dakone kikome. 23Ento wod pa angecani yam kinywalo ikit me kom, ki latin pa dako kikomeni kinywalo pi cike mayam Lubanga ociko. 24Man ma awaconi obedo carolok. Mon aryo magi nyutu gicike aryo bene. Ngat acel oa ki iwi got Cinai, lutino ma en onywalo gubedo opii; dako meno en aye Agar. 25Kombedi Agar nyutu got Cinai, matye i Arabia; rom ki Jerucalem me kareni, pien en tye i opii kacel ki lutinone. 26Ento Jerucalem matye i polo lone kene, en aye obedo minwa. 274 Pien yam kicoyo ni,

“Bed ki yomcwiny, in dako ma lalur mayam pe inywalo latin mo ni,

mwoc ki wer kun idange matek in dako ma pud peya yam arem ogoyi!

Pien lutino pa dako ma kitenyo pol,

kato lutino pa dako ma bedo gin ki cware kacel.”

28Utmegina, wan wacal ki Icaka, wan lutino me cike pa Lubanga. 295 Ento macalo ikare ca onongo latin ma kinywalo ikit me kom obedo kaunu latin ma kinywalo pi Cwiny pa Lubanga, ikareni bene tye kitmeno. 306 Ento ginacoya kono waco ni ngo? Waco ni, “Ryem angecani woko gin ki wode, pien wod pa angeca pe bileyo jami kacel gin ki wod pa dako kikome.” 31Kitmeno, utmega, wan pe lutino pa angeca, ento wan lutino pa dako kikome.