Jo Galatia 5

Wucung matek ikom kuc me lone kenwu

1Kricito dong otyeko gonyowa woko ki i opii wek wabed jo ma kigonyo. Wucung dong matek; pe dok wuye rwako tyenwu i okol me opii.

2Wuwiny ba, an Paulo kombedi awaciwu ni, ka kilirowu, ci teloke ni kony pa Kricito dong peke botwu. 3Anwoyo loka dok bot dano acel acel ma kiliro ni, en dong tye ki banya me lubu Cik ducu. 4Wun jo ma wumito ni kikwanwu ni kitwu atir pi lubu Cik, wun dong wupoke woko kenwu ki bot Kricito; dong wunyiko woko cen, wubwoto kica pa Lubanga. 5Watye ki gen madwong pi Cwiny Maleng me nongo kit ma atir ma kimiyo pi niye. 6Pien i Kricito lire nyo bedo ma pe kilire ducu konygi peke; niye keken aye konyo, ma tice aye mar.

7Onongo nene wucako ringo ngwec maber; anga mono ma dok ogengowu i lubu lok me ada? 8Abita macalo man pe oa ki bot ngat ma ceng olwongowuni. 91 Ka kitedo mugati, tobi matidi mo keken aye yenyo moko woko ducu. 10Atye ki gen i Rwot ni, tamwu pe bipoke ki mera; ento ngat mo ni matye kabalo cwinywu wokoni, kadi bed en anga, Lubanga bingole kop. 11Utmegina, pingo dok pud kiuna, ka an kikoma aye atito ni lire ber? Ka nene atito lok kumeno, kono pe tye gin mo ilok ikom yatariya ma obedo macalo ajut ma yoko dano. 12Kono jo matye kabalo cwinywuni gumede anyim, gukole woko keken gi gigi!

13Utmegina, yam kilwongowu me bedo agonya kun wulone kenwu; ento pe dok wulok bedo agonyawu odok me cobo mit ma kinywalowu kwede. Ma ka timo meno, myero dano acel acel omine me konyo luwote pi mar keken. 142 Pien Cik ducu kiribogi woko ilok acel keken ni, “Mar lawoti macalo imare keni.” 15Ento ka wubedo ka kane kekenwu ki lakwu calo lee mager, kun wutimo dano wadiwu calo guci, myero wugwoke wek pe wutum woko kekenwu.

Nyig me Cwiny ki tic me kit pa dano

16Ento awaciwu ni, wuye Cwiny Maleng pa Lubanga aye otelwu, wek pe wucob miti me kit pa dano. 173 Pien miti me kit pa dano pyem ki miti pa Cwiny Maleng, dok miti pa Cwiny Maleng bene pyem ki miti me kit pa dano. Gin aryoni gimon, meno aye gin ma gengowu tiyo gin ma wumito. 18Ento ka Cwiny Maleng aye matye katelowu, ci dong pe wubedo ite Cik. 19Tic me kit pa dano manen woko kamaleng gin en: tim kwele, caro, tarwang, 20woro cal jogi, talo dano, mone, daa, nyeko, kiniga, laro dito, pyem, poke, 21nek, mero ki kongo, cam me yomcwiny me mingo marac, ki mogo mukene macalo meno. Pud dok ajukuwu matek, kit macalo nene kong ajukuwu ni, jo ma timo gin macalo magi, ker pa Lubanga pe bibedo meggi.

22Ento nyig me Cwiny Maleng gin aye mar, yomcwiny, kuc, diyo cwiny, kica, ber, gen, 23mwolo, gwoke ken; Cik mo pe ma kwero gin macalo magi. 24Dano ma gin jo pa Kricito Yecu dong gutyeko neko par ki miti me kit pa dano woko, ci gugurogi woko bene ikom yatariya.

25Ka wabedo kwo pi Cwiny Maleng, ci myero dong wawotu kun walubu en. 26Pe myero wabed kawake awaka, pe wanget cwiny luwotwa, dok pe myero wabed ki nyeko ikinwa kenwa.