Jo Galatia 6

Konye wunu kenwu

1Utmegina, kace kimako dano katimo bal mo, wun jo ma wutye ki Cwiny pa Lubanga wukonye wek odwoge i yo ma atir, kun wubedo kwede ki cwiny me mwolo. Kong ingiine kekeni, wek in bene pe kibiti. 2Wuting peko pa luwotwu, meno aye bimiyo wucobo Cik pa Kricito. 3Pien ka dano mo tamo i cwinye kene ni en e gin mo, kun i adane nongo en pe gin mo, nongo en bwole abwola kene. 4Dano acel acel kong ongii tice kene ka ber, meno miyo tyen lok me wakene bedo pi tice kikome ma en otiyo, ma pe dok poro ki tic pa lawote. 5Pien dano acel acel tye ki yece ma omyero oting.

6Dano ma kitye kapwonyo ki lok ikom Kricito myero onywak jami ducu mabeco ma en tye kwede ki ngat ma pwonye.

7Pe wuwek kibwolwu; Lubanga pe gituku kwede. Gin ma dano ocoyo, en aye bene en bikayo. 8Ngat ma ocoyo kodi i poto me kit pa dano, gin ma en bikayo ki iye en aye to; ento ngat ma coyo kodine i poto me Cwiny Maleng, bikayo mere kwo ma pe tum pi Cwiny Maleng. 9Pe omyero waol katiyo gin maber, pien ka kare oromo, ka cwinywa pe odoko nyap, ci wabikayo kac. 10Dong kit macalo pud watye ki kareni, myero watiyu gin maber bot dano ducu, makato ducu myero watiyu bot utmegiwa ma guye Kricito.

Miyo tam me agiki ki mot

11Kong dong wunen kit nukuta madongo ma atye kacoyone ki cingani. 12Jo matye kadiyowu ni myero wulireni, gin aye jo ma mito ni gin maber ma gitiyo onen ki woko. Tamgi tye ni pe myero kiungi pi yatariya pa Kricito. 13Kadi jo ma kilirogini bene pe gimako Cik, ento gimito ni kilirwu ka wek giwake ikom lirewu. 14Ento an pe amito awake pi gin mo, kono pi yatariya pa Rwotwa Yecu Kricito keken, pien ki tung bota lobo dong kiguro woko ikom yatariyane, ki tung bot lobo an kikoma bene dong kigura woko. 15Pien bedo ma kilire nyo ma pe kilire lok mo pe iye; ento gin ma pire dit tutwal en aye me bedo ginacweya manyen. 16Kuc ki kica obed ikom jo ma poro kwogi ki cik man, ki ikom jo pa Lubanga ducu.

17Cake kombedi pe amito ngat mo oyela, pien atye ki poyo madong kiketo ikoma ma nyutu ni an opii pa Yecu.

18Kica pa Rwotwa Yecu Kricito obed kwedwu, utmegina. Amen.