Jo Epeco 1

Mot

11

Waraga man oa ki bot an Paulo ma lakwena pa Kricito Yecu pi mit pa Lubanga.

Bot jo pa Lubanga ma gitye i Epeco, ma gin aye jo ma gigene i Kricito Yecu.

2Lubanga Wonwa ki Rwot Yecu Kricito omiwu kica ki kuc.

Gum me cwiny ma kimiyo bot jo ma gitye i Kricito

3Myero wapwo Lubanga, Won Rwotwa Yecu Kricito, pien i Kricito dong omiyowa kit gum me cwiny ducu matye i polo.

4Pimeno en oyerowa wa con i Kricito ma pud peya ocako ocweyo lobo, wek wabed jo maleng inyime labongo bal mo ikomwa. 5Lubanga pi mit ma mere kene onongo dong oyubu wacon ni wan myero wadok lutinone pi tic pa Yecu Kricito. 6En otimo man wek wapak mote me kica me deyo madit ma en omiyo ki wan pi Wode ma en maro. 72 Pi remo me to pa Wode ma ocwer pirwa, dong kikokowa woko, kiweko balwa, kit macalo lonyo me kicane dwong kwede, 8ma en omiyo botwa madit lawangacel limuk. Pi ryekone ki pi niange ducu, 9en dong omiyo wangeyo mung me miti mere, kun lubu yub maber ma ceng en oyubu me cobo i Kricito. 10Yub pa Lubanga ma en bicobo ka karene oromo, en aye me coko jami ducu matye i polo ki iwi lobo, ki ribogi woko kacel ite loc pa Kricito.

11Pien jami ducu tiine kun lubu tam pa Lubanga ki mitine. En oyerowa i Kricito pi tame, wek wan wabed jone, kun onongo yam en dong oyubu woko con ni, 12wan Lujudaya ma wan aye jo mukwongo bedo ki gen ikom Kricito, omyero wamii dano gupak deyo pa Lubanga. 13En bene oyero wun Lurok ma wutye i Kricito, mayam wuwinyo lok ada, ma en aye lok me Kwena Maber me larewu. Wun wuye en, oweko kimiyo ki wun Cwiny Maleng ma con Lubanga ociko pireni, wek obed macalo lanen ma mere madong kiketo ikomwu. 14En aye gin ma kijengo ma nyutu ni wabinongo gin ducu ma Lubanga oyube me miyo botwa ikare ma Lubanga bikoko jone kikome, ma bimiyo dano gipako deyone matek.

Lega pa Paulo bot Lubanga

15Pi lok man, cake ma awinyo pi niyewu ikom Rwotwa Yecu, ki pi mar ma wun wumaro kwede jo pa Lubanga ducu, 16omiyo pe akeng pwoyo Lubanga pirwu, kun alwongo nyingwu bene ilegana. 17Alego Lubanga pa Rwotwa Yecu Kricito, Lubanga Won deyo, wek omiwu cwiny me ryeko, dok bene onyutiwu ngec ikome kekene. 18Dok bene alego ni en omeny tamwu, wek wuniang ikom gen ma en olwongowu iye, ki ikom mot me lonyo ki deyo madwong ma en miyo bot jone wek obed meggi matwal. 19Alego bene wek wuniang ikit ma tekone madwong tutwal ma pe pimeni tye katic kwede i iwa, wan jo ma waye Yecu. Man rom aroma ki tic madit me twer ma en tye kwede, 203 ma ceng ocero kwede Kricito ki ikin jo ma oto, ka okete obedo i kabedo me deyo kangete tung acuc i polo.

21En dong tye malo, loyo kit loc ducu ki twero ki teko ki dito ducu matye i polo, ki nying mo ma oywek i lobo me kare man ki i lobo me kare ma bibinoni bene. 224 Lubanga dong oketo jami ducu ite twero pa Kricito wek oloo, dok omiye bot lwak jo ma oye en wek en obed macalo wic, kun loyo jami ducu. 235 Lwak jo ma guye Yecu gin aye kom Kricito, ma omiyo en opong otum maber woko licwic, kun Kricito bene opong ijami ducu ma ikabedo ducu.