Jo Epeco 2

Jo ma oto gudoko jo makwo

11

Ikare ma okato angec onongo wun ducu wubedo jo ma oto pi turu cik ki balwu. 2Ikare ca onongo wulubu yo maracu me lobo man, kun wuwinyo lok pa ngat maloyo twer mogo matye malo i dye yamo, ma en aye cwiny ma kombedi tye katic ki i jo ma dag winyo lok ma Lubanga waco. 3Wan ducu yam warom ki jo meno pi lubu miti ma kinywalowa kwedeni, kun wacobo miti me komwa ki gin ma watamo pirwa kenwa; omiyo pi kit mayam watye kwede, kiniga pa Lubanga onongo myero opot ikomwa macalo opoto ikom jo mukeneni ducu. 4Ento Lubanga lalonyo i kicane, mar ma en omarowa kwede dit tutwal; 5en ma omiyo kadi bed onongo wadoko jo ma oto pi turu cike, en omiyo wadoko kwo kacel ki Kricito. Lubanga olarowu pi kicane. 6Pi ribewa ki Kricito Yecu en ocerowa woko kacel kwede, ka dong oketowa wabedo kacel kwede i polo. 7En otimo man ducu wek enyut ikare ducu ma pud tye anyim lonyone madwong ma pe pime me kica, ma onen ki bere botwa i Kricito Yecu. 8Pien pi kicane omiyo en olarowu pi niye. Man pe otime pi tic mo ma wun wutiyo; meno obedo mot pa Lubanga gire. 9Pe otime pi ticwu mo, ma omiyo ngat mo owek wake pire. 10Wan wabedo ginacweya pa Lubanga; en ocweyowa i Kricito Yecu ni wek wabed jo ma tiyo tic mabeco mayam en oyubu ni omyero watii.

Jo ducu dong guribe gudoko lwak acel i Kricito

11Kong wupo ikit ma wun yam onongo wubedo kwede, wun ma wubedo Lurok ikit me anywali. Lujudaya gilwongowu ni wun jo ma pe kiliro, kun gilwonge ken gi ni gin jo ma gulire, pi liregi ma cing dano otiyo iringo komgi. 12Kong wupo bene ni ikare ca onongo wupoke woko kamabor ki Kricito; yam kikoyowu woko ki ikom lwak me Icrael, pe wunywako gicike pa Lubanga ki gin ducu ma en ociko ni ebitimo pi jone. Yam wubedo i lobo man labongo gen mo, Lubangawu bene onongo peke. 13Ento kombedi i Kricito Yecu wun jo mayam wutye kamabor dong kikelowu cok pi to pa Kricito.

14En kikome okelo kuc ikinwa, omiyo wan kwedwu dong wadoko lwak acel. Pi miyo kome kene en dong okwanyo mone woko ki ikinwa macalo dong omuku cel ca mayam poko kinwa wokoni. 152 Pi kelo kuc omiyo en ojwayo Cik pa Moses woko ki gin ma kiciko iye ducu, wek omii wan jo me dul aryoni wadok rok acel manyen ma guribe kacel i en. 163 Pi tone ikom yatariya odwoko wan rok aryoni ducu bot Lubanga ikom acel, omiyo mone ogik woko. 174 Yam en Kricito obino otito lok me Kwena Maber me kuc botwu wun jo ma onongo wutye kamabor, ki botwa wan jo ma onongo watye cok. 18Pi Kricito wan ducu, wan Lujudaya ki wun Lurok, kiyabo botwa yo i Cwiny Maleng aceli me o bot Lubanga Won.

19Kombedi dong wun pe wubedo lurok nyo adonyi; wun kacel ki jo pa Lubanga dong wutye ki paco acel, wun dong wudoko jo me ot pa Lubanga. 20Wun dong kombedi wudoko ot ma kigero, ma gutine obedo lukwena ki lutit lok pa Lubanga. Yecu Kricito kikome aye obedo got madit me twoke. 21Gedo man ocung i Kricito, dok bene tye kadongo me doko ot pa Lubanga maleng i Rwot. 22Wun bene kitye kagerowu kacel ikome, wek wubed ot ma Lubanga bedo iye.