Jo Epeco 3

Tic ma Paulo otiyo pi Lurok

1Piman, alego Lubanga pirwu, an Paulo ma abedo lamabuc pi Kricito pirwu wun Lurok. 2I ada wun dong wutyeko winyo kit ma Lubanga i kicane omiyo ki an tic ma atiyo botwu. 3Dok bene kit ma onyuta kwede munge, omiyo angeyo, macalo dong atyeko coyo pire malo kany macekceki. 41 Ka wukwano ci wutwero neno maber kit ma aniang kwede i mung ma otiko Kricito. 5Ikare ma okato angec Lubanga yam pe onyutu mung man bot dano adanani, ento kombedi dong onyutu bot lukwenane maleng ki lunebi, pi Cwiny Maleng. 6Mung meno tye kit man ni, pi lok me Kwena Maber omiyo Lurok dong gudoko lunywak gum pa Lubanga kacel ki Lujudaya; gudoko dul kom acel kwedgi, gin bene gunongo gin mo ducu kacel kwedgi mayam Lubanga ociko pire i Kricito Yecu. 7An kiketa abedo latic me lok me Kwena Maber pi mot me kica pa Lubanga, ma omiya pi tic me twerone. 8Kadi bed ni rwomma onongo tidi tutwal ki ikin jo pa Lubanga ducu, ento en omiya mot man me kica me tito lok me Kwena Maber bot Lurok ikom lonyo madwong pa Kricito ma tere pe tate, 9ki me weko dano onge kit ma en ocobo kwede yub mere me mung ma onen woko kamaleng bot jo ducu. Onongo Lubanga ma ocweyo jami ducuni okano mung man pi kare ducu ma okato angec. 102 Man otime wek kombedi otii ki lwak jo muye Yecu me miyo luloc ki wegi twer ducu matye i polo gunge ryeko pa Lubanga ma kite patpat. 11Man olube ki tam pa Lubanga ma onongo yam tye con, ma en ocobo ikom Yecu Kricito Rwotwa. 12Pi Yecu omiyo wan jo ma waye en walimo tekcwiny pi niye, pien en oyabo botwa yo me o inyim Lubanga ki gen. 13En ma omiyo alegowu ni, pe omyero cwinywu odok nyap pi can ma kitye kauna kwede pirwu; pien can man tye me bere botwu.

Ngeyo mar pa Kricito

14Lok man aye ma omiyo arumu conga inyim Lubanga Won, 15en aye tye macalo wegi jo me odi ducu ma gitye i polo ki ma gitye i lobo. 16Alego ni pi lonyone me deyo omyero omii Cwiny mere opongwu ki teko ki kero madwong i iwu, 17wek Kricito bene obed i iwu pi niyewu. Dok bene alego ni Lubanga omii wucung matek imar macalo yat ma lwite odonyo matut ingom. 18Alego bene ni wubed ki teko, ki cwiny me niang, kacel ki jo pa Lubanga ducu, kit ma mar pa Kricito lac kwede, kit mabor kwede, ki kit ma odongo kwede malo, dok kit matut kwede, 19wek wunge mar pa Kricito makato ngec ducu, wek wupong ki gin mo ducu ma opong i Lubanga.

20Deyo obed bot Lubanga matwero tiyo tic madwong tutwal makato gin ma watwero lego pire nyo keto i tamwa, pi tekone matye katic ikomwa. 21Pi Kricito Yecu, lwak jo ducu ma oye en omyero gupake nakanaka, ikare pa yalwak ducu. Amen.